بەڕێوەبەرایەتیی پۆلیسی‌ پارێزگای هەولێر ڕایگەیاند، گەنجێك لە شارۆچكەی‌ خەباتی‌ سەر بە پارێزگای‌ هەولێر، گوللـەیەكی‌ بە سەری‌ خۆیەوە ناوە و زامدار بووە، پاش گەیاندنیشی بۆ نەخۆشخانە، لەبەر سەختیی برینەكەی گیانی لە دەست داوە.

نەقیب هۆگر عەزیز، وتەبێژ و بەڕێوەبەری ڕاگەیاندنی پۆلیسی هەولێر ڕایگەیاند، دوێنێ 21/11/2015، بنكەی پۆلیسی خەبات لە بوونی ڕووداوێكی خۆكوشتن ئاگادار كرانەوە، دوای لێكۆڵینەوەی پێویست دەركەوت كە گەنجێك بە ناوی (كاروان شەهاب ئە‌حمەد) كە لەدایكبووی (١٩٨٩)یە و پیشەی دوكاندارە، گوللـەكی‌ بە سەری‌ خۆیەوە‌ ناوە و خۆی‌ كوشتووە.

نەقیب هۆگر دەشڵێت، گەنجە دەمانچەی‌ لەناو ماڵەكەی‌ خۆیدا بووە و دوای‌ ئەوەی‌ گوللـەیەكی بە سەری‌ خۆیەوە ناوە، بە سەختی‌ بریندار بووە، بەڵام پاش گەیاندنی بۆ نەخۆشخانەی فریاكەوتنی ڕۆژئاوای هەولێر، لەبەر سەختیی برینەكەی گیانی لە دەست داوە.

بەڕێوەبەری ڕاگەیاندنی پۆلیسی هەولێر ئاماژە بۆ ئەوەش دەكات، وتەی برای ئەو گەنجەیان وەرگرتووە كە خۆی‌ كوشتووە و گوتوویەتی‌ براكەی كێشەی‌ لەگەڵ كەسدا نەبووە و تەنیا باری‌ دەروونی‌ تەواو نەبووە و بەردەوام دڵتەنگ بووە.

گوتیشی، دادوەری لێكۆڵینەوە بڕیاری دا وتەی شاهیدانی ڕووداو وەربگیرێت و لێكۆڵینەوەی تەواو بكرێت بۆ گەیشتن بە هۆكاری ڕاستەقینەی ڕووداوەكە و، تا ئێستایش لێكۆڵینەوە بەردەوامە.

 

ڕاگەیاندنی پۆلیسی هەولێر

 

ئومێد بابان

This email address is being protected from spambots. You need JavaScript enabled to view it.