کوردستان - هۆڵەندا +9647707681313 +31619651691 kurdistannet@hotmail.com
Menu
{loadmoduleid ? string:? string:? string:? string:? string:? string:? string:? string:? string:? string:? string:? string:? string:? string:? string:? string:? string: ? ? ? ? ? ? ? ? ? ? ? ? ? ? ? ? ?}

لە فەیسبووکەوە: تاوان دەرهەق بەخۆپشاندەرانی پیرەمەگرون ... نیاز عەبدوڵڵا

Pin It
-ئەو “رێبازەی مام جەلال” و “یەكێتی نوێ” كە لە رێگای دەزگای ئاسایشی یەكێتی و دادوەرە حیزبییەكانییەوە سزای قورترسین تاوانی بەسەر ١٨ گەنجی پیرەمەگروون و ناوچەكانی دیكەدا سەپاند بەبیانووی بەشداریكردن لە خۆپیشاندان و سوتاندنی كتێبخانە ، هەر لە كاتی ئەو خۆپیشاندانانەدا، سەدان خوێندكار لەلایەن مولازم موحسینەكانی ناو دەزگا ئەمنییەكان هێرشیان كرایە سەر و ئەشكەنجەدران، بەڵام دواجار سەرجەم جەللادەكان بە ناوی “داوای لێبوردن”ەوە دەربازیان بوو لە لێپرسینەوە و سزای یاسایی.
-ئەم ١٨ گەنجە بەدبەختەی نیشتیمان، زۆرینەیان تەمەنیان لە ١٨ ساڵ زیاتر نییە; لەبری خوێندن لە ئامادەیی و زانكۆكانی كوردستان، كرێكاری دەكەن. كوڕی بەرپرسەكانیش كە هاوتەمنی ئەم گەنجانەن، خاوەنی زانكۆ و سەدان ملیار دۆلارن، بەڵام بۆ بڵاوكردنەوەی ترس و تۆقاندن و رێگریكردن لە هەر خۆپیشاندانێكی دیكە، ئەم گەنجانە بەبیانووی سوتاندنی كتێب و كتێبخانە وەك گەورە تاوانبار بە پۆشاكی رەنگ پرتەقاڵییەوە نمایش دەكەن و دانە بە دانەیان دەشكێنن، تا هیچ ناڕەزایەتییەكی دیكە بە بەرهەم نەیەت.
-ڤیدیۆ بڵاوكراوەكەی دەزگای ئاسایشی یەكێتی كە سەر بە ئەنجوومەنی ئاسایشی هەرێمە، پێشێلكاری یاسایی گەورەی لە خۆگرتووە.
ئەم گەنجانە وەك خۆپیشاندەر دەستگیركراون، بەڵام لەبری ئەوەی بەپێی یاسایی رێكخستنی خۆپیشاندان لە هەرێمی كوردستان دادگایی بكرێن، بە ماددەی ٣٤٢ی سزادانی عێراقی دادگایی دەكرێن. لە كاتێكدا ماددەی ١٠ی یاسای رێكخستنی خۆپیشاندان سزاكەی بریتییە لە، غەرامەیەك كە بڕەكەی لە ٥٠ هەزار دینار كەمترنییە و لە ٥٠٠ هەزار دیناریش زیاترنییە، سزای بەندكردنیش لە یەك مانگ زیاترنییە. بەپێچەوانەوە پەنابراوەتە بەر ماددەی ٣٤٢ كە قورسترین سزای تێدایە لە، زیندانی تا ١٥ ساڵ یان زیندانی هەتاهەتایی و سزای لە سێدارەدان.
-لە ڤیدیۆ بڵاوكراوەكەی دەزگای ئاسایشی یەكێتیدا هاتووە “لێكۆڵینەوەكان هێشتا لەگەڵ تۆمەتباران بەردەوامە”. ئەمە بۆخۆی پێشێلكردنی مافی تەواوی دەستگیركراوانە كە وەك دیلی جەنگ مامەڵەیان لەگەڵ كراوە لە “دانپێدانانەكاندا”، چونكە بەپێی رێكارە یاساییەكان تۆمەتبار تاوانبار نییە تا ئەوكاتەی لە پرۆسەیەكی دادگاییكردنی دادپەروەردا تاوانەكانی دەسەلمێندرێن.
