لەكاتێكدا یادی دامەزراندنی شاری سلێمانیی خۆشەویست دەكەینەوە، ئەو شارە جوانەی كوردستان كە چەندین نازناوی بەرزی هەڵگرتووە و گوزارشت لە شكۆمەندیی ئەو شارە دەكەن، ئا لەم كاتەدا كۆمەڵێك بەناو رۆشنبیر و خوێندەواری دانیشتووی شاری سلێمانی كە لە بنەڕەتدا خەڵكی ئەو شارە نین، كەچی دەستیان كردووە بە سلێمانچێتی و بەناوی سلێمانییەوە شەڕی شارو ناوچەكانی تری كوردستان دەكەن، تومەز شاری سلێمانی بە شاری رۆشنبیری و پێشكەوتن و هەڵمەت و قوربانی ناسراوە، ئەو كۆمەڵە نەدی و بدییە خۆ بەوە هەڵدەكێشن كە گوایە خەڵكی ئەو شارەن و هەر بەناوی سلێمانییشەوە جنێو و سووكایەتی بە خەڵكی شارەكانی دیكەی كوردستان دەكەن، ئەوانە بۆ مەرامێكی تایبەتی و سیاسیی خۆیان ئەو رەفتار و هەڵوێستە ناڕەوا و ناشایستەیە دەنوێنن، بە نموونە بەراوردی مەوداكانی ئازادی لە نێوان سلێمانی و بە نموونە شاری هەولێر دەكەن و لە رووپەڕی رۆژنامەكان و شاشەی تیڤییەكانەوە پەلاماری شاری هەولێر و ناوچەی بادینان دەدەن و لە پاڵ روانگەی سیاسییانەوە ئەوە بە گوێی خەڵكیدا دەدەن كە گوایە لە هەولێر پانتایی ئازادی و ئازادیی رادەربڕین نییە، لەو شەڕە سیاسییەیاندا دەیانەوێت بەو گوتە درۆزنانەیان پەلاماری پارتێكی سیاسیی دەسەڵاتدار بدەن و قسە و بوختانی بێ‌ مانا هەڵبەستن، ئەوانە ئازادی تەنها لەو روانگەیەوە دەبینن و تا ئەو شوێنە ئازادن كە لە سلێمانییەوە نەك هەر رەخنە بەڵكوو جنێو و قسەی سووك بەرامبەر بە پارتی و شاری هەولێر و ناوچەكانی تر بدەن و تۆمەتی درۆیینە هەڵبەستن. ئەوانە بە راددەیەك تامەزرۆی خۆدەرخستن و دەركەوتنی سەر شاشەی تیڤییەكانن كە باكیان بەهیچ نییە و گوێ‌ نادەنە ئەوەی كە چ شەكرێك دەشكێنن و چ گەرایەكی پیس لەناو كۆمەڵدا دەڕێژن و ئاكامەكەی لە رووی كۆمەڵایەتی و سیاسییەوە چی دەبێت! . سەیریش لەوەدایە كە بەشێكی زۆریان بانگەشەی بێلایەنی دەكەن و هەیانە سەرنووسەری گۆڤار و رۆژنامە و بڵاوكراوەی بەناو سەربەخۆ و ئەهلییە!

بەڵام بە هیچ شێوەیەك ئەو هەڵسوكەوت و رەفتارانە لە خەڵكی رەسەنی شاری سلێمانیی خۆشەویست ناوەشێتەوە، تەنانەت زۆر نیگەرانیشن لە رەفتار و هەڵوێست و هەڵسوكەوتی ئەو كۆمەڵە بەناو رۆشنبیر و خوێندەوارانە كە مێژووی پیرۆز و جوان و درەوشاوەی شارەكەیان لەكەدار دەكەن. ئەو كۆمەڵە كەسە گومانلێكراوانە یان بیریان چووە یان خۆیان لە گێلی دەدەن كە شاری سلێمانی شاری نیشتمانپەروەر و تێكۆشەران و دڵسۆزانە، ئەو شارەیە كە شانازی بە سەركردە و رەمزە مێژووییەكانییەوە دەكات، ئەوانە چونكە خەڵكی ئەو شارە نین و نەك ئاگاداری مێژووی دوور، بەڵكوو ئاگاداری مێژووی نوێی ئەو شارەش نیین، ئاخر هەر دوێنێ‌ بوو كە رووفاتی نەمران مستەفا بارزانی و كاك ئیدریس لە رۆژهەڵاتی كوردستانەوە گەڕێندرانەوە بۆ باشووری كوردستان و كاتێك بە شاری سلێمانیدا كەژاوەی رووفاتی نەمران رەتدەبوو، بینرا كە چ ئاپۆرایەكی گەورەو بێوێنەی خەڵكی سلێمانی لە پێشوازییاندا بوون و چ شین و ماتەمینییەك بەڕێوەچوو كە ئەوپەڕی هەستی خۆشەویستی و دڵسۆزیی خەڵكی سلێمانی دەرخست بۆ رابەرو سەركردەی نیشتمانەكەیان ! ئەمەیە روانگە و هەستی پاك و كوردپەروەرانەی شاری سلێمانی، نەك ئەو كۆمەڵە بەكریگیراو و نەزان و نەخوێندەوارانەی بەناوی میدیاكار و نووسەر و رۆژنامەنووس و چاودێری سیاسییەوە و بەشێكیشیان بەناوی بێلایەنییەوە لە سلێمانییەوە و لەسەر حیسابی ئەو شارە خۆشەویستەوە شڕۆڤەی بێمانا و دوژمنكارانە و لایەندارانەبۆ بارودۆخ و رووداو و بابەتەكان دەكەن. تكایە چیتر رووی درەوشاوە و مێژووی سلێمانی ناشیرین و لەكەدار مەكەن و واز لەو كارە ناڕەوایە بێنن.