دەركەوت كە توركیا هەرگیز پلانی نەبووە، دژایەتی داعش بكات،  توركیا بەرژەوەندی لەگەڵ داعشدا هەبووە و هەیە هەرچەندە توركیا ئامادەیی خۆی بۆ شەڕی داعش راگەیاندوە، بەڵام هەموو مەبەستەكەی زیاتر بۆ دژایەتی كورد و لەباربردنی دەسكەوتەكانی كوردە بووە .

 قاعیدەیە و انصار السنە و . . . داعش هەرچی ناو و مۆدێلێک بووبن نەوەی سعودیەن ، ئەوانە جیهادیان کردۆتە میتۆدی خۆیان،  بۆ ئەوەی دەولەتی شانشنینی سعودیش لە بازاڕی سیاسی جیهاندا مامەڵەیان پێبكات .

چوونی توركیا بۆ ناو هاوپەیمانیی سەربازی لە ژێر سەركردایەتی پاشاكانی سعودیە بەناوی (هاوپەیمانیەتی ) لە دژی تیرۆر بێگومان دەبێتە كۆتایی هاتنی توركیا وەك وڵاتێكی شارستانی هاوچەرخ وە نمونەیەكی بێزراو لەبەر چاوی جیهانی دیموكراتی .

تورکیا و سعودیە، ئەگەر ئەجێندای تایبەت بە خۆیان هەبوو لە سەرەتای شۆڕش و ڕاپەرینی گەلانی سوریا،  ئێستاش بەرەوانەكردنی فرۆكەی جەنگی سعودی بۆ بنكەی ئەنجەرلیك زیاتر بۆ بە هاناوەچوونی توركیایە كەخەریكە بەهۆ ی چالاكیەكانی یەپەگەو بۆردومانی فرۆكەكانی روسیا  توركیا دۆخەكەی سوریا و ناوچەكەی لەدەست دەردەچێ. هەموو ئاماژەكان ئەوە دەخەنە روو كەهەر چارەسەرییەک بۆ پاراستنی بەرژەوەندییەکانی ئەو دوو وڵاتە لەپرسی سوریا، بەدڵنیاییەوە کارەساتی گەورەترو ماڵوێرانكەری بەدواوە دێت  .

واقیعی قوربانیدان و ئازایەتی هێزە كوردیەكان و بۆ زۆربەی وڵاتانی دونیای سەلماند كە جگە لەكورد لە بنەڕەتدا ئۆپۆزسیۆنی راستەقینە لە سوریا بوونی نەبوەو نییە، سەرجەم هێزەكانی تر تێکەڵەیەکن لە ئەجێندای تورکیا و سعودیە و قەتەر، كە كەرستەیەكی دەستتێوەردانیان بووە لە سوریا.

 ئێمە وەك كورد پێمان وایە ئەمریكاو روسیا و رۆژئاوا، پێویستە روانگەیان بگوڕن و بە چاوێكی دیكەوە لە ناوچەكە بروانن ‌و چیتر ئارامی‌و ئاسایشی جیهانی نەكەنە قوربانی ووزە‌و نەوتی كێڵگەكانی سعودیە‌و هاوپەیمانیتی توركیا.

چۆن دەكرێ وڵاتانی رۆژئاوا درك بە مەترسیەكانی تیرۆر نەكەن؟، لە هەمان كاتیشدا هەست بەوە نەكەن چەند هەڵەی گەورە دەكەن، كاتێ كە سازش و نەرمی دەنوێنن بەرامبەر بە ولاتی سعودیە كە نمونەیەكی دیارو بەرچاوە لە لانكەی تیرۆر لە جیهاندا، دوای ئەویش توركیا بەخێوكەرو هاوكارو ئاراستەكەری داعشە لە ناوچەكەدا .