" ئه‌م ده‌قانه له ئه‌سڵدا به عه‌ره‌بی نووسراون.
نووسه‌ر و ڕه‌خنه‌گر (نه‌جات حه‌مید ئه‌حمه‌د)
به پێداچوونه‌وه‌ی نووسه‌ر كردوونی به كوردی. "
به‌شی یه‌كه‌م
(1)
خاتوون خه‌ریك بوو گه‌رده‌لوولی
به ده‌می لاڵه‌وه هه‌ڵده‌واسی. .
ئه‌ویش سه‌ره‌تای ئاسوَی به خوَوه گرتبوو. .
ئه‌مه قه‌ده‌ری مێژووه،
له جوگرافیا تارماییه‌كه‌یدا
كه‌واته ڕه‌گه‌كان بوَ كێن؟
مه‌رگ. . .
ده‌نگ. . .
شكستی قه‌قنه‌س،
به‌سه‌ر باڵی ئاسوَوه. .
ده‌ماری به ئاگای فرمێسكاوی،
له‌و چاوانه‌دا ده‌بریسكێنه‌وه
كه به دوایاندا گه‌ڕایی و نه‌تدوَزیه‌وه. .
بوَ برای من؟
باڵی شكاو به‌م چه‌شنه هه‌ڵنابه‌سترێته‌وه
خه‌ونیش وه‌ها نییه
خه‌ون به‌و جوَره‌نییه. . براله!
29/6/1995
(2)
ژێیه‌ك ده‌ژه‌ندرێ،
ژێیه‌كیش ده‌ژه‌نێ. . .
دوو شتی جیاوازن
بوَچی دونیای بینینمان
بوو به باڵوَنی ڕه‌نگاو ڕه‌نگ
بێهووده ده‌فڕن. . ؟
بوَچی سرووته‌كانمان بوون به هاواری بیابانان؟!
با ئه‌م وێستگه‌یه ببێته
دوا شه‌و و
دوا هه‌ناسه. .
له هه‌ناسه‌بڕكێماندا به دوای سه‌راب. .
با پێكه‌وه هه‌ناسه‌یه‌ك بده‌ین هاوڕێم
سه‌راب ته‌واو شه‌كه‌تی كردووین. .
25\5\1995
(3)
له‌وانه‌یه به یه‌ك بگه‌ین
ئینجا توَ بڵێی ژوان سه‌رمه‌ستیی تیا بێ؟
بێ ئه‌وه‌ی زه‌مه‌ن ببینین كه به‌سه‌ر ده‌چێ؟!
جه‌سته‌ی توَ تا دێ ده‌بنیسێ. .
ئه‌وه‌تا هی منیش له ژێر قورسایی وێكهاتنه‌وه‌دا ده‌ناڵێنێ. .
له كاتێكدا ده‌ریایه‌ك تاریكستان به‌شت ناكا
له گومان نزیك بیته‌وه. .
من تاڵێ ڕووناكیم به‌سه
دڵنیایی بگرم. .
توَ منت به‌ده‌ر له خودی خوَم ده‌وێ. .
توَ زه‌مه‌ن نابینی. .
كه‌واته بادانه‌وه بوَچی؟
به‌ره‌و ئه‌و ئاسوَیه لێچووه‌وه‌دا؟
به‌ره‌و ئاره‌زوویه‌ك به ڕه‌نگی سه‌راب. . .
له‌وێدا كه به یه‌ك گه‌یشتنی تێدا
جوَرێكه له مه‌حاڵ؟!
1\8\1995
(4)
ئێشی ڕوَژگار!
وریا به‌وه!
وریا به‌وه! ڕوَح پیر نابێ. .
ئێستا چوَله‌كه وای لێ هاتووه تێم ده‌گا و تێم ناگا. . !
نیشتیمان به شێوازی سڕبه‌كانه‌وه كوژراوه‌ته‌وه
چ هووده‌یه‌ك له‌وه‌دا هه‌یه ڕه‌شه‌با به‌ره و به‌هه‌شتمان ببا
وریا به‌وه!
هاتووه داڵانه‌كانی ناخی ڕوَحم ببڕێ
هاتووه برینه‌كانم بكولێنێته‌وه
كه له خوَیدا به چه‌قوَی ڕوَژگاری نامه‌رد كولاونه‌ته‌وه. . .