-گەنجەكان بێ بەشكراون لەوەی بەرگری یاسایی لەخۆیان بكەن، لەكاتی لێكۆڵینەوەكردن لەگەڵیاندا و تائێستاش بێبەشكراون لە پارێزەری یاسایی.
-لە كۆتایی ڤیدیۆكەدا گەنجەكان ناچاردەكرێن بڵێن “ئەشكەنجەنەدراوین و بە خواستی خۆمان قسەدەكەین”. ئەمەش جگە لەوەی سەلماندنە بۆ ئەشكەنجەدان و خۆبێبەری كردن لێی، لەهەمان كاتدا ترس و فشار لە دەنگ و قسەكردنی گەنجەكاندا بەڕوونی دیارە.
-كوڕەكانی تاڵەبانی و دەزگای ئاسایشی هەرێم و دادوەر و ئەو تیمە ئەمنییەی ئەم گەنجانەیان بەم دۆخەگەیاند، بەئارەزوو و چێژەوە كەرامەتی ئەم گەنجانەیان رووشاندووە لەسەر كتێب، لە دۆخێكدا خۆیان و حیزبەكانیان دژی كتێب و نووسەر و رۆژنامەنووسە ئازادیخوازەكانن. دژی ئازادی و سەربەخۆیی تاك و كۆمەڵگا و بیركردنەوەی ئازادیخوازانەیانن، بەهای زانكۆكان و خوێندن و زانستیان لاوازكردوە، رۆژنامەنووس و شاعیریان تیرۆركردووە.
-“یەكێتی نوێ” كە پتر یەكێتییەكی سەرسامە بە پارتی دیموكراتی كوردستان، هەوڵدەدات ئەو جۆرە سزا و سەركوتكارییانەی مەسرور بارزانی و بنەماڵەی بارزانی دەستیان بۆ نەبردووە، لە سنووری دەسەڵاتی حیزبی خۆیان جێبەجێی بكەن. یەكێتی یەكەمجاری نییە گەنجانی پیرەمەگروون ئەشكەنجەدەدات و دەستگیریان دەكات. بەڵام نایەوێت لەخۆی بپرسێت، بۆچی لەو دیو هاوینەهەوارەكانی ماڵباتی تاڵەبانی و بەرپرسانی یەكێتی لە دوكان ئەو هەموو گەنجە توڕە و بێ كار و دابڕاوە هەیە لە خوێندن!
-بەپێی راگەیەندراوەكەی ئاسایشی یەكێتی و دەزگا راگەیاندنەكانی یەكێتی، ئەم بابەتە دەكرێتە زنجیرە دراما و چەندین كەسی دیكەی تێوەدەگلێندرێت، چونكە دەزگاكان بە ڕوونی وتویانە “چەند كەسێكی راسپێردراو بەپێی بەرنامەی داڕێژراو بۆ تێكدانی ئاسایش و ئارامی و بە مەبەستی دروستكردنی ئاژاوە”. واتا لە پاڵ ئەمەدا چەندین ململانێی دیكەی ناوخۆیی یەكێتی پێ یەكلایی دەكرێتەوە، وەك تیرۆركردنەكەی موراد كانی كوردەیی.
-تەنیا هەنگاوێك كە ئێستا بە كەڵكی یەكێتی نیشتیمانی بێت، ئازادكردنی سەرجەم دەستگیركراوەكانە، هەروەها داوای لێبوردن و قەرەبووكردنەوەی گەنجەكان و خێزانەكانیانە. ئەگەر بڕیارە هەر رێكارێكی یاسایی هەبێت، ئەوا دەبێت لەسەر بنەمایەكی دادپەروەر بێت نەك بەكارهێنانی یاسا بۆ تۆڵەكردنەوە. یەكێتی وەك شەریك لە حوكمڕانی، دەزانێت دۆسیەی زیندانیانی بادینان پارتی بە كوێ گەیاندووە.
#بتەكە_ئەكەوێ

We have 96 guests and no members online