هەر کەس و دەستە و گرووپێکی ساسی پێیوابێ لە رۆژهەڵاتی ناوەڕاست و بە تایبەت لەناو کەلتوورە هەمەجی و بەربەریەکەی عەرەبیدا, پێش سەربەخۆیی و دەوڵەتی نەتەوەیی دێوەزمەی کوشتوبڕ و خواستی سەرشێتانەی دیکتاتۆری یەخەی بەردەدا و لە ژینگەی دیموکراسیدا دەرفەتی پێکەوەژیانی بۆ دەڕەخسێ و لەناو پێخەفی ئازادیدا سەرخەوێکی دوور لە ترس و هەڕەشە هەڵدەکێشێ, ئەوا یان گەوجێنراوە, یان خۆی فرشتووە, جا ئەگەر گەوجێنرابێ رۆژێک هەر بە ئاگا دێتەوە, بەڵام ئەگەر خۆی فرۆشتبێ ئەوا هەتا مردن خووی خۆفرۆشی بەرینادا و لە بازاڕ کزیشدا خۆی بە دوای کڕیاردا دەگەڕێ. ئاخر دوێنێ لەسەر داوای ژیان و هاواری پاراستنی ناسنامەی نەتەوەیی ئەنفال کراین و گازی خەردەل و سیانید تێکەڵ بە هاوار و داوای سادەترین مافمان کرا, ئەمڕۆش لەسەر هەمان داوا و رەتکردنەوەى ستەم و چەوسانەوەی دوێنێمان بەرگی پرتەقاڵیمان بە بەردا کرا و بە کۆڵانەکانی عرووبەدا سووڕێنراینەوە و بە ئەقڵی کۆنی عەرەبی و فتوای خەلیفەی عرووبە سەربڕدراین و سووتێنراین, قەیس خەز عەلی و نوری مالیکی و حەنان فەتلاویش بە نوێنەرایەتی فتوای (مەرجەع)ی شیعە و زاڵکردنەوەى بیری شۆڤێنیزم و برەودانەوە بە ئەقڵی کۆنی عەرەبی هەڕەشە لە سبەینێمان دەکەن, ئەوانیش وەک سەددام حوسێن باڵادەستی خۆیان و ژێردەستەیی ئێمە و کیمیاباران و ئەنفال کردنمان بە رەوا دەزانن و داوای سەربەخۆیی و خۆپاراستمان لە کیمیاباران و رازی نەبوونەوەمان بە ئەنفال بە تاوان دەزانن. جا ئەگەر ئەوە مێژووی دوێنێ و خۆزگەی ئێستا و چاوەڕوانی سبەینێمان بێ! دەکرێ کوردێک یان دەستە و گرووپێکی بەناو کوردی, دوێنێی تاڵ نەبینێ و هەڵوەستە لەسەر هەڕەشەکانی ئەمڕۆ نەکا و لە خەمی سبەینێی نادیاریشدا نەبێ و داوای گەڕانەوە بۆ بەغدایەک بکات, کە قەیس و نوری و حەنان تێیدا حاکم بن و لەسەر جیاوازی بیروڕای سیاسی و مەزهەبی جیاواز هاوشێوەی سەددام حوسێن خوازیاری دووبارە ئەنفال کردنەوەمان بن, بە هەموو پێوەرە سیاسی و مێژووییەکان هەقە گومانی رێککەوتنی ژێربەژێری لێبکرێ و لە خۆفرۆشیشی دڵنیا بین. ئایا کەسێک خۆی و گرووپەکەی هەڵگری بیری ئیسلامی سیاسی توندڕەو بێ و پێشینەیەکی تیرۆریستیشی هەبێ, چۆن لە رووی دێ باس لە دیموکراسی و جیاوازی سیاسی و ئازادی بیروڕا بکات؟! کەچی وەک ئەوەی کەس نەی ناسێ و بۆ داپۆشینی هزر و بیری توندڕەوی و شاردنەوەى پێشینەی تیرۆریستی و دیزە بە دەرخۆنە کردنی ریککەوتنە شاراوەکەى لەگەڵ داگیرکارانی کوردستان و دوژمنانی کورد, پێش سەربەخۆیی و دامەزراندنی دەوڵەتی نەتەوەیی داوای دیموکراسی و ئازادی بیروڕا و مافی مرۆڤ دەکات! ئایا ئەوەی ئەوانە دەیکەن جێبەجێ کردنی فەرمانە دەرەکیەکان و بیانوو گرتن نییە بە خواستی سەربەخۆیی و هەنگاوەکانی دەمەزراندنی دەوڵەتی نەتەوەیی؟! ئەوە لە کاتێکدایە ئەو کەس و دەستە و گرووپانەی حەسرەت بۆ باوەشی بەغدای قەیس و نوری و حەنان هەڵدەکێشن, لە کوردستان گاز دەگرن و بۆ دیموکراسییەکی هاوشێوەی بەغداش دەگرین و هاوار و بانگەشەی فراوان بوونی پانتایی دیموکراسی بۆ دەکەن, لە کوردستان هەڵدەکوتنە سەر بارەگای حزبە هاوزمان و هاوچارەنووسەکانیان و لە بەغداش هەڵدەکوترێتە سەریان و سوکایەتیان پێدەکەن, لەگەڵ ئەوەشدا هەرای ئەوە دەکەن گوایە کوردستان نائارامە و بەغدا سەقامگیر و قەیس و نوری و حەنان ئارامی سیاسی و دینی و نەتەوەییان بۆ دەستەبەر کردووە. یان ئەوانەی خۆیان بە پێشەنگی دیموکراسی دەزانن و بۆ مەبەستی تایبەتی لە کوردستان بیانوو بە نەبوونی دیموکراسی دەگرن, رۆژانە زمانی تیرۆریستیان لەناو زێراب و ئاوەڕۆی بیری توندڕەوی سیاسی دەگێڕن و لاپەڕەی کەلتووری توندوتیژیش هەڵدەدەنەوە, بێ سانسۆر جنێو دەبەشنەوە و تۆمەت بۆ نەیارەکانیان هەڵدەبەستن و باس لە بێدەنگ کردنی دەنگە ئازادەکانیش دەکەن! پێویستە ئەوانە بێنەوە هۆش و واز لە سیاسەتی چەواشەکاری بێنن, چونکە سەربەخۆیی و دەوڵەتی نەتەوەیی لە پێش ئەو دیموکراسییەن کە ئەو کەس و دەستە و گرووپانە بەرگی بەرەڵاییان بە بەردا کردووە, بۆیە لێیان دەپرسم: چۆن و کەی و لە کوێ لەژێر چاودێری داگیرکاران و دوژمناندا دیموکراسی و ئازادی بیروڕا بەدەست هێنراوە؟ جا ئەگەر ئەو کەس و دەستە و گرووپانە پێیانوابێ بە گەڕانەوە بۆ ژێر فەرمانی قەیس و نوری و حەنان دەتوانن دیموکراسی و ئازادی بیروڕا دەستەبەر بکەن, ئەوا دەکەونە هەڵەیەکی گەورەوە, خۆ ئەگەر پێشیان وابێ قەیس و نوری و حەنان فریشتەی دیموکراسین و دیموکراسییان بۆ دەستەبەر دەکەن, ئەوا دەکەونە خەتا و خیانەتی نەتەوەیی و نیشتیمانییەوە.