ڕوَژگاری سڕب و
بازرگانانی تلیاك و
ئومێددزان. .
وریابه‌وه!
تا خه‌ونه‌كانم بگرمه ده‌ست
بوَمان نووسراوه به بێده‌نگی هاوار كه‌ین
ئه‌ی ئه‌و دوورگه‌یه‌ی
به ماته‌مینی زه‌ماوه‌ندان گه‌رم بووه. .
بێده‌نگی. . ته‌نیا بێده‌نگی. .
با هاوار كه‌ین
تا پڕ ده‌بین له بێده‌نگی
هاوار كه‌ین
ئه‌ی ئازاری ڕوَژگار!
ئێستا چوَله‌كه وای لێهاتووه
تێم تێده‌گا و تێم ناگا. . .
12\10\2005
(5)
ساڵی ڕوَژێك باس له مافی مروَڤ ده‌كه‌ن
تا ڕوَژه‌كانی دی پێشێلی بكه‌ن. .
به‌م شێوه‌یه و به‌و چه‌شنه
مافی مروَڤ،
بوونه‌وه‌ری ئه‌فسانه‌یی و
دروَی گه‌وره‌ی. . دونیا
هاته ناو سه‌رده‌می سێرك. .
كه خه‌می تێدا ده‌بێته
بزه‌ی سارد و مردوو. .
ئه‌وه به خودای چپه‌ی به ڕوَژی نیوه‌ڕوَیه
له‌باره‌ی – حه‌فت و هه‌شتی هێلكه‌و مریشك،
كامیان له كامیانن
خودایه!
ئه‌م هه‌موو ده‌مامكه له كوێوه دێنن؟
9\12\1995
(6)
ته‌نیا هێڵێه‌كه. .
با له كوژانه‌وه‌ی بپارێزین!
كه‌نار به‌ردبارانمان ده‌كات. .
ده‌ستلێكبه‌ردانی سپێده‌یش له‌وانه‌یه مه‌حاڵ نه‌بێ. .
من ئه‌و زانیاریانه‌م
له گه‌ڵای پایز و. .
هه‌نگاوه‌كانی (با) و
كلیله‌كانی وه‌هم. . خوێندنه‌وه
ئه‌وه‌تانێ به‌ناو پێچه‌كانی ڕووخاندا،
به بێده‌نگی هاوار ده‌كه‌م. .
هه‌موو بوَ له‌یلای خوَیان ده‌گرین. .
كه‌چی هه‌مووشیان خوَیان ئاماده ده‌كه‌ن به شه‌قامه خه‌مباره‌كاندا ڕایبكێشن. . !
خودایه چ ده‌بینم؟
ئه‌و هه‌موو كه‌ڵبه تیژانه؟
بوَ ته‌نیا هێڵێك و
چیتر نا. . !
15\2\1996
(7)
ئه‌وه كاره‌ساتی هه‌ردووكمانه
ئیتر ئه‌وه دونیایه
هه‌ندێ جار سپێده ڕاده‌خه‌ین
جاریش هه‌یه تاریكی به خوَماندا ده‌ده‌ین. .
له‌گه‌ڵ ئه‌وه‌شدا،
هه‌ست به مانگ و ئه‌ستێران ده‌كه‌ین
به ده‌مارانماندا دێن و ده‌چن. .
هه‌ر ئه‌مه‌ش تاقه دڵنه‌واییمانه بوَ به‌رده‌وام بوون
به دوای ئه‌و بوونه‌وه‌ره‌ی،
بووه به گاڵته‌جاریی هه‌مووان!!
كه ئه‌ویش جددیه‌ته. .
به‌ڵێ هاوڕێم. .
ڕاستیی لاوانه‌وه به‌س نییه. . .
ئه‌مه كاره‌ساتی من و توَیه. . هاوڕێ. . !
با به هه‌ندی وه‌رگرین و شانی بده‌ینه به‌ر
شه‌وگار بێ شك لێ ده‌چێته‌وه. .
با شانی بده‌ینه به‌ر. . هاوڕی. . .
18\3\1996
(8)
ئا لێره‌دا
له‌و كه‌ناره ڕووته‌ڵانه‌دا ده‌مێنمه‌وه. . .
