مەنووچێهر جیهانی ـ "عەلیڕەزا تابێش" به‌رپرسی سی‌ودووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران، به‌رنامه نوێیه‌کانی به‌شی نێونه‌ته‌وه‌یی ئه‌م خوله‌ی فیستیڤاڵی شیکرده‌وه.
"عەلیڕەزا تابێش" ده‌بیر و به‌رپرسی سی‌ودووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران، سه‌باره‌ت به‌و بڕیاره تازانه‌ی که گیراوه‌ته به‌ر بۆ پێکهێنانی بازاڕی پسپۆڕانه‌ی نێونه‌ته‌وه‌یی فیلمه‌کانی منداڵان له به‌شی لاوه‌کی ئه‌م فیستیڤاڵه‌دا گوتی: سی‌ودووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران ئه‌مساڵ له ئیسفه‌هان، له بارودۆخێکدا به‌رنامه‌ی بۆ داده‌ڕێژرێت و به‌ڕێوه‌ده‌چێت که هه‌وڵی هاوکارانی ئێمه له به‌شی نێونه‌ته‌وه‌یی فیستیڤاڵ له‌سه‌ر ئه‌وه بووه که بۆ یه‌که‌مین جار، کتێبخانه‌یه‌کی ڤیدیۆیی Video library له هه‌ڵبژارده‌ی فیلمه دیار و به‌رچاوه‌کانی سینه‌مای منداڵ و مێرمنداڵی ئێران له دوای شۆڕش ئاماده‌کاری بۆ بکه‌ن و بیهێننه به‌رهه‌م. له ماوه‌ی مانگه‌کانی رابردوودا، له دوای دیاریکردنی من وه‌کوو ده‌بیر و به‌رپرسی فیستیڤاڵ، له زومره‌ی یه‌که‌مین به‌رنامه‌گه‌لێک بوو که هاوکارانی ئێمه هه‌وڵیان بۆ دا و به پاڵپشتیی ئه‌وان ئه‌م کتێبخانه ڤیدیۆییه‌یان ساز داوه.
هه‌نگاوی ده‌ستپێک چوونی سینه‌مای منداڵان و مێرمنداڵانی ئێران بۆ بازاڕه‌کانی جیهانی و ناوچه‌یه
هه‌روه‌ها ئه‌وه‌شی روونکرده‌وه: له‌م ماوه‌یه‌دا زیاتر له دووسه‌د فیلمی منداڵان و مێرمنداڵانی سینه‌مای ئێران به ژێرنووسی ئینگلیزی له‌گه‌ڵ که‌رسته‌ی بانگه‌شه‌ی فیلمه‌کان وه‌کوو تیزێر، پۆسته‌ر و زانیارییه ته‌کنیکییه‌کانی په‌یوه‌ندیدار به فیلمه‌که پێکهاتوو له به‌رهه‌مهێنه‌ر، ده‌رهێنه‌ر، بڵاوکه‌ره‌وه و ستافی ئاماده‌کار و به‌رهه‌مهینه‌ر کۆوه‌مان کردۆته‌وه و له رۆژانی به‌ڕێوه‌چوونی فیستیڤاڵی فیلمی منداڵان و مێرمنداڵان له ئیسفه‌هان جێگیر ده‌بێت، بۆ ئه‌وه‌ی که میوانانی بیانیی فیستیڤاڵ که له چینه جۆربه‌جۆره‌کان و له وڵاتانی جۆراوجۆره به‌شداری تێدا ده‌که‌ن، بتوانن به گه‌ڕان و بینینی فیلمه‌کان، ئه‌و به‌رهه‌مانه‌ی که له‌به‌ر چاویان گرتووه، هه‌ڵیبژێرن.
