ئەمڕۆ ٣ئازاری ٢٠١٧ جارێکی تر شەڕ لە نێوان میلیشیاکانی پارتی و پەکەکە لە ناوچەی شەنگال لە خانەسور هەڵگیرسا. ئەمە شەڕی براکوژی نیە، بەڵکو شەڕی دوو میلیشیایە لەسەر کۆنترۆڵ و ئیدارەی شەنگال. خەڵکی یەزیدی و شەنگالیەکان کە هێشتا برینی داعشیان ساڕێژنەبوە و لە ناوچەی شەڕی داعشدان ئەمڕۆ بونەتە قوربانی شەڕی ئەم برا ناسیونالیستانە. بەڵام ناسیونالیزمی کورد شەڕەکانیشی بەناوی براکوژیەوە دەکا تا پیرۆزی خۆی لەکەدار نەکا و ناوەرۆکی شەڕەکەیان لە خەڵکی کوردستان بشارنەوە.

پارتی و پەکەکە دوو ‌هێزی چەکداری ناسیونالیستن کە هەرکامەیان هەوڵی سەپاندنی قەڵەمڕەوی دەسەڵاتی دەدا لە شەنگال و لە شوێنەکانی تری کوردستان و هەرکامەشیان لە میحوەرێکی دوو قوتبی تورکیا و ئێراندا لەناوچەکەدا ڕاوەستاون. بارزانی لەگەڵ تورکیادا برایە و پەکەکەش لەگەڵ ئێراندا دۆستە. ئەمە دابەشبونی خانەوادەی ناسیونالیستی کوردە کە لە مێژووی نزیک و دووری یەک سەدەیدا هەمیشە شەڕی براکوژی بەشێکی جیانەکراوەی بوە و هەرکامەیان بونەتە پردی پەڕینەوەی دەوڵەتێکی سەرکوتگەری ناوچەکە.

پارتی کە کۆنترۆلی دەسەڵاتی لە هەرێمی کوردستاندا کردوە و لە بەشەکانی تری کوردستانیشدا هێز و حزبی لە دەوری خۆی کۆکردۆتەوە و دەیەوێ وەک هێزێک لە عێراق و سوریا کە هاوسەنگی و سنورەکان ناجێگیرە بە پشتیوانی تورکیا و سعودیە وەک دەسەڵات وهێزێکی ناوچەیی خۆی بسەپێنێ. هەرچی پەکەکەشە بە جێگیربونی دەسەڵاتی لە کانتۆنەکانی ڕۆژئاوا لە سوریادا و بە پشت بەستن بە هێزی میلیشیایی لە کوردستانی عێراق دەیەوێ، وەک هێزێکی ناوچەیی و دژ بە تورکیا و ناچارکردنی بە دانوستان لەگەڵیدا، دەوربگێڕێ. هەربۆیە شەنگال یەکەم شوێنی شەڕ و ئاخر شوێنی شەڕی براکوژیەکەیان نابێ .

بەڵام پارتی و پەکەکە برای کەس نین لە کوردستاندا بەڵکو ئەوان برای دەسەڵاتدارێتی حزبەکانیانن. ئیدارەی پارتی و یەکێتی دوژمنی نان و ئازادی خەڵکی کوردستانن لە عێراق و ئیدارەی پەکەکەش لە ناوچەی میدیا و لەڕۆژئاوا نەیاری هەر کەس و لایەنێکن کە ملکەچی فەرمانی ئەوان نەبن.

ئەم میلیشیا ناسیونالیستانەی کورد ستراتیژی دامەزراندنی دەوڵەتی سەربەخۆی کوردستانیان نیە تاوەک برا ڕیک بکەون لەسەر حوکمەتکردن بەسەر خەڵکی کوردستاندا، هەربۆیە شەڕی براکوژی لەسەر دابەشکردنی ناوچەکە و پارچەکانی کوردستان ئاکامێکی ئیدارەی میلیشیاییانە لە کوردستاندا. شکستی کۆنگرەی نەتەوەیی یەکەیان و دابەش بونیان بەسەر بەرەکانی تورکیا و ئێراندا بەڵگەی ئەم ڕاستیەن.

خەڵکی کوردستان پێویستە دژی ئەم شەڕەی پارتی و پەکەکە بێت و داوای پاراستنی ژیان و گیانی خەڵکی خانەسورو شەنگال و ناوچەکانی شەنگال بکات.

http://www.  asokamal.  com/index/?p=1225

ASO KAMAL

00447760131203

asokamal@yahoo.  com