لەجاری پێشوودا (جەمیل بایک) و بایکچییەکان وەک تاقیکردنەوە لێدوانیان داو لە خەیاڵی خۆیاندا وایان دانا کە، ئیدی شنگال پێویستە بکرێتە کانتۆن، دوێنێیش لەسەر چیای شنگال ئەنجوومەنێکی کارتۆنیان بەناوی کانتۆنی شنگال راگەیاند. ئەم ئەنجوومەنە بێئەوەی دەسەڵاتی سیاسی و ئیداری و نوێنەری راستەقینەی کوردانی ئێزیدی شنگال بێت، پەکەکە لە خەیاڵی خۆی کیشاویەتی و ناوی ناوە کانتۆن، بەڵام لە واقیعدا ئەو کانتۆنە جگە لە مەڕامێکی ئاژاواگێڕی و هەڵگیرساندنی فیتنە و حەسادەتی سیاسی و زەمینە خۆشکردن بۆ دەستێکی دەرەکی؛ هیچی دیکەی لە هەگبەدا نییە. سیاسەتکردن مەنتق و عەقلانی و هێزە، ئاخر پەکەکە لە شنگال نە هێزە و نە مەنتقە و نە چوارچێوەیەکی یاساییشی هەیە، دەبێ ئەمجارە کێ پەکەکەی هاندابێ بۆ ئەوەی خەیاڵی چەند کەسێکی دەمامکداری دەرەکی بخاتە سەر ڕووی کاغەز و پەڕاوەکانییەوە و، بەڕێگەی وشە دڵی ناحەزانی گەلی کورد خۆش بکات. . ؟

تادێ، پەکەکە هەستی نیشتمانپەروەری لاوازتر دەبێ، لەکاتیکدا کە، وادەی کۆنگرەی نەتەوەی نزیکدەبێتەوە ئەوان بۆ ئاژاوە نانەوە تا یەکڕیزی ماڵی کورد لە ئاست هەر چوارپارچەی کوردستان درزی تێبکەوێ و، بێبەرنامەییان لە خەباتی سیاسی کوردایەتی پێحەشار بدەن، رۆژ دوای رۆژ لێدوانی سەیر و خەیاڵی سەیر دەکەن، جارێک (جەمیل بایک) دەڵێ کانتۆن بۆ شنگال و کەرکووک پێوستن، جارێک (دەمیرتاش) کە کوردی نازانێ و باسی گەڕانەوەی شنگال بۆ سەر عێراق دەکات، جارێکی دیش (سۆزدار ئاڤێستا) لە چیای شنگال دەڵی کانتۆنی شنگال، ئاخر ئەو هەموو لێدوان و هەڵایەیەی پەکەکە کە گڕی لێ هەڵساوە خۆ دەزانرێ لەکوێوە سەرچاوەی گرتوون و لە کوێەوەیش فوو دراون و بە پیلانی کێ دەجوڵێنەوە.

پەکەکە، باش دەزانێ کە، دەستبردن بۆ شنگال یاریکردنە بە ئاگر، ئەگەر فوو بکەنە ئاگرییشەوە دوا جار دەمی خۆیان پێدەسوتێ، چونکە شنگال ناسنامەی کوردستانییە و ئیدارەی ئەو شارۆچکەیەش دەمێکە بڕیاریداوە کە لەژێر دەسەڵاتی هەرێمی کوردستانەوە دەژین و نایەنەوێ سەر بە عێراق بن.

پەکەکە، نیازی راستەقینەی دەرکەوت کە، چاوی بە سەرکەوتنەکانی هێزی پێشمەرگە هەڵنایە، چاوی بە دەستکەوتی هەرێم و ئیرادەی سەرکەوتوانەی گەلی کوردستان هەڵنایە، بۆیە ئەوان بێڕێزی بەرانبەر خەباتی کوردانی ئێزیدی دەکەن و؛ دەیانەوێ لەوێدا درز بخەنە نێو ماڵی کورد کە، ئامانجیان تەنیا شنگال نییە، بەڵکە ئامانجیان تێکدانی کۆنگرەی نەتەوەیی و ئەو دەرفەتە مێژوویەیە کە لە ئێستادا جیهان بە سەرسامییەوە باسی سەرکەوتنی ئەزموونی هەرێمی کوردستان و دۆزی گەلی کورد و سەرکەوتنی هێزی پێشمەرگە لە ژێر فەرمانڕەوایی (سەرۆک بارزانی) دەکات.

پێشووتریش گوتومە ئەم دژایەتییەی پەکەکە لە ساتەوەختێکی وەهادا بۆچی کەوتوونەتە دژی گەلی کورد، دەیانەوێ بڵێن خەونی پەکەکە و ئامانجی ئەوان عێراقێکی یەکگرتووە، یان بە مانایەکی دی، نابێ هەرێم بەرە و دەوڵەتی کوردی هەنگاو بنێ. . ؟ ئەدی سیستمی خۆسەپاندنی عەسکەرتاری، لە ئەجێندای پەکەکەدا چ خزمەتێک بە دۆزی ڕاستینەی کورد دەکات؟ ئەو سیاسەتەی کە ئێستا (بایک) و بایکچییەکانی وەک (دەمیرتاش) لە دژی سەربەخۆیی هەرێمی کوردستان پێڕۆی دەکەن و، خەونی داگیرکاران و ناحەزانی گەلی کورد بەرۆکی گرتوون، وایکردووە کە، هێرشی وەها بێبنەما و توند بکەنە سەر هەنگاوەکانی دروستبوونی دەوڵەتێکی نیشتمانیی دیموکراتی لە هەرێمی کوردستاندا.

پەکەکە کە لە سنووری تورکیادا نەیتوانیوە تەنیا ئیدارەی یەک گوند بکات، بۆچی ناچن لەوێدا کانتۆن دروست بکەن؟ لەوێدا سیاسەتی دروستکردنی کانتۆنەکان پێڕەو بکەن کە، بەهۆی سیاسەتی پاشکەوتووی ئەوان و؛ ئەو پیلانگێڕیانەی لەوێشدا پێڕۆی دەکەن دۆزی کوردیان لە باکووردا پاش خستووە.

پەکەکە کە، دەستێکی دەرەکی لەپشتە و فوو دراوە بە سیاسەتێکی دژایەتی گەلی کورد، مەحاڵە ئەو خەونەی بۆ بێتە دی، چونکە لێرە سیاسەتکردن خەیاڵ نییە، مەنتق و یاسا و هێز و ئیرادەیە، بۆیە وا باشترە ئەوان ئەگەر خەیاڵی دەستی دەرەکی دێننە دی، شوێنگەلێکی دی هەن کە رووی تێبکەن، چونکە دەرگای هزری کوردانی ئێزیدی بەسەر ئەو بیرۆکە دەرەکیانەی پەکەکە، داخراون. پەکەکە کە لە ئیستادا سیاسەتی کانتۆنە و گشت کانتۆنەکانیشی کارتۆنین، بۆیە دەڵێین پەکەکە بەو سیاسەتە پەککەوتە بووە.