ساڵی ١٩٧٠ ئەو کاتە پێشمەرگەی حیزبی شیوعی بووم، مەقەڕمان لە گوندی (قەواڵی ) بوو لە ناوچەی گەرمیان هەر لە قەواڵی ئاشنایم پەیداکرد لەگەڵ کەسێکی تەمەن چل ساڵەی باریلکەلەی چاو شین و سورکەلە بەناوی کەریم کۆمەنیست. ئەم زاتە جوتیارێکی هەژار و نەخوێندەوار و قسەخۆش بوو. ماوەی چەند ساڵێ پێش ئەو مێژووە ئەویش پێشمەرگەی حیزب بوو لەو لقە، واتە لقی چواری گەرمیان. زۆر جار هاوڕێ کەریم کۆمەنیست بۆیدەگێڕامەوەو دەیگوت: ئەوکاتەی من پیشمەرگەبووم شێخ عەطا طاڵەبانی سەرلقمان بوو، هەرکاتێ جوڵەمان ئەکرد لە دێهاتەکان، شێخ عەطا ژمارەیەکی زۆری کتێبی ئەدا بە کۆڵما و بە منی هەڵدەگرت، ئیتر زۆر ماندوو بووم و زۆر بێزار بووم، تا ڕۆژێک گەشتە تینم و ووتم (ئەرێ یا شێخ ئەم کتێبانە سودی چیە وا تۆ بەردەوام من ماندوو ئەکەیت و ئەیدەی بە کۆڵما؟ لەمەودوا هەڵیناگرم. ئیتر شێخ عەطا بەدەم پێکەنینەوە یەکسەر وەڵامی دامەوەو ووتی: هەڵیگرە هەی بێ عەقڵ، ئەو کتێبانە منی کردووە بە ڕەفێقی تۆ، دەنا کەی من ڕەفێقی تۆم. )

ئەلحەقی هەر وابوو، شێخ عەطا کەسایەتی ناسراوی ناوچەی گەرمیان و کفری بوو، خاوەن موڵکێکی گەورەو دەوڵمەندێکی ئەو ناوچەیە بوو. لەبەر ئەوەی کەسایەتیەکی شیوعی و نیشتیمان پەروەر و ڕۆشنبیر بوو هەر بە تەئسیری کتێب بوو بە هاوڕێی کەریم کۆمەنیست و جوتیارەکانی تر. بەردەوام لە خزمەتی جوتیار و خەڵکی ناوچەکەدا بوو. جێگەی خۆیەتی لە ڕۆژی کتێب باس لە گرنگی کتێب بکرێ، چونکە کتێب مێژوویەکی زۆر کۆنی هەیە، ڕەنگە هەر لەگەڵ پەیدابوونی مرۆڤ، کتێبیش پەیدا بووە، کتێبیش وەکو مرۆڤ بە چەند قۆناغێکی مێژوویی تێپەڕیوە. لە ڕۆژگارە کۆنەکان لەسەر بەرد هەموو شتێ نوسراوەو دواتر چەرم و کاغەز بەکارهێنراوە. کتێب بەرهەمی خەبات و ماندوبوونی جەستەو عەقڵی مرۆڤە، سەرچاوەیەکی زێڕین و پڕ بەرەکەتە، ئەرشیفە بۆ کۆکردنەوەو پاراستنی هەموو زانیاریەکان لە توێژینەوەو بۆچوونی نووسەر و زاناو فەیلەسوفە مەزنەکان سەبارەت بە ئەدەب و مێژوو و جوگرافیاو فەلسەفە و پزیشکی و فیزیا و کیمیاو بیرکاری و زەراعەت و سەنعەت و هتد. هەر کتێبە ڕامان ئەکێشێ بۆ چارەسەر کردنی کێشەو گیروگرفتە سیاسی و کۆمەڵایەتیەکان، بۆ چاکسازی و پێشکەوتنی ووڵات، بۆ ڕاپەڕین و شۆڕش و بەرخۆدان، هەر کتێبە پەلکێشمان ئەکات بۆ ژیانێکی جوانتر و باشتر و پێشکەوتووتر، ئەمانبات بەرەو ئەستێرەکان و دنیایەکیتر.

کتێبخانە باخچەیەو کتێبەکانیش گوڵزارەو هەر یەکە ڕەنگ و بۆی جیایە. گوڵێک مەستمان ئەکاو ئەمان خاتە پێکەنین، جوانی و رێز و خۆشەویستی ئەچێنێت لە دەروونمان. گوڵێکیتر غەمبارمان ئەکاو ئەمانخاتە گریان و سۆز و بەزەیی و هاوکاری و یارمەتی کەسانیتر ئەچێنێت لە ڕووحماندا. گوڵێکیتر ئەمانخاتە سەر کەشتیەک و بەناو دەریای پان و بەرین و بێ سنوور لە عیلم و مەعریفەت ئەمانبات و هەر ئەمانبات. ئەبێ ئەوەشمان لەبیر نەچێ باخچە جیا لە گوڵەکان گیاکەڵەو دڕک و داڵیشی تێدایە کە هەر دڕکێک بە جۆرێک ئازارمان ئەداو زیانمان پێدەگەیەنێت، دڕکێک داماوی و دەردەسەری و وێرانکاری زۆرمان بۆ ئەهێنێ، لە شەڕ و کوشتار و ئەنفال و تاڵانی و جەردەیی، دڕکێکی تر وەکو خێو ناوبەناو سەرهەڵئەداو وەک ڤایرۆسێکی پیس هەوڵی تێکدانی ئەقڵ و ئەخلاقمان ئەداو کلتورمان ئەشێوێنێ و بە بارێ ڕیش و سمێڵی لەبنا قرتاوو پانتۆڵێکی کوڵ و جبەیەکەوە، هەر بە زۆری زۆرداری و هەر بە ختوخۆڕایی پەلکێشمان ئەکات و بەرەو تاریکی و جەهالەت ئەمانبات. ئەبێ رٶژی کتێب پیرۆز ڕاگرین و هەموو ڕۆژێکمان بکەین بە ڕۆژی کتێب و پارێزگاری بکەین لە کتێب.