لەوەتەی گفتوگۆ و دانوستان سەبارەت بە پێكهێنانی كابینەی نۆیەمی حكوومەتی هەرێمی كوردستان دەستی پێكردووە، لایەنە براوە و سەرەكییەكان زۆر لە یەكدی نزیك بوونەتەوە، بە گوێرەی لێدوانی بەرپرسە باڵاكانیش بێت، بەم زووانە حكوومەتی داهاتووی هەرێمی كوردستان ڕادەگەیەندرێت.
ئەوەی كە دەبێ بە گشتی قسەی لەسەر بكرێت، چۆنیەتیی مامەڵەی ژیرانەی ستافی كابینەكەیە لەبارەی خواست و داخوازیی خەڵك و بەهەندوەرگرتنی داواكارییەكانیان، كە بێگومان، كاراكتەری سەرەكی لەو حكوومەتە نوێیەدا، مەسروور بارزانییە و حەق وایە لە هەمووان وردتر سەرنجی لەسەر ئاییندەی هەرێمی كوردستان بێت.
ئەو چوار ساڵەی داهاتوو، بێ گرفت و كێشمەكێش تێناپەڕێت (لە هەموو ڕووەكانەوە)، بەڵام دەشێ لێهاتوویی و ئەزموونی ڕابردووی سەركردەكان، هاوكێشەكان بە جۆرێك بگۆڕێت، كە دواكەڕەت حكوومەتی هەرێم لە قۆناغی شەڕی نەگریسی تیرۆریستانی داعش و قەیرانە ئابووری و سیاسییە كەڵەكەكراوەكانەوە، بۆ قۆناغێكی دیكەی نوێ هەنگاو بنێت.
چۆن؟ یەكەم كاری لەپێشینە، وەلانانی ناكۆكییە لاوەكی، بنەڕەتی و سەرەكییەكانە لەگەڵ حزب و لایەنە سیاسییەكانی دیكەدا، بە جۆرێك، دەكرێ هەمووان پێكەوە هاوكار بن بۆ خزمەتكردنی خەڵك لە سەرجەم كایە جیاوازەكانی ژیاندا، بەوانەشەوە كە بەشداری لە حكوومەتدا دەكەن و ئەوانەش كە ئۆپۆزسیۆنن (بە جیاوازیی ئایدۆلۆژیاشەوە).
لای هەمووانیش ڕوونە، باشتركردنی بژێویی خەڵك لە كابینەی نۆیەمدا، دەبێ ئەولەوییەت بێت، چونكە هاووڵاتیان مافی زۆر سەرەتایی خۆیانە ژیانێكی شایستەیان هەبێت.
وەك دەریشكەوتووە، ڕەخساندنی هەلی كار بۆ بێكاران بەپێی پڕۆگرام لە كەرتی (حكوومی و تایبەتدا)، زۆر گرینگە، لەبەر ئەوەی خەڵكێكی زۆر (بە بڕوانامە و بێ بڕوانامە) بێكارن و گەر دەرفەتیان بۆ بڕەخسێت، هێز و بازوو دەخەنەگەڕ و بە شێوەیەك لە شێوەكان ڕۆڵیان لە ئاوەدانكردنەوەی زیاتر و برەوپێدانی كەرتە جوداكاندا دەبێت.
ئەركێكی دیكەی حكوومەتەكەی مەسروور بارزانی، نەهێشتنی گەندەڵیی ئیداری و داراییە لە وەزارەت و دەزگا و دامەزراوە جیاوازەكاندا، چونكە لە بەشێكیاندا گەندەڵی گەیشتووەتە لوتكە و پێویستی بە چاوخشاندنەوە و هەڵدانەوەی دەفتەری كاركردنی (بەرپرسیاران) هەیە لە (ئەلف)ەوە تا (یا).
هەرزانكردنی نرخی سووتەمەنی و داخستنی پاڵاوگە نایاساییەكانیش، خزمەتێكی دیكە بە خەڵك دەكات، بۆ؟ چونكە سووتەمەنی بە گشتی لە ئاست دەستكەوت و داهاتی خەڵكدا نییە و پاڵاوگە نایاساییەكانیش بە ئارەزووی خۆیان نرخ بۆ سووتەمەنی دادەنێن. (ئەمەش لە بەرژەوەندیی چینی هەژاردا نەبووە و نابێت).
بیریشمان نەچێت، پێویستە جڵەوكردن، سڕكردن و لێكۆڵینەوە لە بازرگانانی داودەرمان، كە كەرتی تەندروستییان زۆر پاشەكشێ پێ كردووە، بخرێتە بەرنامەی كاری كابینەی نۆیەمەوە، چونكە ئاگایانە و بە هاوردەكردنی دەرمانی ساختە و ئێكسپایەر، ژیانی خەڵكیان خستووەتە مەترسیی جیددییەوە.
لەبارەی ماددەی هۆشبەر و لێكەوتەكانیشی، حكوومەتی نوێ دەتوانێ هەم لێپێچینەوەی وردتر بكات و هەم دەرفەت نەدات چیدی گەنجان و لاوانی ئەم وڵاتە ژیانی خۆیان، هی دەوروبەریان، تەنانەت داهاتووی خۆیان و ئەوانی دیكەش بخەنە مەترسییەوە.
دواجار ئەگەر بڕیار وایە لەو كابینەیەدا كەسی شیاو بۆ شوێنی شایستە دابنێن، سڵ لە هیچ شتێك مەكەنەوە و دەستبەكار بن، چونكە خەڵك پشتگیریتان دەكات.
