دوای ئەوەی پرسی مردنی پارێزەری جوانەمەرگ ناز سلێمان یەعقوبی، بووە رۆژەڤی راگەیاندنەكان و باسێكی گشتی، سەندیكای پارێزەرانی كوردستان، لە سۆنگەی بەرگریكردن لە پارێزەران و لەسەر بنەمای زانیارییەكانی ماڵباتەكەی، بەیاننامەیەكیان دەركرد و داوایان لە دەزگا پەیوەندیدارەكان كرد، هەرچی زووترە لێكۆڵینەوە لە مەرگی خاتوو ناز بكەن.

لەو بارەیەوە، نەقیب هۆگر عەزیز، وتەبێژ و بەڕێوەبەری ڕاگەیاندنی پۆلیسی هەولێر دەڵێت، سەندیكای پارێزەرانی كوردستان لەسەر بنەمای زانیارییەكانی خێزانەكەی، بەیاننامەیەكیان لەبارەی خۆكوشتنی پارێزەر ناز سلێمان دەركرد و، داوایان لە دەزگا پەیوەندیدارەكان و هێزە ئەمنییەكان كرد، كە هەرچی زووە لێكۆڵینەوە لە مەرگی ئەو پارێزەرە بكەن.

هۆگر عەزیز دەشڵێت، سەندیكای پارێزەرانی كوردستان سوپاسی هێزە ئەمنییەكانی كردووە كە بە كەمترین كات ڕاستیی ڕووداوەكەیان بۆ ڕای گشتی ئاشكرا كردووە.

"بە سوپاسەوە دەزگاكانی ئاسایش و پۆلیس، زۆر بە جیددیی و دڵسۆزانە بەدواداچوون و لێكۆڵینەوەیان لە رووداوەكە كرد و ئەنجامەكەیان بۆ ڕای گشتی و راگەیاندن ئاشكرا كرد و دەردەكەوێت و ڤیدیۆیەكیشیان لەو بارەیەوە بڵاو كردەوە، كە ڕووداوەكە كوشتن و خنكاندن نەبووە و بەڵكو بەداخەوە، كارێكی خۆكردانە بووە لەلایەن جوانەمەرگەوە، كە راپۆرتی پزیشكی دادیش لەو بارەیەوە پشتڕاستی دەكاتەوە. هیوادارین لە پەروەردگاری مەزن، لە گوناهەكانی خۆش بێت". سەندیكای پارێزەران وەهای نووسیوە.

سەندیكای ناوبراو ئاماژە بۆ ئەوەش دەكات: "ئێمە ئەوپەڕی متمانەمان بە دەزگاكانی پۆلیس و ئاسایشی هەرێمی كوردستان هەیە و دەزانین كە بۆ سەلامەتیی و پاراستنی گیانی هاووڵاتییانی هەرێمی كوردستان، هەردەم لە ئەرك و شەونخونیدان. هەر بۆیەش بۆ دیاریكردنی چارەنووسی جوانەمەرگ داوای لێكۆڵینەوە و بەدواداچوونمان لێ كردن، ئەوەی دەشمێنێتەوە لە تەواوكردنی لێكۆڵینەوەكان و هۆكارەكانی، دادگا و پۆلیس و دەزگا پەیوەندیدارەكان، كاری خۆیان تەواو دەكەن و جێبەجێی دەكەن و ئێمەش بەدواداچوونی بۆ دەكەین".

سەندیكای پارێزەران، سوپاسی گشت پارێزەران و ئەو لایەن و راگەیاندنانەش دەكات كە لە سۆنگەی دڵسۆزییان بۆ ئاشكرابوونی چارەنووسی مردنی خاتوو ناز (خوالێی خۆش بێت)، پشتگیریی و هاوخەمییان نیشان داوە.