|
بێده‌نگی به‌رامبه‌ر كوردستانی باكوور بۆ؟؟؟ ... عه‌لی مه‌حمود محه‌مه‌د
باوه‌ڕ ناكه‌م ناسیۆنالیزم له جیهاندا هه‌بێت به ئه‌ندازه‌ی ناسیۆنالیستی
كورد ترسنۆك بێت، به ئه‌ندازه‌ی ئه‌ویش درۆزن بێت به‌رامبه‌ر په‌یامه‌كانی
خۆی، به ئه‌ندازه‌ی ئه‌ویش فشه‌كه‌ر و خۆ به زل زان بێت.
له دروشم بازیدا
كارامه‌ن، به‌ڵام له كرداردا زفت. خۆ هه‌ر ئه‌وان وا نیین. له كوردستاندا
سیاسه‌ت پێناسی پڕ به پێستی خۆی دۆزیوه‌ته‌وه، بریتییه له درۆ.
ڕێكخراوێكی په‌نابه‌ری بیرۆكه‌ی چه‌پ، له تسۆنامی په‌نابه‌رێك گه‌رده‌لول
بیبات، به‌یاننامه به‌ناوی سه‌ركرده قاره‌مانه‌كه‌یه‌وه ئاماده‌یه، له
خواوه بۆ ناسیۆنالیستی كورد شه‌رمه‌زار ده‌كات، به‌ڵام نورییه كه‌سپیر
له هۆڵه‌نده بڕیاری ته‌حویلدانه‌وه‌ی درا به توركیا، نه‌یان وێرا ته‌نها
به نامه‌یه‌ك پشتگیری لێ بكه‌ن، له‌به‌ر سه‌فاو مه‌روای ڕێی ئیبراهیم
خه‌لیل.
كاتێك مه‌هاباد و
سنه‌و. . . ڕاپه‌ڕین، یه‌ك كه‌س له كوردستانی باشوور نقه‌و جقه‌ی لێوه
نه‌هات، چونكه سه‌ركه‌وتنه‌كانمان ده‌ڵه‌مه‌یه، به جوڵان ده‌بێت به
ئاو، به‌ڵام جه‌ماوه‌ری وان و جوله‌مێرد و ئامه‌د پشتگیرییان لێ كردن، هه‌ر
دوێنێكه‌ش خه‌ڵكی گه‌وه‌ڕ پاسێكی ئێرانییان له شاره‌كه‌یان تێك شكاند،
به‌ڵام حوسێنییه‌ی سوله‌یمانی و باره‌گای كۆماری ئیسلامی ئێران له هه‌ولێر
له ماڵی سه‌ركرده‌كانمان پارێزراوترن.
لایه‌نه سیاسییه‌كان و ڕۆشنبیرانی خۆرهه‌ڵات، گله‌یی و گازنده‌یان له
ئێمه‌ی داوه‌شاو كرد، كه نمه‌ك حه‌رام ده‌رچووین به‌رامبه‌ر به ڕابردوو،
هه‌ڵوێستمان نه‌بوو.
باشه گه‌لۆ خۆ
سه‌ربانێك و دوو هه‌وا نییه، ئه‌وه چه‌ند ڕۆژێكه كوردستانی باكوور
ته‌واو جه‌مسه‌ربه‌ند بووه، له قارسه‌وه بۆ ئه‌ده‌نه، له
ئه‌سته‌مبوڵه‌وه بۆ شه‌مزینان، گه‌وره‌و بچووك ڕاپه‌ڕیووه، شه‌وان
مه‌شخه‌ڵ به‌ده‌ستانی په‌كه‌كه كۆنترۆڵی شاره‌كان ده‌كه‌ن، ناسنامه له
خه‌ڵك وه‌ر ده‌گرن، به 80000 به‌شداری له ناشتنی ته‌رمی گه‌ریلاكانیان
ده‌كه‌ن. گورگه بۆرو و ڕێوی و چه‌قه‌ڵه توركه‌كان هانی شه‌ڕی نه‌ته‌وه‌یی
دژ به كورد ده‌ده‌ن. له به‌رامبه‌ردا ملیۆنان دایكی له‌چك سپی له‌سه‌ر،
كچانی به‌رگ ئاڵاو واڵا به ڕه‌نگی سور و سپی و سه‌وز، گه‌نجانی ده‌مامك
دراو به خۆیان و ده‌مامكی ده‌مو چاویانه‌وه، مناڵانی سیما برسی به‌خۆیان
Vی
په‌نجه‌یانه‌وه، شه‌وو ڕۆژ كۆنترۆڵی شه‌قامه‌كان ده‌كه‌ن، كه‌چی ئێوه بۆ
نقه ناكه‌ن، ده‌نگتان لێوه نایات، هه‌ی له ئێمه داوه‌شاووتر.
ڕابه‌رایه‌تی ئه‌وان
له ئیمراڵییه‌وه حوكمی شه‌قام ده‌كات، سه‌رانی ئێوه له شوێن گه‌رم و
نه‌رمه‌وه سفر یه‌ك به‌ده‌ست له گه‌مه‌كه ده‌رچوون. ده‌شێت منیش له
ئێوه بپرسم، كوا هه‌ڵوێستتان، كوا به‌رهه‌می قه‌ڵه‌م و نوسینه‌كانتان، كوا
په‌یامتان بۆ پێ په‌تییه‌كانی باتمان، كچانی ئامه‌د، جوتیارانی گه‌وه‌ڕ،
دایكانی ده‌رسیم. . . .
ئه‌رێ كوردینه، ئه‌م
بێده‌نگییه شه‌رم نییه، به به‌رچاوی كامیرای ته‌له‌فزیۆنه‌كانه‌وه
ده‌بینیین ناسیۆنالیسته توركه‌كان به كۆمه‌ڵ هێرش ده‌كه‌نه سه‌ر
ڕێبوارانی كورد و به‌رد بارانییان ده‌كه‌ن، خوێن له ته‌وقی سه‌ریانه‌وه
بۆ نووكی په‌نجه‌یان سور ده دكاته‌وه، چه‌پ و ئازادی خوازانی تورك
شه‌رمه‌زاری ده‌كه‌ن، به‌ڵام ئێمه‌ی سۆپه‌ڕ كورده‌كان فزه‌مان لێوه نایات.
ئه‌مه‌یه نیشانه‌ی
داوه‌شینی گه‌لێك، داڕزانی نه‌ته‌وه‌یه‌ك، ترسنۆكی ڕۆشنبیرانی، بێهه‌ڵویستی
پێشه‌نگه سیاسییه‌كانی.
| 
