لە چەند ڕۆژی ڕابردوودا، بە كۆششی سەرۆكایەتیی هەرێمی كوردستان و سەرۆكایەتیی حكوومەتی هەرێمی كوردستان، گفتوگۆ و دیالۆگێكی بەرهەمدار لە نێوان هەولێر و بەغدادا هاتووەتە كایەوە، كە زادەكەی، لێكتێگەیشتن و رێككەوتنێكی كاتییە لەسەر ناردنی بەشەبودجەیەك بۆ هەرێمی كوردستان، كە دەشێ ئەو فۆڕمە لە مامەڵەكردن لەگەڵ بەغدا، بكرێتە پرەنسیپ و شێوازی دانوستان لەگەڵ بڕیاربەدەستانی پایتەختی عێراق.
ئەو گەنگەشەیەی كە لە نێوان هەولێر و بەغدادا پێشتر كراوە و ئێستاش بەردەوامە، بەرهەمدارە، چونكە لێكنزیكبوونەوە لە نێوان هەردوولادا بەدیدەكرێت و ئەمەش جێگای دڵخۆشییە و دەكرێ بۆ داهاتووی پەیوەندییەكانی نێوانیان بقۆزرێتەوە.
بەڵام، هەولێر و بەغدا، كە چەندین ساڵە لە كێشمەكێشی سیاسی، ئابووری، دەستووریدان و لە تێگەیشتن لە داخوازیی دوولایەنەدا پێكناكۆك و ناتەبان، دەریچەیەكیان بە ڕوودا كراوەتەوە و بە لۆژیكی دیپلۆماتی، ئەگەر زیاتر لێك نزیك ببنەوە، پتر دەكارن ئاریشەكانیان چارە بكەن و لاپەڕەیەكی نوێ لە پەیوەندییەكانیان هەڵبدەنەوە.
لاپەڕەی نوێ، بە نیازپاكی، بە ڕوونی لە داهات و شەفافی لە مامەڵەكردندا، هەڵدەدرێتەوە، ئەوەی بۆ هەردوولاش گرنگە، رێككەوتنی كۆنكرێتی بكەن نەك كاتی، چونكە رێككەوتنی كاتی، بەڵێنی زارەكییە و هیچی تر، بەس بەڵێنی كۆنكرێتی، گەرەنتیی جێبەجێكردنی رێككەوتنەكان دەكات.
لەو دەلاقەیەشەوە، پرسێكی دیكەی هەستیار ئەوەیە، ئایا حكوومەتەكەی (سوودانی) ئەزموون لە سەرخان و پاشخان و باكگراوندی سەرۆكوەزیرانەكانی پێش خۆی وەردەگرێت یاخود نا؟
پرسیاری كۆتایی، ئاڕاستەی هەرسێ سەرۆكایەتییەكەی هەرێمی كوردستانە.