ئیتر وای لێهات
ڕوَحی به خه‌م چه‌كدارمان
په‌رده بوَ هه‌موو شتێك ده‌دروێ
بوَ لانه‌وازیمان نه‌بێ. .
كه له ده‌ره‌وه‌ی مێژووی جوگرافیادا ماوه‌ته‌وه!!
ببوره!
مه‌وداكانیش له‌گه‌ڵ ئێمه پیربوون. .
ئیتر سوودی چییه؟
به یه‌ك بگه‌ین و گوَرانی بڵێین و یه‌كدی ماچ بكه‌ین؟
هه‌موو ئه‌مانه كه‌ڵكیان چییه؟
له كاتێكدا خانمی ئاسوَ
مانگێكی ماندووه به ساڵانی زڵكاو و
خوانه گه‌نیوه‌كان. .
ببوره. . . !
من لێره ده‌مێنمه‌وه
له‌سه‌ر ئه‌و كه‌نارانه‌دا ڕاده‌كشێم
ئه‌وان ئه‌وه‌تا ده‌قیقه و
سه‌عات و
ڕوَژانیش ده‌نێژن. . .
خانمی ئاسوَیش مانگێكی ماندووه به ساڵانی زڵكاو و
به‌و مه‌ودایانه‌ی له‌به‌ریاندا نه‌ماوه و پیر بوون. . .
3\5\1996
(9)
هیچ وێستگه و به‌نده‌رێك نه‌ماوه
ماڵئاوایی تێدا بكه‌ین
نوَش!
ڕووباره‌كانتان خوارده‌وه. .
جوَگه‌كان،
كانیاوه‌كان. . هه‌مووی. . .
نوَش!
ڕێگای دوَزه‌ختان كورت كرده‌وه. .
له سرووشتی ده‌ست بوَ نه‌براوه‌وه
تا باخچه پلاستیكیه‌كان
كه به وشكایی ده‌دێردرێن. .
به ڕاستی ئه‌مه ده‌رهاوێشته‌ی
ڕوَچوونتانه له هیچ و
له (جاران وا بووین) دا
كه له ناخماندا،
هێللانه‌ی چێ كردوه. .
به‌ڵام تاكه‌ی (جاران وا بووین)
له بن باڵمان بنێین؟
بوونه‌وه‌ری به پیریی ڕوَژگاران داپوَشراو. .
هاتن ڕوانین و چرپه‌كانیشمانیشیان برد. .
مه‌وداكان وه‌ك خوَیانن. .
به‌ڕاستی ئامێزی مردوو
ماچی مردوو پێیوه‌داین
ئیتر یا ژیان یاخود ژیان. .
به‌سه هاوڕێ!
ئه‌مه چ بانیژه‌یه‌كه لێیه‌وه ده‌ڕوانین!؟
18\6\1996
(10)
لێم گه‌ڕێ وه‌كو خوَم بمێنمه‌وه كه خه‌ون ده‌بینم.
لێم گه‌ڕێ خه‌یاڵی ڕوناهی و خوَشه‌ویستی و به‌رائه‌ت بكه‌م،
كه ئه‌وه چه‌ندین جاره له تیروَر ڕزگاری ده‌بێ. .
وێرای هیچی هیچكاران و
ده‌مامكی ساخته‌چییان. .
لێم گه‌ڕێ وه‌كو هه‌م
به بێده‌نگی. . هاوار بكه‌م
ته‌نیا به بێده‌نگی. .
ڕوناهی و خوَشه‌ویستیت پێ زوَر نه‌بێ بوَم
من خه‌ریكه زمانی ئاو و
قه‌ڵبه‌زه‌ی شه‌پوَل و
سرووده‌كانی دڵڕه‌قی له بیر ده‌كه‌م. .
كه ڕوَژگارێك به خه‌ونی ئه‌وانه‌وه
ده‌ژیاین و ده‌مردین. .
بوَمن به زوَری مه‌زانه ئه‌ی ئه‌و ڕوَحه‌ی
له باڵی ئه‌و په‌پوولانه‌وه هه‌ڵده‌چی
ڕه‌نگی ڕه‌شه‌با و
ڕه‌نگی یه‌قینیان گرتووه. .
3\8\1996
