زۆرن نووسەرانی كورد دڵسۆزانە دەربارەی پرسی ئێران وتار و بابەت دەنووسن. زۆربەی هەرە زۆريشيان «كوردانە» ئەمكارە دەكەن و باش دەزانن حكومەتی ئەو وڵاتە تا چەند دژە بەرانبەر بە كورد و كوردستان هەروەك چون دژە بە ئازادی و ئازايخوازان و هەروەها مافەكانی مرۆڤ و پێكەوەژيان لەگەڵ دراوسێكانی.

لەگەڵ رێزی بێ پايانم بۆ ئەمجۆرە نووسەرانە. .

بەڵام بە پێچەوانەوە. . زۆربەی هەرە زۆری ئەم نووسەرانە خۆيان لە شتێك لادەدەن كە جێی سەرنج و تێڕامانينە. . ئەويش ئۆپۆزيسيۆنی ئێرانی بە گشتی و هێزی سەرەكی ئۆپۆزيسيۆن واتا «رێكخراوی موجاهيدينی خەلقە».

كاتێ باس لە كێشەيەك دەكرێت پێويستە باس لە چارەسەريش بكرێت، كاتێ باس لە نەخۆشی و ناساغی دەكرێت ناكرێ باس لە پزيشك و دەواودەرمان نەكرێت. كاتێ باس لە دوژمن دەكرێت ناكرێت دۆست فەرامۆش بكرێت و خۆی لێ لابدرێت ياخود بە نادياری بمێنێتەوە. .

ئەگەر قووڵ بچينە ناو ئەم بابەتەوە و توێكاری بۆ بكەين ئەوەمان بۆ روون و ئاشكرا دەبێت كە ”نووسين بە ناتەواوی" زيانی خۆی هەيە و بگرە لەوانەيشە كێشەكە قووڵتر و رێگاچارەكەيش دوور بخاتەوە و ئەوەش هەمان شتە كە حكومەتی ئێران خوازياريەتی و لە پێناويشيدا ئيشی بۆ كردووە بۆ ئەوەی نەيارانی ئەو حكومەتە خۆی لێ لابدەن و هەر باسی نەكەن و لەگەڵ ئەوەدا زۆريش كاری كردووە بۆ دێواندنی ئۆپۆزيسيۆنی ئێران و شێواندنی سيمای راستەقينەی هێزی سەرەكيی ئۆپۆزيسيۆنی ئێرانی واتا موجاهيدينی خەلق و هەر سەركەوتن و دەستكەوتێكی ئۆپۆزيسيۆنيش بە جۆرێك دابپۆشێت ياخود كاڵی بكاتەوە كە جێگەی خۆی نەگرێت، بە تايبەت لە رووی ميدياييەوە و هاوكات زوڕنای خۆی بژەنێت بۆ قەڵبكردنی راستييەكان و چەواشەكاری.

لە ئاستی كلتووری و ئايديۆلۆژياييەوە لە ناو ئێران موجاهيدين بە «مونافق» ناو دەبات كە «خراپترە لە كافر» و هەر بۆيە دەبێ «بكوژرێن» و «لە سێدارە بدرێن» و . . . هتد.

لە باشووری كوردستان وای شێواندووە كە گوايا موجاهيدين «كوردكوژ»ن و بەشدارييان كردووە لە سەركوتكردنی راپەڕينی كورد لە ساڵی 1991 و . . . هتد.

لە ئاستی نێودەوڵەتيدا دەوڵەتانی بەو لايەدا بردووە كە گوايا موجاهيدين تيرۆريست و سێكت (sect)ن و . . . هتد.