تابێش هه‌روه‌ها ئه‌وه‌شی راگه‌یاند: هه‌ر به‌م مه‌به‌سته له کڕیاره‌کانی فیلم به تایبه‌ت له
کڕیاره‌کانی ناوچه‌یی بانگهێشتمان کردووه که بۆ ئیسفه‌هان سه‌فه‌ر بکه‌ن و سه‌ردانی ئه‌م به‌شه‌ی فیستیڤاڵه‌که بکه‌ن. ئه‌م به‌رهه‌مانه به ژێرنووسی ئینگلیزی و به هاوڕێیه‌تی ستاندارده‌کانی ئاراسته کردنی نێونه‌ته‌وه‌یی ئاماده کراوه و دیزانی بۆ ئه‌نجام دراوه. هیوا ده‌خوازم که ئه‌مه هه‌نگاوێکی ده‌ستپێک بێت بۆ ئه‌وه‌ی که بتوانین به‌رهه‌مه‌کانی سینه‌مای منداڵان و مێرمنداڵانی ئێران به مشته‌رییه‌کانی بیانی ئاراسته بکه‌ین و فیستیڤاڵی ئیسفه‌هان به کڕیاره بیانییه‌کانه‌وه په‌یوه‌ند بدات.
ئه‌وه‌شی روونکرده‌وه: ئێمه به ئه‌نقه‌ست به‌رهه‌مه‌کانی تایبه‌ت به‌و ده ساڵه‌ی دوایی سینه‌مای منداڵ و مێرمنداڵمان له کتیبخانه‌ی ڤیدیۆیی فیستیڤاڵ ئاراسته کردووه، ئه‌گه‌رچی له ده‌رهێنه‌ره ناوداره‌کانی وه‌کوو "عه‌باس کیارۆسته‌می" و "مه‌جید مه‌جیدی" و چه‌ندانی دیکه که به چه‌شنێک بره‌ندی سینه‌مای ئێمه‌ن و سینه‌مای منداڵان و مێرمنداڵانی ئێرانیان به جیهان ناساندووه، کۆی گشتی به‌رهه‌مه‌کانیان ئاراسته ده‌کرێت.
به‌رنامه‌گه‌لی هاوته‌ریب له‌گه‌ڵ گۆڕانکارییه‌کانی به‌رده‌نگی منداڵ و مێرمنداڵ
ده‌بیر و به‌رپرسی سی‌ودووهه‌مین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران رایگه‌یاند: له به‌شی نێونه‌ته‌وه‌یی فیستیڤاڵ، کارگه‌لێکی دیکه‌ش کراوه که باشه ئاماژه‌یان بۆ بکه‌ین. فیستیڤاڵی ئه‌مساڵ هه‌وڵ ده‌دات بۆ ئه‌وه‌ی که هاوته‌ریب له‌گه‌ڵ گۆڕانکارییه‌کانی نه‌وه‌ی نوێی به‌رده‌نگه‌کانی ئه‌م جۆره له سینه‌مای ئێرانی، داڕێژه‌گه‌لێکی جۆربه‌جۆر و تازه له‌م به‌شه‌دا به‌رنامه‌ی بۆ داڕێژێت. ئه‌و نه‌وه‌یه‌ی که به جۆرێک ژیانی له سه‌رده‌می پاش دیجیتاڵ دایه و به سه‌رجه‌م جۆره‌کانی ئه‌پڵیکه‌یشێن و سه‌رقاڵییه‌کانی جۆراوجۆری ئینته‌ربێتی و دیجیتاڵ رۆژ ده‌کاته‌وه و ده‌ست پێڕاگه‌یشتنێکی زۆری به جۆره‌کانی به‌رهه‌م گه‌لی بینراو، وێنه‌یی و سه‌رخاقڵاندن هه‌یه.
