بەڕێوەبەری گشتیی پەیوەندییەكانی وەزارەتی ئەوقافی هەرێم ڕایگەیاند، ئەو سێ مەلایەی كە ئەمڕۆ هەینی كۆمەڵێك خەڵكی حزبییان هێنابووە مزگەوتەكان و پشێوی و ئاژاوەیان دروست كرد، دەدرێنە دادگا، چونكە بەكارهێنانی مزگەوت و مینبەری مزگەوت بۆ هاندان و توندوتیژی و كاری سیاسی، رێگەپێدراو نییە.

(مەریوان نەقشبەندی)، لە تۆڕی كۆمەڵایەتیی فەیسبووك وەهای نووسیوە:

بەیاننامەیەك لە وەزارەتی ئەوقاف و كاروباری ئایینییەوە

دوای ئەوەی وەزارەتی ئەوقاف لە چوارچێوەی رێوشوێنە ئیداری و چاكسازییەكانیدا لە رێگەی بەڕێوەبەرایەتیی ئەوقافی هەولێرەوە 3 مامۆستای ئاینی لە وتارخوێندنەوە بۆ ماوەیەكی كاتی راگرتبوو و رۆژی پێشتریش ئەو مامۆستایانەی ئاگادار كردبووەوە، بەڵام ئەمڕۆ هەینی ئەو مامۆستا ئایینیانە نەك هەر بە فەرمانەكەی بەڕێوەبەرایەتیی ئەوقافی هەولێرەوە پابەند نەبوون، بەڵكو كۆمەڵێك خەڵكی حزبییان هێنابووە مزگەوتەكان و پشێوی و ئاژاوەیان دروست كرد و رێگرییان لە وتاربێژە نوێیەكان كرد، بۆیە وەزارەتی ئەوقاف لە چوارچێوەی رێكارە یاساییەكاندا بە ئەركی خۆی هەڵدەسێت و ئیجرائاتی یاسایی زیاتر دەگرێتە بەر و ئەو مەلایانە دەداتە دادگا، چونكە بەكارهێنانی مزگەوت و مینبەری مزگەوت بۆ هاندان و توندوتیژی و كاری سیاسی، رێگەپێدراو نییە.

راگەیاندنی وەزارەتی ئەوقاف

29/4/2016

ئومێد بابان