پەیژەیەك لە گوڵ بۆ هەور. .
لەهۆمیرۆسەوە
هەمان تارمایی و هەمان وەهم . . .
سەمای دڕك
لێوارە بە تەنتەنەكانی پرسیار
كەللەپڕیی، كەڕوو. .
سەری پەتەكان لە فڕین دەچن . .
ئاسۆ لە پرۆتۆكۆلێكی قەدكراو
لەتەقسێكی ئابڕوبەر .
(ئەوانەی ڕۆیشتن
ئاسوودە لە سپێدەی ئاژاوە
ئاسوودە لە چاوەڕوانی. . .
نهێنییان بۆ ئێمە جێ نەهێشت . .
دیماهیان بەسەرابی
بڕست و پەندگۆیی و پیرۆزگری هێنا. .
ئەوانەی ڕۆیشتن
لە بیشەڵانی (ئا) و (نا)وە،
ئاسوودە لە سپێدەی ئاژاوە
ئاسوودە لە چاوەڕوانی
بۆی دەرچوون. . )
گوێی شار بە وتاران بریندار
مردن لەژیان خۆشتر نەبوو. .
مۆرێك بۆ گۆشەگیری
بۆ زمان پژان
بۆ سۆز. . .
گۆڕ لە خەونێك دەچێ سپی
سپی وەك كەفاوی سابوون
وێنەی (خود)ێكی سەر بەتەم. . .
چاوی شار بە وتاران سووتاو
هەور بە مشتێ خۆڵ
بەری ئاسمانانی نەگرت. .
ئینجانەیەك لە كلیل
شۆڕشێك لە شەرم
شەو نەیهێشت قژم لەسەردا بڕوێ . .
شەو نەیهێشت من و خۆم
یەكتری ببڕێنینەوە. .
شەو نەیهێشت گوێمان لە فرمێسك
چاومان لەدەنگ بێ. . .
(تونێڵێكی تاریك بوو
ئەو گیانبەتاڵییەی لە ئاڵوودەیی زیاتری تێدا نەبوو
مۆتەكەیەكی پیر، كانگەی شەیتانهێن
شەشدەری لێ گرتبووین . . .
ئەی شار گۆڕ !
كە دڵنیا و ئاسوودە لەڕەهایی ئاكامەكانەوە
پێ لەسەر پێ تیلاكت لێ خوار كردووە!
ئەی جەستەی تاجە خلۆر كراوەكان !
پیاڵە و سەنگدڵی و مەیخانەش
بۆ دەرەوەی خەونەكانمان تووڕدران.
ئێستا تارماییەكی ئاوابوو و
ئەستێرەیەكی نووستووین.
ئێستا لەخاڵێك دەچین
تا لەبەر ژمارەیەكمان دانەنێن ناخوێندرێینەوە . )
شارا چ شارا
سروودێكی دەگمەن
كوورەی نوور. . .
شارا چ شارا، بە خۆی دەچوو
گەنجینەی كەژاوە
گوڵێكی ڕەنگ هەڵایساوی باخچەی خوا
نیشتمانێك پڕ بە هەناسە. .
لە زەماوەندی شەختەدا
چووە دەست ئەوانەی
ڕێگایان بۆ نەدەچووەوە بانە. . .
شارا چ شارا؟
زەمانێكی زۆر كولێرەی لەژەهردا كردە قیبلە
كولێرەی كردە دەزگای بیركردنەوە لە مردن . .
شارا چ شارا
جۆگە و ڕووبارەكانی لەچوارچێوە دەگرت. . .
زستانێك لە پەمۆ
كرمی ڕووناهیخۆری
لە جەستەی دونیا بەرداوە
كازیوە
سپێدە
نیوەڕۆ و ئێوارەیان پێ نەهێشتین.
داد ئەی شاری گۆڕ !
كە دڵنیا و ئاسوودە
لە ڕەهایی ئاكامەكانەوە
پێ لەسەر پێ
تیلاكت لێ خوار كردووە. .
بە هارێك لە شێتی
شیعری بە قەسیدەمانەوە نەهێشت. . .
داد . . . ! داد. . . !
داد ئەی شاری گۆڕ !
باڵایەك لە كینە،
كێوێك لە پۆستاڵ،
داڵانێك لە خونكاریی،
شایان بوو بدرەوشێنەوە ؟
ئەوانەی ڕۆیشتن
ئاسوودە لەسەری پەتەكان
وەك بەرپابوونەوەی پەپوولە
یا گوێ بۆ مۆزارت ڕادێران
لە حەقیقەتی سێبەرە كزەكاندا
دەیانویست بە ماچ
دەمی ئۆپۆزسیۆنی ئەڤین بگرن .
بۆشاییەك لە پڕی
جبەخانەیەك لە ئاشتی . .
ڕێگە بوو دەڕۆی
نەك قاچەكانی من
مانگ بوو دیاربوو
نەك پەنجەی من. . .
ئەو دارەی سێبەری دەكرد
شین نەبووەوە.
ئەو پاژنانەی شوێنەواریان دەركەوتبوو
پاژنەی بۆرەجەنگاوەرەكان بوون
دیلیان لە مەزرای ئەجندان
بە پەتی پەشمین دەخنكاند. . .
ئیتر تەواو ئەی چاوی پاسەوان
چیڕۆكی سێبەر لێرەدا تەواو بوو. . .
گرێكان
لە هێدمەی هەرزەیی و پەیمانشكێنیدا
لێرەدا كرانەوە
لێرەدا. . .
ئەی چاوی پاسەوان. . . !
شوباتی/ 1998