ئه‌وه‌شی خسته‌ڕوو: له‌م لایه‌نه‌وه، ئێمه ده‌بێ هه‌نگاوێکی نوێ به‌ره‌و جیهانی داهێنه‌ری منداڵ و مێرمنداڵ هه‌ڵێنینه‌وه؛ به‌م پێیه زنجیره به‌رنامه‌گه‌لێک له به‌شی نه‌ته‌وه‌یی و نێونه‌ته‌وه‌یی فیستیڤاڵدا ئاماده کراوه و ته‌داره‌ک بینراوه که چاوه‌ری به‌ڕێوه‌چوونی ئه‌وان له ئیسفه‌هان ده‌بین. بۆ وێنه په‌نێلی شرۆڤه و لێکدانه‌وه‌ی به‌رهه‌مهێنانی هاوبه‌شی فیلمی منداڵان به ئاماده‌بوونی نوێنه‌رانی سینه‌مای شه‌ش وڵاتی جیهان به‌ڕێوه‌ده‌چێت.
تابێش له درێژه‌ی قسه‌کانیدا گوتی: به‌ڕێوه‌چوونی حه‌وت لێدوان و ئاخاوتن و کارگه و وۆرکشۆپی فێرکاری به بابه‌ته‌کانی ره‌خنه‌ی فیلم بۆ منداڵان، لێکدانه‌وه‌ی سینه‌مای منداڵانی ئێران له سه‌رده‌می هاچه‌رخدا، سینه‌مای راسته‌قینه‌ی مه‌جازی له سه‌رده‌می نوێدا، رێکاره‌کانی چێکردنی کورته ئه‌نیمه‌یشێنی کارتۆنی، شێوازه‌کانی ئاراسته‌کردنی فیلمی منداڵان له بازاڕه‌کانی جیهانی، سه‌وادی فیلم بۆ منداڵان و بنه‌ما و پێوه‌ره‌کانی گێڕانه‌ویی سینه‌مای منداڵان له به‌رنامه‌کانی دیکه‌ی فیستیڤاڵه.
شاره ده‌سته‌خوشکه‌کان دێن بۆ ئیسفه‌هان
تابێش ئه‌وه‌شی راگه‌یاند: هه‌روه‌ها له‌به‌ر ئه‌وه‌ی که شاری مێژوویی و جوانی ئیسفه‌هان میوانداری فیستیڤاڵه، میوانانێکمان له دامه‌زراوه‌کان و کۆمپانیاکانی حه‌وت شاری ده‌سته‌خوشکی ئیسفه‌هان بانگهێشت کردووه. هه‌ر به‌م پێیه به ته‌وه‌ریی ئیسفه‌هان و ئه‌و شارانه، بۆ دابین کردنی لێک تێگه‌یشتن و هاوکاری هاوبه‌ش بۆ خوله جۆراوجۆره‌کانی فیستیڤاڵ و به ئامانجی به‌هێزکردنی سینه‌مای منداڵان و مێرمنداڵان له نێوان ئێران و ئه‌و وڵاتانه‌دا، به‌رنامه‌داڕشتنمان بۆ کردووه.
واژۆکردنی رێککه‌وتننامه‌ی ئۆراسیایی بۆ پشتگیریی له به‌رهه‌می هاوبه‌ش
ده‌بیر و به‌رپرسی سی‌ودووهه‌مین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران رایگه‌یاند: هه‌روه‌ها به‌شێکمان هه‌یه به ناونیشانی نمایش کردنی تایبه‌ت که به هاوکاری فیستیڤاڵه‌کانی ئه‌نسی له فه‌ره‌نسا، تاتارستان له رووسیا، تێفلیس له گورجستان و کۆپێنهاگ له دانیمارک به‌ڕێوه‌ده‌چێت. له هه‌مان کاتیشدا رێککه‌وتننامه‌یه‌کی لێکتێگه‌یشتن له‌گه‌ڵ ئه‌نجومه‌نی فیستیڤاڵی فیلمی ئۆراسیایی له‌گه‌ڵ وڵاتانی رووسیا و کۆریای باشوور به مه‌به‌ستی پشتگیری کردن له به‌رهه‌می هاوبه‌شی فیلمه‌کانی منداڵان و مێرمنداڵان بۆ دوو ساڵی داهاتوو واژۆ ده‌کرێت. ئه‌م رێککه‌وتننامه سێ لایه‌نه‌یه ده‌ره‌ئه‌نجامی چه‌ندین مانگ دانوستاندنی هاوکارانی ئێمه‌یه که به‌خته‌وه‌رانه له رۆژانی به‌ڕێوه‌چوونی فیستیڤاڵدا ده‌گاته ئه‌نجام.
