ئەوە ناوی ڕێکخراوێکە. گومانم نیە کاری زۆر چاك دەکەن و لە کەسانی زۆر دڵسۆز پێكهاتووە. من هیچ دەربارەیان نازانم. لێرەدا تەنیا لە ڕووی زمانەوە لە ناوی ڕێکخراوەکە دەڕوانم.
ئەم ڕێکخراوە وەك بە ناوەکەیدا دیارە دوو کاری هەیە:
- لێکۆڵینەوە دەکات. هەڵبەت دیار نیە لە چ بابەتێکدا، چونکە لە ناوی ڕێکخراوەکەدا "لێکۆڵینەوە" نەبەستراوە بە "جێندەر"ەوە. ناکرێ بگوترێ کار لەسەر جێندەر دەکات.
- کاریکی دیکەی پێدەچێ تایبەتمەند بێ لە "زانیارییەکانی جێندەر". دیارە "زانیارییەکان" دروست نیە، بەڵکو "زانیاری جێندەر" ڕاسترە. هیچ پێویست ناکات "زانیاری" بە کۆ بەکاربێ، تاکە. سەرباری ئەوەش هەر دیار نیە چ کارەیە. "زانیاری جێندەر" چیە؟ کۆی دەکاتەوە! پڕۆسەی دەکات! لەنێوی دەبات! تد. . .
ئێستا پێدەچێ ئەم ڕێکخراوە ناوەکەی بەمجۆرە بێ:
ڕێکخراوی لێکۆڵینەوە و زانیاری جێندەر
کە "و" بەکارهات دەبێ هەردوولای هاوتابێ:
- بەشی یەکەم: ڕێکخراوی لێکۆڵینەوەی جێندەر - مانابەخشە، بەڵام ئەو مانایە نابەخشێ، کە مەبەستە. ئەمان لە خودی "جێندەر" ناکۆڵنەوە، بەڵکو "لەسەر جێندەر" کار دەکەن.
- بەشی دووەم: ڕێکخراوی زانیاری جێندەر - بێ مانایە، چونکە زانیاری وەك لێکۆڵینەوە فرمان نیە، ناوە، بۆیە دوولای ئەم "و"ە، تەبا نین. دەکرێ ئەملای هاوکێشەکە وا بگوترێ:
- ڕێکخراوی کۆکردنەوەی زانیاری لەسەر جێندەر - مانابەخشە.
ڕەنگە مەبەستیان یەکێ لەمانە بێ:
- ڕێکخراوی لێکۆڵینەوە و کۆکردنەوەی زانیاری لەسەر جێندەر
یان
- ڕێکخراوی کۆکردنەوەی زانیاری و لێکۆڵینەوە لەسەر جێندەر
هیوادارم هاوکار بێ.
