کوردستان ل بەر دەرازینکا بورینا سەد ساڵیێ یا پەیماننامەیا سایکس ـ پیکۆیێ دەیە، ئەو پەیمانناما کو ئەگەرا دەستپێکێ یا پارچە و بریندارکرنا لاش و ئاخ و جوگرافیا کوردستانێ یە و لپەی خوەدا چوار دژمنێن داگیرکەرو هۆڤ ژبۆ مە کورد و کوردستانیان چێکرین. ب درێژاهیا وان سەد ساڵێن بوریدا، ئەڤان چوار دەولەتان ب هەمی رژێمێن خوەیێن دەسەڵاتداریێ ڤە، ژ بۆ رۆژەکێ بە ژی دەست لسەر ستەم و زۆرداریا خوە لهەمبەر کورد و کوردستانێ هلنەگرتیە. هەتا نها ژی کو د دەمەکی دە تێکڕا و هەر چوار دەولەتێن داگیرکار دناڤا کریز و دەردەسەری و تەڤلیهەڤیێ دەنەو دەڤەرا رۆژهەلاتاناڤین ل بەردەم گهوڕینێن پێکهاتەیی و جیۆپۆلیتیکیی دەیە، هێژ ژی لسەر دژایەتیکرنا کوردستانێ دپیلانگێڕیێ دەنە و بێ شەرمانە کەلاسەرێ خوە لهەمبەر دەستکەفتی و رابوونا کوردستانیان دڕێژن.

ل باکورێ کوردستانێ دەولەتا ترک یا خوینڕێژ، ب هوڤانەترین جۆرێن هێرشان زوڵم و زۆریێ ل سەر کوردستانێ دکە، ب هەزاران خەلکێ مە یێ سڤیل ب کال و پیر، ژن و زارۆک ڤە شەهید و بریندار دکەن و د هەمان دەمدا گوند و باژاڕو نرخ و ئاسەوارێن دێرینێن کوردان ژی خاپور و وێران دکەن.

ل رۆژاڤا و باشور هێزێن رەش و پاشڤەڕو و شۆڤینیست ل پشت پەردا ئیسلامێ و بناڤێ مەزهەب و ئاینی کوشتنا کوردان و کچ و ژنێن مە ژ خوە ڕا حەلال کرینە. ل رۆژهەلاتێ کوردستانێ دەولەت و رژێما وێ یا کەڤنەپەرستا ئیسلامی یا بەردەوامە ل زیندانکرن و سێدارەدانا چالاکڤان و مافخوازێن کوردان و خەلکێ سڤیل و بێ گونەه ئەشکەنجە دکە و مافێن رەوایێن کورد و کوردستانێ ژی ئینکار دکە.

سەرەڕای ڤان زوڵم و زۆری و ئێرشێن نەیار و داگیرکەران د هەیاما ڤان سەد ساڵێن بهوریدا و نهاژیکورد ب گیانەک فیداکاری ژ بۆ بدەستڤەئینانا مافێن خوە و ئازادیێ و پاراستنا دەستکەفتان لسەر خەبات و تەکوشینێ د بەردەوامن و قورباننیان ددە. هەروەسا ب درێژاهیا سنورێن ئاخا کوردستانێ ب لەهەنگی و قارەمانییا پێشمەرگە، گەریلا و شەڕڤانان د چەپەرێن بەرگریێدا هەمی بهەڤڕە بەڕڤانیێ ژ ئاخ و رومەتا مە کوردان دکەن ل هەمبەر ئێرشێن کەڤنەپەرست یێن دەولەتا ئیسلامی ـ چەتەیێن ( داعش )ێ ئەو کۆم و رێکخراوا ب فینانس و هەڤکاریا دەولەتا ترک و هین دەولەتێن کەڤنەپەرستێن کەنداڤی ڤە تێن لڤاندن. ئەڤ هەڤچەپەریا هێزێن هەر چوارپارچەیان بهەڤڕە مەزنترین دەستکەفتێ دیرۆکا ڤان سەد ساڵانەو پێدڤیە هەر وەڵاتپارێز و کورد پەروەرەک ڤێ ژ گیانێ خوە زێترو ڤێ رۆحیەتا پیروز موکوم تربپارێزیت و پێشڤە ببەت. ئەڤ هەڤچەپەریا هێزێن لەشکەری و ناسنەکرنا سنورێن دەستکرد ب هێزترین چەکە ژبو شکاندنا پێلان و ئێرشێن نەحەز و دژمنان د رۆژا ئیرۆدا. لەو هەلویست وەرگرتن ل هەمبەر بەروڤاژیا ڤێ تێگەهێ، ئەرکێ هەر وەڵاتپارێزەک و هەر هێزەکا سیاسی، جڤاکی و رێکخراوەیێن کوردستانێ یە، کو ب جیدی لسەر راوەستیت.

