دونیا سارە، بەفرەکا باش یا باریە، خانیکێ من ژ توتیایێ و چەند بلوکێن جەمدینە، ل پەرێ باژاری من یێ کریێ کرتی. ئەز یێ ب هیڤیا کەهرەبا عام ڤە، دوو سەعەتا یا هەی و بیست و دوو سەعەتا نیەنە. ژمن نایێت کەهرەبا موەلیدیێ بو خوە دابین کەم، چونکە پارێت ئەمپێرەکێ یێ بونە گەلەک. ئاڤا مەژی روژەکێ یاهەیە و چارا نینە، ئەز خودانێ خوە و چەند زاروکانم، سپێدێ هەتا ئێڤاری کارەکێ کێم موچە دکم و ب دینا هەتا ئەز خوە دگەهینم سەرێ هەیڤێ یان نە. گازا سپی هەتا نوکە هێش نەهاتیە بەلاڤکرن ئەگەر هاتو هات بەلاڤکرن ژی، ئەز د ویێ باوەرێ دامە وەسا ب ساناهی ناگەهتە من، چونکە گەندەلیێ یا دایە ب لێڤارا. من سوپەکا دارا ژ خوەرا یا دروستکری بەلێ دارێن سوتنێ ژی ین بهابوین. ژ ئێڤاری هەتا سپێدێ زاروکێن من خوە دکن قورمک ژ سارما دا، چ لهێفێن وەساژی نین ب واندا بکین، هەر شەڤ ژ جڤاتا مە رەقا رەقا ددانا بلند دبە. جلكێن زاروکا ژی بەرگێ سارما ئەڤ سالە ناگرن، پێلاڤێن وان درهاینە ژمن ناێت پێلاڤ و جلکێن زڤستانێ بو وان بکرم. سەرڤێ هەمێ را ژی الحمد واللە. ئەڤە ژی بومە بمینت ئەم سوپاسداریێ خودێ نە.
هەر شورەشەکا هاتیە گێران لسەر ملێ هەژاری بویە، لەوما ژی ئەم هەژار پتر خوە دنە بەر بارێ پاراستنا ڤی وەلاتی. خێر و سەرکفتنێ ژێرا دخازین. لێ مخابن دەما دەستکەفتی ب دەستڤەتێن، بازرگانێن شورەشا خەبات و خوهدانا ڤی مللەتی دنە ب پلە و پارا، پرانیا وان ژی هەر ئەو بون د دەمەکێ نەدورر دا تەهلاتیا هەژاریێ یا تام کری، لێ زیکا مخابن یا خوە ژبیرکری و زنگینیێ سەرپێهاتێن وان پێش چاڤا وان یا وەندا کری، راستە کورد دبێژن خودانێ زکێ تێر هاش یێ برسی نینە. ژ بو روژەکا هوسا کو ئەم هەبونا خوە ب پارێزن و خوەش گوزاریا بو مللەتێ خوە دابین بکن و وەلاتێ خوە ئەم ئاڤەدانبکن د هەمی واران دا، مخابن مە بەریکانا خرڤەکرنا دراڤی یا دەستپێکری. لڤێرێ ژی تەخا مە هەژارا یا هاتیە ژبیرکرن و زیان ڤێکەفتیێ مەزن ئەمین، دەنگێ مە یێ ئاسێبین ل تەیانێن مسمتکری، هاوارا مە یا بریڤە مای ناگەهیت خودانێ ئێتیم هەژارا، ئەوێ ئەم د دبینن باب. ئەڤ سەردەم ێێ وسایە ئەگەر تەنەبت فلسەک تو فلسەکێ ناینێ.
٢٠/٠١/٢٠١٩
