سوپاس بۆ ووشەکانت کە پڕی راستگۆیین ، من بۆ عەوام نانوسم ، بۆ ناوبانگ و بەرشاشەکان نانوسم ، بۆ ڕۆژگارێکی هەرزان و سادەبونەوەی ئینسان هەتا دەبێتە پوشیکی دەمڕەشەبا ، بۆ ئەو ڕۆژگارە نانوسم ، بۆ مرۆڤێک دەنوسم کە هێندە قوڵ ودەگمەن وهۆشیار وجوانبینە لە جێگایەکی تری ژیانە ، لە ئەستێرەیەکی تری پڕ ئومێدە ، بۆ کەسانێک کە وەکو تۆن ، من نەک هەر لە شیعر ولە نوسیندا بەر غەدری گەورە کەوتوم ، هاوڕێی ئازیز ، ژیانم خۆی غەدرێکی گەورەیە ، وەکو ژیانی زۆربەی ژن وپیاوە جوانەکان ، بە جوانی وهۆشیاری وڕاستگۆیی وعاشق بونی خۆم دەچەوسێمەوە ،هیچ چاوەڕوانیەکەم نیە لە ژیان ودنیایەک کە لێوانلێوە لە نادادوەری و ناشرینی ومرۆڤی ساختە ، کافکا و نیتشەش لە زەمانی خۆیانا نەدەناسران وەکو پێویست ، هەمیشە ئەوانەی کۆدێکی گرانتر وبەهایەکی زیاتریان هەیە ، ئەوانەی کە دوای فەوزا ناکەون ، قوڵتر ژیان دەخوێننەوە ،ناچنە پێشەوەی حەشامات ، ژیان بۆ من تەنهاییەکە لە قەرەباڵغیدا ، شیعرێکە بۆ تەنها کەسێکی دەنوسیت ، کەسێک کە هەمو مرۆڤەکان لە خۆیدا کورت دەکاتەوە ، ساتەوەختێکی ڕاستگۆییە لەگەڵ ژیاندا کە لە دڵەوە پێبکەنیت ، یان هێندە بگریت کە دڵت دەخوسێتەوە ، دەست خۆش هاوڕێی شیرینم ، شانازیە بۆ من کە ژنێکی خوێندەوار وسەنگین و هۆشیاری وەکو تۆ بمخوێنێتەوە ، خۆشمدەوێی.
******
نوسینەکەی باخچە محمد.
ئەی پیاوی خراپ،
ئەی پیاوی بەردین!
ئازارم جوامێرتر و
تەنهاییم زۆر میهرەبانتر و
کەلاوەی کۆڵانەکانی جێهێشتن ئاوەدانترە
لە داڵانی تاریک وپێچیدەی پێکەوەبون لەگەڵ تۆدا...پیاوی خراپ!
لە دوێنێوە ئەم ووشانە و هەموو ئەو شیعرانەی تری دلسۆز حەمە کە لە ئێوارە کۆڕێکی ئۆنلایندا گوێبیستیان بووم، میوانی خەیاڵمن ونایانەوێت دەست لە بەرۆکی ڕۆحم بەردەن!
من دڵسۆز وشیعرەکانی تازە ناناسم، لەمێژە ئاشنای ئەو دەنگە پڕ هەست و ئەو خامە بوێرەم. جاران کە بەدڵێکی مەستەوە شیعری بۆپیاو وبۆعەشق ئەوت، ئێستاش کە ئازاری ژنبوون و دایک بوون و تێکشکان ئەگێڕێتەوە، هەر خۆیەتی، هەمان ژن وهەمان و دەنگ.
بەهای ئەزموونی شیعری دلسۆز تەنها لە گەیاندنی ئازاری ژنبووندا خۆی نابینێتەوە، بەڵکو ئاستی ئستاتیکیەتی، کە تایبەتمەند و ناوازەی دەکات .ئەو جوانیەیە کە بە ئازاری ئەبەخشێت، ئەتباتە جێیەک کەنەزانیت ئەوە ئازارە جوانی لێئەچۆڕێت، یاخود جوانیە و نوقمی ئازارە.
دلسۆز دوور ئەڕوات، تا شوناسێکی مێینە بۆ زمان و ڕەهەندێکی جیاواز بۆ دەربڕین بدۆزێتەوە. بۆیە هەم شوێن لە شیعرەکانیدا، فەزایەکی ژنانەیە و هەم بە چاوێکی ژنانەوە ووردەکاریەکان ئەبینێت و ئەگێڕێتەوە. تەنانەت لە هەڵبژاردنی ووشە و دەربڕینەکانیدا توانیویەتی زمان لە هەیمەنەی (ڕاشیۆ-پیاوسالاری) رزگاربکات وشتێک لە ڕۆح نزیکتری بکاتەوە. دلسۆز گەرچی شیعرەکانی درێژکراوەی هەمان چیرۆک و هەمان ئازارن بەڵام هەرگیز ڕستەیەکی شیعری لەوی تر ناچێت، و نەک دووبارە نیە، بەڵکو بەدووبارەبونەوەشیان هێشتا تینوێتیت لێیان ناشکێت...
تێکشکاندنی وێنای ستریۆتایپی پیاو و ئاوێنە دانەدەست پاتریاکی، تا بەڕوونی دەموچاوی ناشرینی خۆی ببینێت، ئەو هونەرەیە کە دلسۆز تیایدا زۆر بەهرەمەندە... هاوتەریب توانای سەرلەنوێ داڕشتنەوەی کەسایەتی ژنی وەک کارەکتەرێکی بەهێز ودایکێکی خولقێنەر هەیە. هەرچەندە لەبەر ئەم خەسڵەتانە، ئەکرێت بەرهەمی شیعری دلسۆز وەک ئەدەبی فیمینیزم و ئیمانسیپاتۆری ئەژمار بکرێت، بەڵام هزر و رۆحی شیعری ئەو بە ئازادی ئەمێنێتەوە،کە ئایدۆلۆژیا، قووڵی و مانای لێنەسەندۆتەوە.
دلسۆز مەودایەک لە نێوان خۆی و شیعرەکانیدا ناهێڵێتەوە، بە زمانێکی ڕاستەوخۆ قسە ئەکات. ئەو، ئەوێرێت پاڵەوانی چیرۆکەکانی بێت و ئەوێرێت بەناوی کەسی یەکەمەوە قسە بکات، بێ باکانە پەردە لەڕووی کەوتن و تێکشکانی خۆی هەڵماڵێت.
ئەدەبی فێمینستی دلسۆز ئەدەبێکی ریلاتڤست نیە. ئەو ناگەڕێ بە دوای لێکچوون و سەرقاڵی بەهانە هێنانەوە نیە. کێشەکان ناخاتە تەنها ئەستۆی پاشخان و فاکتەرە فەرهەنگی و کۆمەڵایەتیەکان. بەڵکو زیاتر وەک ئیسێنشیالستێک دەنگێکی باوەڕ بەخۆبووەو لەسەر جیاوازیە بایەلۆجی و دەروونیەکانی پیاو و ژن کارئەکات و هەر ئەو جیاوازیەشی کردووە بەکەرەستە وهەوێنی دونیای شیعری خۆی.
بەداخەوە ئەم خامە ڕەسەنە هەرگیز هێندەی بەهرە و توانای بەخشینی خۆی پانتایی وەرنەگرتووە... لەمەشدا دلسۆز هەر ئەزموونەکەی ژنانەیە. ژنێکە لە کایەی نوسین وپەخشدا کە لەلایەن پیاوەوە مۆنۆپۆل کراوە.