دڤان پرۆسەو پێشهاتاندا و لەرزینا نو یا سەد ساڵا کورد و کوردستانیان پشتی جوارپارچەبوونێ، ژ بلی بەردەوامی و بەرخوەدانا گەلێ مە ل رۆژهەلاتێ کوردستانێ و خەبات و تەکۆشینا مەدەنی و پەڕلەمانی یا ( HDP )ێ دپەرلەمانێ ترکیاداو بانگ و بڕیاردانا خوەسەریا دەموکراتیک د وان باژێڕێن سەرهەلدایێن باکوردا، گەلێ کورد و کوردستانی پێنگاڤێن گرنگ ئاڤێتینە و گەهاینە دەستکەفتیێن مەزن. هەبوونا ستاتۆیا هەرێما باشورێ کوردستانێ و راگەهاندنا فەدرالیزما رۆژاڤاو باکورێ سوریایێ، پێگەو بڕیارێن گرنگ و سیاسینە ژ بۆ کاروانێ خەباتا نەتەوەیی یا گەلێ کورد ژ بۆ رزگارکرنا سەرانسەرێ کوردستانێ و تێکدان و دەم بسەرڤەچوونا پەیمان و پیلانا سایکس ـ پیکۆ یێ و هەموو پلان و پیلانێن دی یێن دژمن و داگیرکەران. لەوما ئەم پاراستن و پشتەڤانیا ڤان دەستکەفت و نرخان بئەرکەکێ دیرۆکییێ مەزنێ هەرکوردەک دلسوز دزانین.

ئەم کۆمەک ژ کادر و پێشمەرگەیێن دێرین و لایەنگرێن پارتی دیموکراتی گەلی کوردستان، ئەڤێ بانگێ ژ بۆ رایا گشتی و هێز و سازیێن کورد و کوردستانی رادگەهینین:ـ

* ژ حکومەتا هەرێما باشورێ کوردستانێ دخوازین، کو بفەرمی دان ب فیدڕالیا رۆژاڤیێ کوردستانێ بدەت و هەرچی بلەزە دەریێ سێماڵکا و هەمی دەریێن گرتی ب روویێ رۆژاڤا ڤەکەت ژ بۆ پشتەڤانی و هاریکاریێ.

* بانگی هەموو هێز و لایەنێن سیاسیێن کوردستانێ دکەین کو دۆزا کورد و کوردستانێ بلند و پیرۆز راگرن و بەرژەوەندیا گشتی یا نەتەوەیی و نیشتیمانی بکەنە ئارمانج و ریا خەباتا خوە، نەک بەرژەوەندیێن حزبی و کەسوکی.

* ژ ئەڤرۆ پێڤە چەوا خەلکێ کورد و رایا گشتی یا کوردستانێ وان سنورێن دەستکردێن ناڤبەرا کوردستانێ ناسناکەن، وەها ژی هێز و سازیێن سیاسی یێن هەر چوار پارچەیان ژی وان سنوران ناسنەکەن.

* داخواز دکەین کو هێز و سازی و رێکستیێن سیاسی یێن کوردستانی د ئەنییەکا یەکگرتی یا نەتەوەیی و نیشتیمانی دا هەڤبگرن و داخواز و ئارمانجێن ستراتیژی یا نەتەوەیی و مافێ رەوایێ گەلێ کورد و کوردستانێ پەسەند بکەن و یەک گوتار و یەک جەمسەری و ئاراستەییا گوتارا نەتەوەیی و نیشتیمانی بێتە ئاڤاکرن.

* ئەم خەبات و تەکوشینا پێشمەرگە، گەریلا و شەرڤانان ب پیروزی و بلند و مەزن دنرخینین و داخازا هاریکاری و پشتەڤانیا وان لەهەنگان دکەین.

شەهید و جانگوری و پاکڕەوانێن کوردستانێ رومەتا گەلێ کوردن. ئەم دخوازین کو ناڤ و مەقامەتا وان پیروز و بلند بهێن راگرتن و رێزەکا بلند ژ مالباتێن وان بهێتە دانین.

بژی کورد، بژی گەل و بژی کوردستان

کۆمەک ژ کادر و پێشمەرگەیێن دێرین و لایەنگرێن پارتی دیموکراتی گەلی کوردستان

بەهزاد سلێڤانەیی

بێستون بەرواری

بەهزاد پیرموسا

بەنگین سلێڤانەیی

د. ئازاد مەتیخان

ئەردەلان شارەزوری

فەهمی مایی

غازی پیرموسا

غریب بامەرنی

هەوار هاریکی

ئیسماعیل گوهەرزی

خالد ئامێدی

لەزگین نێروەیی

محمد زاخویی

مهندس جمال

نەبەز ئافصارکی

نیشان بامەرنی

نزار پیرو

قەهرەمان بامەرنی

رەمزی خانەقینی

سید قەهار زاخویی

شیروان ئەحمەد.