لە هەلومەرجێکی قەیراناویدا کە هەموو چاوەکان کەوتوونەتە سەر ئەو لیژنە دەست بەکار نەبووانەی، کە لە ژێر رۆشنایی کارنامەی جێگرانی سکرتێری گشتی بەمەبەستی دەستنیشانکردنی تەنگژەکان‌و دانانی رێگەچارەی گونجاو بۆ چارەسەرکردنیان پێکهێنراون، ئا لەم کاتە ناسکەدا ناوەندی دەرەوە کە ئۆرگانێکە هەم لەژێر پرسیاردایەو هەم لەلایەن باڵێکیشەوە بە ناشەرعی کۆنترۆڵ کراوە. . !. دێت، لە ژێر دروشمێکی گەورەو گشتگیردا کۆبوونەوەیەک دەکات‌و ناوی دەنێ کۆنفرانس. . گوایە مەبەستیان بەشداریکردنە لە گەشەپێدان‌و ریکخستنەوەی یەکێتی‌و گەرەکیانە قورسایی رێکخستنەکانی دەرەوە رەچاوبکرێت. .

کۆبوونەوەکەی ناوەند کە رۆژانی ١٧ و ١٨ی ئەم مانگە لە دانهاخی هۆڵەندا بەڕێوەچوو، دەکرا لەهەلو مەرجێکی ئارامترو بە میکانیزم‌و رێوشوێنی گونجاوتر، بە بەشداری نوێنەرایەتی هەموو یەکێتییەکان نەک تەنیا باڵێک، کۆنفرانسێکی راستەقینەو شەرعی ببەسترێ، بۆ ئەوەی گفتوگۆیەکی راشکاوانەی هەمەلایەن لە سەر کۆی کێشەو تەنگژە کەڵەکەبووەکانی یەکێتی‌و بەتایبەتیش دەرەوە بێتە ئارا، ئەوەی ناونراوە کۆنفرانس لە دیدارێک زیاتر نەبووە، کە هەڤاڵ شاناز مەبەستێتی قسەی دڵی خۆی بە ناوی هەموو ئامادەبووانەوە بکات‌و بڵێ یەکێتییەکانی دەرەوە وا دەڵێن، بەڵام دواجار ئەو خوشکە نوێنەرایەتی بەشێکی کەمی یەکێتییەکانی دەرەوە دەکات و بە دڵنیایی یەکێک لەو ئۆرگانانەی پێویستی بە پێداچوونەوەو هەڵتەکاندن هەیە ئەو ناوەندە مۆنۆپۆڵکراوەیە!

دروشمی کۆبوونەوەکە بریتی بووە لە : ( سەفین لەبن دێ یەکێتیی لە بن نایێ، هێڵی سوورمان مام‌و یەکێتیی‌و پەیڕەوی ناوخۆمانە ) .

ئەم دروشمە مایەی ئەوەیە لەبەردەمیدا هەڵوەستە بکەین‌و بە پێی زەمان‌و زەمین بیخوێنینەوە، ئەگەر لە روانگەی مامەوە سەیری یەکێتیی بکرێ‌و هەوڵی بەلاڕێدابردنی نەدرێ، ئەگەر یەکێتیی هی هەمووان‌و بۆ هەمووان بێت‌و لە لایەن دەستەیەکەوە قەراری یەکێتیی پەک نەخرێ، ئەوە بەڵێ قسەکەی مام لە جێی خۆیەتی‌و سەفینیش لەبن بێ ئەوە یەکێتیی هەرگیز لەبن نایێ، بەڵام بەو عەقڵیەتە دیماگۆجی‌و بەو شێوازی مامەڵەکردن‌و ئیحتیکارکردنە ئەوە یەکێتیی تادێ بچووک دەبێتەوە، ئەگەر راست دەکەن هێڵی سوورتان مامە ئەی بۆ لەسەر رێبازی مام ناڕۆن، ئەی مەگەر رێبازی مام رێبازی چەپکە گوڵەکەو پێکەوە کارکردن نییە. . ؟! دەبێ لای ئەو جەماعەتە رێزگرتن لە مام و یەکێتیی‌و پەیڕەوی ناوخۆ چی بێت. ؟ پێمان بڵێن ناوەندی دەرەوە لە کوێی پەیڕەودا هەیە، ئەگەر وەک تایبەتمەندییەکیش بۆ دەرەوە بە پێویست زانرا ئایا بۆ دەبێ موڵکی دەستەو تاقمێک بێت؟

سەیرە پێشێلکارانی پەیڕەو باسی پەیڕەوی ناوخۆ دەکەن، لە فەزای قۆرغکاری‌و ئافەرۆزکردن‌و تەخوینکردنی بەرامبەرو پەراوێزکردندا فرمێسکی تیمساحی بۆ یەکێتی ناو یەکێتی دەڕێژن، بەرژەوەندپەرستەکان داوای ئەوە دەکەن کە بەرژەوەندییە شەخسیەکان بخرێنەلاوە، ئیدانەی سایت‌و پەیجە سێبەرەکان دەکەن گوایە دوودڵی‌و گومان بڵاودەکەنەوە. . !

ئەوەی بۆتە هۆکاری دوودڵی‌و گومان ئەو پاشاگەردانیەیە کە لە ئاکامی قەیرانی رێبەرایەتی‌و کۆنترۆڵکردنی جومگە هەستیارەکانی حزب لە لایەن دەستەیەکەوە هاتۆتە ئارا، بڕیارەکانی یەکێتی هی یەکێتین یان هی دەستەیەک، راگەیاندنی یەکێتی، مالیەی یەکێتی هی یەکێتین یان هی دەستەیەک. . ؟!

ئەگەر دەتانەوێ قسەی مامی گەورە وەک نەخشی سەربەرد بێت‌و یەکێتیی هەرگیز لەبن نەیێ، ئەگەر یەکێتی ناو یەکێتیتان لا مەبەستە، ئەگەر گاڵتەتان بە کۆنگرەو پەیڕەوو پرۆگرام نایێ، لێگەڕێن بە کردەوە یەکێتیی حزبی چەپکە گوڵەکە بێت، هی هەمووان‌و بۆ هەمووان بێت‌و بە پێی پەیڕەوو هەر کەسەو بە پێی مەسئولیەتی خۆی مامەڵە بکات، پەیڕەو تەفسیرو تەئویلی زۆر هەڵناگرێت، ئەگەر رێز لە پەیڕەو بگیرێ دەبێ بە کردەوە ریزی لێ بگیرێ‌و هەندێ کەس کە زۆرجار وەک سکرتێری گشتی لێدوان ئەدەن‌و دونیایەک کێشە بۆ یەکێتی دروست ئەکەن. ! لەمەودوا بێ دەنگی هەڵبژێرن‌و بچنە ریزی دواوە ئه‌وکات خزمەتی زۆر زیاتر ئەکەن. . !

 

ئەنجومەنی گوشار لە تاراوگە

  • 01. 2015