لە كاتێكدا مونافق و كوردكوژ و تيرۆريست هەر خۆيەتی و دوای سی و چەند ساڵ دەسەڵاتی رەشی كۆماری ئيسلامی كەس گومانی لەوەدا نيە كە سەر و بنی كێشە و قەيرانەكانی رۆژهەڵاتی ناوەڕاست هەڵقوڵاوی هاتنە سەر كاری ئەم حكومەتەيە لە ساڵی 1979 كە لە رەوتی پلانێكی ماڵوێرانكەری فۆندەمێنتاليزمی ئيسلامی و ئاسانكاريی زلهێزەكانی ئەم سەردەمە لەبەردەم شۆڕشی گەلی ئێران قوت بووەوە و ئێستاش زۆڵی وەك قاعيدە و داعشی سوننە! و ميليشيای شيعە! و حوسی و حيزبوڵڵای لوبنان و . . . لێكەوتووەتەوە.

ئەوە هەڵەيەكی زۆر گەورەيە كە ئەو «زۆڵە هێز»انە لە حكومەتی ئێران جيا بكرێنەوە. . چون لە رووی ئايديا و فكر و هزر و روانگە و سۆنگەوە يەك شتن، با بە جل و بەرگ و ناو و ئاڵاو و درووشميشەوە بە رواڵەت جيا بێنە بەر چاو. هەڵەی زلهێزەكانيش هەر لێرەوە سەرچاوە دەگرێت كە لە ترسان بێت يا لە برسان، حكومەتی ئێران بە بەشێك لە «چارەسەر» بزانن بۆ رووبەڕووبوونەوە بەرانبەر بە داعش، هەرچەند ئێستا ئەم تراويلكەيەيش بەرەو توانەوە دەچێت و پێكهێنانی ئيئتيلافی ئيسلامی هەنگاوێكی گەورە و گرينگە بۆ بەرەنگاربوونەوەی ئەم تراويلكەيە و راستكردنەوەی هەڵەكانی پێشوو كە بە دەوڵەتانی رۆژئاوا نەكرا و پێويستە دەوڵەتان خۆيان بێنە دەست. هەرچەند پان كردنەوەی سەری مارەكە لە ناو ئێران، كاری هيچ لايەن و دەوڵەتی دەرەكی نيە و تەنها و تەنها بە ئۆپوزيسيۆنی ئێران دەكرێت!

ئەگەر نووسەری كورد سەيری راگەياندنەكانی حكومەتی ئێرانيش بكات زۆر بە باشی بۆی دەردەكەوێت كە هێزی رووخێنەر و بە توانای بەرانبەر به كۆماری ئيسلامی كێيە و نووسەری كورديش هەر ئەوە بە راست ببينێت و خۆی لێ لانەدات و له‌ نووسینه‌کانیدا وه‌ک راستییه‌کی حاشاهه‌ڵنه‌گر باسی بکات و خۆی له‌ شتی لاوه‌کی دوور رابگرێت.

موجاهيدينی خەلق هێزێكی سياسی و سەراسەرييە و خاوەن پەنجا ساڵ خەبات و تێكۆشانە بەرانبەر بە هەر دوو حكومەتی حەمەڕەزاشای پەهلەوی و حكومەتی كۆماری ئيسلامی و رۆڵەی هەموو نەتەوەكانی ئێران لە خۆ دەگرێت و لە ناوياندا كورد كە لە ريزی شەهيدانيدا بە هەزاران كورد بەرچاو دەكەوێت.

تايبەتمەنديی هەرە دياری ئەو رێكخراوە سووربوونيەتی لەسەر ئامانجی رووخاندنی ئەو حكومەتەی بە ناوی ئيسلامەوە كار دەكات و هه‌رگیز لای نەداوە لەو ئامانجە و نرخێكی هەرە زۆريشی پێشكەش كردووە لە پێناويدا و هەوڵی ئەوەيشی داوە هێزگەل و دەوڵەتانيتريش لە پێناسە و مەترسييەكانی ئەو حكومەتە وريا بكاتەوە و ئەگەر بە راستی ئەو رێكخراوە نەبووايە ديار نەبوو جيهانی هاوچەرخ لەسەر دەستی حكومەتی ويلايەتی فەقيهی چی بەسەر دەهات بە تايبەت لە رۆژهەڵاتی ناوەڕاست و لە ناوياندا كوردستان؟!

