((ئایا باشتر نییە وەرگیر قاتلێك كەوی
تا وەگیر خەیاڵی ژنێكی هەوەسباز؟))
نیتچە
(1)
/ سنووری كۆچەریان لەو سۆزەوە دوای هات/ پێخوستی/
/ئەرخەوانی پێوە بوو. . . / سۆمای چاوم مینا بوو/ سایە/
/بێهاوتا. . بێنەزیر/ كنێر پاڵپشت/ تەم بەركۆژە. . . / تۆ/
/نیگارێك نی مەكۆی سیحر و ئەفسانە/ تۆ بێشەڵانێكی،
جوانی و دڕەندەیت پێكەوە تێدایە. . . /
دونیا لە سەهەندی گومڕاییدا نووستووە،
ئەو پیاوە سادە و دڵپاكە نەبێ
دەڕوا پێ لەدڵی خۆی دەنێتەوە. . .
دڵی شووشە
لەیاری پێكردندا شكابوو. . .
مارەزیو،
دڕندەی جەنگەڵان، پەسیوی پیلان. . .
مارەزیو شایانی تەلاری دڵ نەبوو
شایانی تەلاری مینابەند نەبوو مارەزیو. .
(2)
/ (كارێ)، لە هەیوانی ڕوونایی/ فرمێسكباراندا هاتووە. . . /
/ ڕووبەندی هەواداریە/ گۆشەی ڕەشداگەڕاو/ چاو كەوشەنی
ئەوانی بڕیوە و بەردەوامە. . . / (كارێ)، پاسارییە؟/ نا/ كارێ
هەناسەی ڕەشی سەردەمە؟/ بەڵێ. .
نێرگسی گوڵڕەنگی بینایی بوو
فیراق نەورەسی تەنیایی . .
نەدیواری خانەقا ما،
نەبەر ئاستانەی خەرابات
ئیدی مەدەدیار لەكامە ڕووگە
لەشەیدایان دەردەكەوێ. . ؟
(3)
/ ژانری چی دادڕەس؟/ درەختی مەوسیمە/ نادیدە. . . / تیری
غەدر لە بەیان دەگرێ/ تەتەر بە دەردیان نەخوارد/ مۆسیقا/
/ئاواز/ لە كوێی مردنن. . . ؟
خۆزگەكانم گوڵیان دا
گوڵنار چەتری خەرامان بوو. . .
ئەوە من نیم سنووری تەم دەبڕم
ئەوە ئاوێنەی (كارێ)یە
شەوق لە سۆز دەداتەوە. . .
(4)
/كێ وای كرد وێنەی خۆمان نەناسینەوە؟/ توحفەیێك بوو لە
مۆزەخانە/ بەڵام هەڵنەواسرا بوو/ هەڵپەسێردرا بوو. . . /
/لافاویش هات/ ئێمە هەر تینووەكەی جارانین. . / زەنەكە. . . /
/زەنەكە. . . زەنەك/
چیا نایەڵێ بخەوم،
چیا نەیانهێشت بخەوم
چیا تەماشامان دەكەن
چیا تەماشایان كردین
چیا دەبینن چ دەكەین
چیا بینیان چمان كرد. .
چیا ئیتر باوەشمان بۆ ناكەنەوە. .
چیا ئیتر تێمانگەیین چ ماڵێكین. .
چیا نایەڵن بخەوم .
(5)
/باران بوو خۆڵەمێشی دامركاندەوە. . . / بەی بوو/ قوببەی
هەڵداشتە فڕۆكەخانەكان. . . / هەورازێكی سەخت نەبوو/
ئەگینا شەو هەر من دەزانم چی پێ دەكردین/ ئارێ !. . . /
/ماسكفرۆش بازاڕیانە/ ئارێ (كارێ)یشی تێدا بەشدارە. . . !
لەو دیو جامخانە شینەكانەوە دەیانبینم
لەو دیو جامخانە شینەكانەوە دیتنم. . .
لەو دیو جامخانە شینەكان،
دەستیان لە پرچی شیعرم نابوو
ئاگریان بەڕوودا دەپرژاندم. . .
بانگ هەر جارێك بوو:
خوداحافیز مەوسیمی خایین. . . !
(6)
/فیراق/ پێشوتاری كتێبێك بوو/ بە شەختە نووسرابووەوە/
/باڵ بە باڵدارانەوە. . . / وچان بە سیمای ماندوو. . . / (دیسان شەوهات)، (كارێ) شەوبەشارە. . . / ئەرێ ماندبوو نەبووی
كارێ؟/
سپێدە بەوازی ئێمە ڕوون دەبووەوە. . .
سپێدە بەوازی ئێمە ڕوون ببووەوە. . .
خەنەبەندانی ڕووبەند و
شینی سایەی ڕەشماڵان بوو
سپێدە ئەی دڵ درێژدەبێتەوە. .
درێژدەبێتەوە. . .
درێژدەبێتەوە. . . درێژ
تا دەستی بە بوولێڵ ڕا دەگا و
نایەڵێ تاریك دابێ. . .
حوزەیرانی/ 2003
