وشه‌ لێوی بریندار كردم

جوانیه‌كی فێڵاوی. . . گه‌چڵاو. . .

بۆسه‌ی چرا كزه‌كانی ڕێگا

له‌ غه‌ریبیدا، دوور له‌لێوان

پیاڵه‌ی پڕی لێ ڕژاندم. . .

بێده‌نگیه‌ك

له‌شه‌ڕی ناوخۆی گوڵه‌كانی كه‌نار

ده‌زرنگێته‌وه‌.

شه‌وقی شاربه‌ده‌ر. . .

هه‌تاوی شه‌شده‌ر لێگیراو،

باڵوێزی ڕووباره‌ یه‌كگرتووه‌كانی به‌هه‌شت

له‌ مه‌مله‌كه‌تی قورینگان

بڵێسه‌ی ئه‌شكه‌وته‌كانی سرووش

نهێنی كوژانه‌وه‌ و هه‌ڵبوونیان هێنا. . .

حكوومه‌تی عیشقیان دامه‌زراند. . .

وه‌لی داخ سروودی ته‌مه‌ن

له‌گه‌ڵ تاوه‌ بارانێكدا ڕۆیی. .

په‌نجه‌ره‌ی عومر له‌ده‌ره‌وه‌ی گۆشه‌كانی سۆز

به‌سه‌ر چاوه‌ڕوانی ئه‌زه‌لیی نیشتمانه‌كه‌مدا ده‌ڕوانی.

……………………………………………………. .

……………………………………………………. .

پایز بێ و په‌نجه‌ره‌ت

به‌سه‌ر گۆلی قورینگان بڕوانی

سۆز و سه‌نگدڵی پێكه‌وه‌ ده‌بینی. . .

ده‌توانی شنه‌ی نه‌رم بپۆشی

گیرفانت له‌شه‌ونم پڕ بكه‌ی. .

له‌گه‌ڵ خه‌مه‌كانت كۆببیه‌وه‌

باس له‌ بارودۆخ و پێشهاته‌ هه‌نووكه‌ییه‌كان بكه‌ن.

هه‌ر ئیمێلێكت بوی

به‌گه‌ردنی قورینگانی بنێری. .

………………………………………………….

…………………………………………………. .

وه‌همێكی چه‌ند خۆشه‌

مرۆڤی دڵ هه‌لا هه‌لا

هه‌مو جیهان

له‌ قه‌رتاڵه‌یه‌كدا كۆبكه‌یه‌وه‌. .

شیره‌ی هێدمه‌ بوونه‌. . .

به‌خششی ژاڵه‌.

له‌كه‌ش و هه‌وای تاریكستان

له‌ خوَشه‌ویستیه‌ك ده‌چی

هیچ حكوومه‌تێك دانی پێدا نانی

هیچ فراكسیۆنێكی په‌رله‌مان پشتگیری لێ ناكا

هه‌میشه‌ ون

هه‌میشه‌ ته‌نیا

هه‌میشه‌ بێ وێنه‌

تشرینی یه‌كه‌م/2002


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.