لە چوارچێوەی چالاكییەكانی بەرنامەی هۆشیاركردنەوە لە مەترسییەكانی مین و تەقەمەنی، تیمەكانی هۆشیاركردنەوەی دەزگای مین و سەرجەم ئەو رێكخراوانەی كە كاری هۆشیاركردنەوە لە هەرێمی كوردستان ئەنجام دەدەن، لە ساڵی 2015 توانیان پەیام و رێنماییەكانی هۆشیاركردنەوە بە 217 هەزار هاوڵاتی بە هەموو چین و توێژەكان بگەیەنن. بەمەبەستی زیاتر سوود گەیاندن لە پەیامەكانی هۆشیاكردنەوە شانبەشانی چالاكییەكان 374 هەزار هۆكاری هۆشیاركردنەوە وەك (پۆستەر، نامیلكە، گۆڤار، لفلێت و هۆکاری تر) بەسەر بەشداربووانی چالاكییەكانی هۆشیاركردنەوە دابەشكراون. زۆربەی چالاكییەكانی هۆشیاركردنەوە لە ساڵی رابردوو لە كەمپەكانی پەنابەرانی كوردی سووریا و ئاوارەكانی ناوخۆ ئەنجامدراون هەروەها ئەو هاوڵاتییانەی كە لە ئەنجامی شەڕی داعش ئاوارە ببوون و گەڕاونەتەوە زێدی خۆیان بەرنامەی هۆشیاركردنەوەیان پێشكەشكراوە.

شایانی ئاماژەیە بە هۆی جێبەجێكردنی بەرنامەی هۆشیاركردنەوە بەو شێوە بەرفراوانە، ژمارەی قوربانیانی مین و تەقەمەنی لەساڵی 2015 تەنها 19 كەس بووە، ئەمە لەكاتێكدا كە ساڵی 2014 ژمارەی قوربانیان 32 كەس بووە. لە ئێستادا لەبەر نەبوونی ئامارێكی ووردی قوربانیانی بۆمبی چێنراو ژمارەی بەركەوتووان (لەنێو هێزەكانی پێشمەرگەو هاوڵاتیان) ژمارەی قوربانیانی بۆمبی چێنراو بەردەست نیە. لەبەر ئەو هۆكارەیە ئەو ژمارەیە تەنها قوربانیانی مین و تەقەمەنی دەگرێتەوە.

راگەیاندنی دەزگای گشتی کاروباری مین