(1)

ئه‌و ژنه‌ی

له‌ ڕه‌نووی هزره‌ مایه‌پووچه‌كانه‌وه‌

كه‌وتووه‌ته‌وه‌. .

ئه‌و ژنه‌ی

ڕه‌شه‌بای پۆشیوه‌ و

شه‌ڕی سپێده‌ده‌مان ئاگرده‌دا و

چاو له‌ ئێواره‌ داده‌گری. . .

ئه‌و ژنه‌ حسابێك بۆ كه‌س ناكا

نه‌ بۆ هێزی هاوپه‌یمانان،

نه‌ ئه‌نجوومه‌نی حوكم. . .

به‌ نیلۆفه‌ری چاوی،

هه‌موو هۆیه‌كی ژیانی له‌شار بڕیوه‌. . .

ئه‌ستێره‌ی له‌ ئاسمان خانه‌گومان كردووه‌

ده‌ستی پێ له‌كار كێشاونه‌ته‌وه‌. . .

له‌ میوانداری مه‌رگدا

كه‌ خوێندنه‌وه‌یه‌ك نامێنی،

با خۆی ڕووت ده‌كاته‌وه‌

چیاكان سه‌ر له‌بن گوێی یه‌كتر ده‌نێن. . .

ژنێك ڕه‌شه‌با ده‌پۆشی

سپێده‌ده‌مان ئاگرد ده‌دا و

چاو له‌ ئێواره‌ داده‌گری. . .

ئه‌ستێره‌ ئیتر هه‌ڵنایێن. . .

ده‌ست له‌كارده‌كێشنه‌وه‌.

(2)

من خه‌ونێكی دیكه‌م نه‌بوو

ئه‌و ئازیزانه‌ی خۆشمویستن

داخ كه‌ پێیان نه‌زانیبوو

له‌گه‌ڵ ده‌ست له‌كاركێشانه‌وه‌ی ئه‌ستێره‌كان

ونم كردن.

(3)

له‌ خۆشه‌ویستی ده‌پرسی

چۆن دی و چۆن ده‌ڕوا؟!

بۆ هاتنی خۆشه‌ویستی هۆیه‌ك نییه‌

خۆشه‌ویستی هه‌میشه‌ دی. . .

(4)

شارم به‌ چۆله‌واری ڕۆحم سپارد

سۆز و چاوه‌ڕوانی و خه‌ونی مناڵیم

به‌م ده‌موده‌سته‌

له‌كوی بێنمه‌وه‌؟

كه‌ خۆم ئاگرم ده‌كرده‌وه‌ و

خۆم سڕ ببووم. . .

ئه‌و چاوانه‌ی

تریفه‌یان له‌ مانگ ده‌دزی و

باری (نوور) یان

له‌به‌ر ئاستانه‌ی خه‌راباتان لێ ده‌خست

ئه‌و چاوانه‌

نسێی خۆرئاوا بردنی. . .

(5)

ئه‌ستێره‌كان

ده‌ستیان له‌كاركێشایه‌وه‌. . .

پێویسته‌ چاره‌یه‌ك بۆ ئاسمان بدۆزرێته‌وه‌

له‌ میوانداری مه‌رگدا

خوێندنه‌وه‌یه‌ك نامێنی. . .

ئه‌یلوولی/ 2003


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.