ئەوەی رێكخراوەكە شانازی پێوە دەكات ئاڵاهەڵگری و پێشەنگبوونيەتی بەرانبەر بە فۆندەمێنتاليزمی ئيسلامی كە بە هاتنە سەر كاری حكومەتی كۆماری ئيسلامی لە ساڵی 1979وە دەست پێدەكات.

وەك يەكێك لە گەورەبەرپرسانی پێشووی ئەمريكا لە وتارێكدا لە گردبوونەوەی ساڵانەی ئۆپۆزيسيۆنی ئێرانی وتی، دەوڵەتانی زلهێز بەوانەش نەوەستان و ”بەرد”ەكەيان بەستەوە و ”سەگ”ەكەيان لە خەڵك بەردا. واتا موجاهيدينی خەلقيان خستە ناو ليستی تيرۆروە و دەستی كراوەيان دا بە حكومەتی ئێران با بە ئارەزووی خۆی كار بكات. چ لە ناو زيندانەكاندا و چ لە عێراق و كامپی ئەشڕەف و چ لە سوريا و لوبنان و يەمەن و بگرە وڵاتانی رۆژئاوا.

لە بەرانبەردا موجاهيدين بە پشت بەستن بە خۆيان و گەلەكەيان و لايەنگرانيان بە رێگەی ياسا و دادگاكاندا پەتی تيرۆريان لە مل خۆيان كردەوە و وا دەيكەن بە ملی دەسەڵاتدارانی ئيرانەوە. ئەوەش هەنگاوێكی دەگمەنە لە مێژوودا كە هێزێكی ئۆپۆزيسيۆنی ئابڵۆقەدراوی ئێرانی بتوانێ خۆی بگرێت و نەسرەوێت و بە سەركەوتن بگات بەرانبەر بەو هێزە هاوەبەشە زەبەڵاحە بەرژوەنديخوازەی جيهانی بورژوايی كە لە ماوەی سی و چەند ساڵی رابردوودا پاڵپشتيكاری حكومەتی ئێران بووە.

ئەوەی راستی بێت تێگەيشتنی بەرپرسانی حكومەتی ئێرانە لە پێوەند لەگەڵ پێگە و پێناسە و ئايندەداريی موجاهيدين كە بەڵگەی ئەم راستييەيە. دەسەڵاتدارانی ئێران ئەوان ئەوە ناشارنەوە كە هۆكاری هەموو شكستەكانيان موجاهيدينی خەلق بووە . چ لە ئاشكراكردنی پرۆژە ئەتۆمييەكانی رژێم، يا ئاشكراكردنی پێشێلكارييەكانی رژێم لە پێوەند لەگەڵ مافەكانی مرۆڤ لە ناو ئێران كە تا ئێستا 62 جار لە لايەن رێكخراوی نەتەوە يەكگرتووەكانەوە شەرمەزار كراوه و هەروەها لە ئاشكراكردنی زانيارييەكانی تايبەت بە دەستتێوەردانەكانی ئەم رژێمە لە كاروباری وڵاتان بە گشتی و عێراق و سوريا بە تايبەتی. هەر لەو راستەوە ئەوەى لە كامپی ئەشڕەف و ليبرتی لە عێراق رووی داوە بە ئێستايشەوە گرينگی تايبەتی خۆی هەيە و جيا نيە لە پرۆسەی خەبات و تێكۆشان لە پێناو ئازادكردنی ئێران.

با بە تێهەڵكێشكردنی ئەم راستييە، نووسەری كورد ئامانجی خۆی بپێكیت و نووسينەكەی بەری خۆی بدات و بە ناتەواوی جێی نەهێڵێت.

لەگەڵ رێزی دوبارەم بۆ سەرجەم نووسەرانی كورد لە هەر كوێيەك هەن. .