نیگاری: هونەرمەند، (تارا ئەمین)
تۆ نەهاتی،
تا ئەم تاریكییە
بە تیغی ڕووناكی لەت بێ. .
تۆ نەهاتی،
تا چرای هاتنت
تەنێ جارێ لەم ماڵە هەڵ بێ. .
ئەوەتا،
(تا)ی ژیان مێلۆدییەكانی
بەبەر چاوی خوماری كازێوەوە
ڕەش كردەوە. .
ئەوەتا،
تا-ی ژیان خاتوو (ئەڤین)ی
بەنێو قەتارەی سامۆتكەكاندا
لەگەڵ خۆی بردەوە. .
ئیدی،
مێلۆدی گۆڕغەریب بوو و
لە حزووری حەزرەتی بادا،
پەیكەری بۆ دانرا. .
خانمی ئەڤین مرد و
لە گۆڕستانی حەوادا،
بە خاك سپێردرا. .
تۆ نەهاتی،
تا خونچەگوڵی ماچ
بەری سڵاوی با بگرێ. .
تۆ نەهاتی،
تا مفرەدیی گۆنای سوور
بە چریسكەی شەوق،
لەگەڵ حەزرەتی مانگ بەشەڕ بێ. .
٠٨ / ٠٨ / ٢٠٢١
