بەیانیت باش گەورەم..
نیوەڕۆت باش پەرلەمان..
ئێوارەت باش حکومەت..
شەوت باش دەسەڵات..
دوێێت باش جەنابی سەرۆک..
بە هیوام باش بن..
سەلامەت بووبن لەم لافاوە..
پەنجەرەی ڤێلاکانتان نەشکابێت..
فەرشی ئاوریشمی ڕاڕەوەکانتان ئاو نەیبردبێت..
جێگەی گەرمی خەوتان تەڕ نەبووبێت ..
خەوی شیرین و قوڵتان لێ تێک نەچووبێت..
بەهیوام گریانی دانەر ئێوەی بێزار نەکردبێت..
گلەییەکانی دایکی لە دڵ نەگرن
گەورەم گرنگ سەلامەتی ئێوەیه..
با شار ئاو بیبات..
ئێوە خۆش بن..
هیچ کێشه نیه..
دڵتەنگ مەبن..
خۆتان تێک مەدەن..
ئاهەنگی سەری ساڵ بەڕێوەیه..
ڕوخساری جوانتان مەشێوێنن..
نزا ئەکەم باران نەبارێت ئیتر..
بۆ ئەوەی ئاسمان ئارام بێت
ئەو کاتەی ئێوە بەنیازی گەشتن بۆ دەرەوەی وڵات..
بیرم چوو بپرسم
هەرچەندە حەدی ئەوەم نیه
کوێتان هەڵبژاردووە بۆ شەوی سەری ساڵ..
دڵنیایی بدە بە ژن و مناڵەکانتان
هیچ نیه ..
ئەوەی ڕوویدا تەنها لافاوێک بوو..
تەواو بوو...
گرنگ سەلامەتی ئێوەیه..
میللەت بەقوربانی ئێوە بێت..
بخەونەوە...
ئاسۆکان لێرەن بێ خەم بن ئێوە
خەوێکی ئارام..
شەوتان شاد گەورەم...
لە ئێستاوە ساڵی نوێتان پیرۆز بێت..
سوپاس بۆ لوتفی پڕ موحیبەتی ئێوە..
دانەری بچکۆلە تەنانەت پێویستی به کفن و گۆڕیش نەبوو..
خودا لە باوەشی گرت..
فریشتەکان بەو ئەرکه هەستان..
پرسە و سەرەخۆشیتان زیادەیە ئیتر..
دانەری شیرینم بنوو چیتر باران نابارێت..
لافاویش ڕوونادات..
تۆ کۆتا ئازاری ساڵ بوویت..
بنوو جەرگم
ڕۆحم بە فیدات..
دەریـــا هەڵەبجەیـے
