بۆ بۆنی هه‌ناسه‌ی سروشتێ له به‌هار جوانتر باران
نازانم له كوێی جوانی چه‌پكێ گوڵه نێرگزێكه‌وه بۆنی چریكه‌كانی ئه‌وین به سه‌ر باڵی په‌روانه‌یه‌ك به‌ر له سووتانی بۆ كه‌ناری سه‌مای ئه‌و گوڵه وه‌ریوه بنێرم كه سه‌راپا شاڕێیه‌كانی به غوباری زه‌ردی جه‌سته مردووه‌كانی گه‌ڵا ته‌نراون، له‌وێوه دڵێكی هه‌میشه هۆگر و ئولفه‌ت به جوانی روخسارت هه‌ڵزناو، له مه‌ركانه‌یه‌كی سه‌رشانی ڕێ زنه‌ی نیشتیمانی كڕبوه ده‌چێ، تا به ئاقاری رووباره‌كانی په‌ڵه هه‌ورا وه‌ك شۆڕه‌بییه‌ك به كراسی دڵتا هه‌ڵواسراوه له باخچه جوان و پڕ نهێنییه‌كانی دڵم نه‌بێ له هیج شتێكی دی ناچێ.
تۆیش له سه‌ره ڕێی شه‌قامتا پێ به دڵما بنێ با له‌و كۆزه بجی كه ئه‌مجاره له كانی به ساغی نایه‌ته‌وه، ئه‌و ده‌مانه لاشه‌ی ئه‌وین پێكه‌وه له دارێكی تابووتی ده‌نێین و به سه‌ر شانمانه‌وه غلۆری دوا ئارامگای ده‌كه‌ین وه‌ك خۆمان ده‌یكه‌ینه‌وه به خۆڵ.
تۆ له كوێوه بووشی زه‌نگی ئه‌و هه‌سته‌ت په‌ی پێ برد و قامكه هه‌میشه پڕ هه‌نگوینییه‌كه‌ی دۆشاومژه‌ت پێوه لكان و تا نووزه‌ی دوا دابڕانی نه‌زانی په‌نجه‌ت هه‌ڵنه‌بڕی و خۆت به ده‌ستی مه‌یله‌كانمه‌وه نه‌دا و كۆڵت نه‌دا، ئه‌و ده‌مانه‌ی ده‌رگای ئه‌وینی دڵم كرایه‌وه، ئیتر حه‌زره‌تی ئیشق جاویدانی خۆی ده‌نووسییه‌وه، تۆیش نه‌خوێنه‌وار و نابینایه‌كی ده‌روازه‌كه‌ی رابوونی ئه‌و كۆسته‌ی بووی و به‌رۆكمی ده‌گرت و داخورپه‌كانی به قه‌د باڵای دارخورمایا هه‌ڵده‌گژا تا نزاكانی به خوا بگه‌یه‌نێ.
به‌زه‌ییه‌كان ئولفه‌تیان له گه‌ڵ دابڕان گرتووه، ئه‌و دابڕانه‌ی ڕێی له بۆن و به‌رامه‌ی ماچه‌كانی به‌رایی به‌ر ده‌رگای باڵات ده‌گرێ و مه‌ست مه‌ستی چاوه‌كانت بووه، ده‌یزانی خانمی سه‌روبه‌ستی كورده‌واری وا به سانایی نابیته قۆڵبه‌ند و بازوبه‌ندێكی ترازاو ده‌بێ، فوو له‌و چراتۆڕه ده‌كا كه رۆحی به‌ر ته‌داره‌كی ساته شیرینییه‌كانی ده‌بێ، تاڵان به ماڵم كه هێشتا زمانی ئه‌وین گڕوگاڵی نه‌كردووه‌و به وه‌یشوومه‌ی غه‌دری ده‌زانی، به ئافاتی خیانه‌تێ وه‌ك گواره‌یه‌ك قوڵفگیری هه‌لته‌كێنێ و ئیدی جوانی ئه‌تك بكا، رۆحم به سه‌ر باڵی په‌روانه‌یه‌كدا له ده‌م روناهی و گه‌رمی و پڕ گڕه‌كه‌ی چرای ئیشق بسوتێم و ئه‌و دیو ره‌ژوو بگرم، له خوا بپرسه ژانه‌كانم چه‌ن به سوێن.
بشێ به هه‌ق ئه‌و بارانه بیت لوتفه‌كانت له زیندانی مكووڕ بوونتا یاخی بێت و به سه‌ر جه‌سته‌ی گڕاویما ببارێ و نه‌مگه‌یه‌نیته سوتوو بوون، با ببمه هه‌توانی پڕپۆڵه‌یه‌ك بۆ قه‌تماغه‌ی زامه‌كانت نه‌با ئازارت پێ بگا ده‌سا توووخوا لێمگه‌ڕێ با بسووتێم، بیرم بكه‌و سا بفڕه و له ئامێزی ئاوه‌ڵاما بنوو، بنوو با ئه‌وین جێمان بۆ راخا و ئیشقیش باوه‌شێنمان بكا.
ئیدی له نێو نزاكانما بنوو خوا ده‌تپارێزێ
سه‌ردار جاف
لیمبۆرگ: 14 / 4 / 2017