هه‌وڵدان بۆ ئاماده‌بوونی پڕره‌نگی راگه‌یاندنه‌کانی نێونه‌ته‌وه‌یی
"عەلیڕەزا تابێش" گوتی: له هه‌وڵی ئه‌وه‌داین بۆ ئه‌وه‌ی که ده‌زگاکانی راگه‌یاندنی نێونه‌ته‌وه‌یی، به تایبه‌ت راگه‌یاندنه‌کانی ناوچه، بۆ به‌شداری له‌م فیستیڤاڵه بانگهێشت بکه‌ین، له‌به‌ر ئه‌وه‌ی که ئه‌م رووداوه نێونه‌ته‌وه‌ییه که له ئیسفه‌هان به‌ڕێوه‌ده‌چێت، هێمایه‌کی گرینگه له دیپلۆماسی گشتی و دیپلۆماسی فه‌رهه‌نگی له وڵاتی ئێمه. رێژه‌یه‌کی زۆری هێرش و هه‌ڕه‌شه‌کان له دژی وڵاتی ئێمه بوونی هه‌یه، به‌ڵام ئه‌م رووداوه گه‌وره و گرینگه هونه‌رییه به بابه‌تی منداڵان و مێرمنداڵان که بۆ خۆی نیشانه‌یه‌که له ئاشتی، دیالۆگ و گفتوگۆ و مافی ره‌وا و ئاشته‌وایی خه‌ڵکی ئێران، به ئاماده‌بوونی کاریگه‌ری ده‌زگاکانی راگه‌یاندنی نێونه‌ته‌وه‌یی له ئیسفه‌هان ده‌نگدانه‌وه‌یه‌کی زیاتری ده‌بێت.
هه‌روه‌ها به ده‌ربڕینی ئه‌وه‌ی که ناونووسییه‌کان ئه‌نجام دراوه و بانگهێشتنامه‌کان خه‌ریکه جێبه‌جێ ده‌کرێت، گوتی: هیوا ده‌خوازم که ده‌زگاکانی راگه‌یاندنێکی زیاتر به نیسبه‌ت ساڵه‌کانی رابردوو بتوانن له‌م فیستیڤاڵه‌دا ئاماده‌بن و ئێمه‌ش به دوای دابین کردنی بارودۆخی شیاوین، بۆ ئه‌وه‌ی که راگه‌یاندنه‌کانی نێونه‌ته‌وه‌یی و به تایبه‌ت راگه‌یاندنه‌کانی ناوچه، ده‌نگی جیاوازی ئه‌م فیستیڤاڵه فه‌رهه‌نگی و هونه‌رییه به جیهان رابگه‌یه‌نن و بۆ هه‌مووانی بگوازنه‌وه.
سی‌ودووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران ICFF بە بەرپرسیاریی "عەلیڕەزا تابێش" له به‌شه‌کانی فیلمی درێژی چیرۆکی، کورته فیلمه‌کانی چیرۆکی، وێب سێری، فیلمه‌کانی ئه‌نیمه‌یشێنی درێژ و کورته فیلمه‌کانی ئه‌نیمه‌یشێن لە رۆژانی 28ی گه‌لاوێژ تا 4ی خه‌رمانانی 1398ی هه‌تاوی رێکه‌وتی 19 تا 26ی ئۆگۆستی 2019ی زایینی له دوو به‌شی "نه‌ته‌وه‌یی" و "نێونه‌ته‌وه‌یی"دا لە شاری مێژوویی ئیسفەهان لە وڵاتی ئێران بەڕێوەدەچێت.
