سەڕەراى ئەوەى بەشێك لەوانەی خاوەن پێگەی سیاسین و لەلایەن زۆربەی خەڵکى کوردستان ناسراون، كەسانێكن بەردەوام شاشە دەگرن، لە ماوەیەكی كەم چەندین جار بۆ گێرانەوەی هەیبەتی سەروویان بەدرۆۆ دەخرێنەوە، خۆشیان بەو رۆلە ناشیرنەی خۆیان دەزانن و دەستبەرداریشی نابن .

كەسانی ناو دیار، قێزەوەن لە رەفتار، قەلەم فرۆش و نا بەرپرس و دۆراو، رۆژانە لە كۆڕ و كۆبونەوەكان لە رۆژنامەو سایتەكانى ئەنتەرنێت لەشاشەكانی تەلەفزیۆن، لەهەولی ناشرینكردن و بەلاڕێبردنی راستیەكانن، ئیش لەسەر سوككردن و نەهێشتنی دەقە یاساییەكان و شێواندنی بنەما شارستانیەكان دەكەن .

هەندێ لە شاشەكان ئامادەكراون بۆ خۆدەرخستن یا راستتر بلێن بەزۆر دەرخستنی هەندێک لە كاسەلێس و پیاوانی بەرپرسان لە رێگاى قەلەم فرۆش وگەل فرۆش و بێ هەڵوێستە قێزەوەنەكان، بۆ نوسین و لێدوانی درۆی سواوە، بەدەموچاوی ناشیرین و ناسراو، تا بە زمانێكی شڕ ئاراستە بكرێن، ئەركیان جگە لە ناشیرنكردنی میدیا، رۆلی لێكترازاندنی كۆمەڵگاش دەبینن .

خەڵكى كوردستان دەمێكە تێگەیشتووە لە مەرامى ئەم قەلەم فرۆش و بێ ئیرادانەى كە رۆلی ئەكتەری سیاسی وەردەگرن، ناوەكانیان لەخراپیدا بەدەو، رەفتارەكانیان قێزەوەنە وگوفتارەكانیان درۆیە هەرچەندە ئاستى رۆشنبیرى و بروانامەكانیشیان زۆر لە بەرپرسەكانیان بەرزترە.

دەكرێ بڵێن لەم وڵاتە هیچ شتێک لە شوێنى خۆى نیە، نە کەس کارى خۆى دەکات و نە لە هیچ بوارێک تایبەتمەندى هەیە، نە داهێنان بوونى هەیە و نە زەمەنى ئەمڕۆ كەسانی چاڵاک و ئەكتیڤ و خاوەن کەفائەت، دەتوانن رۆلی سەرەكی خۆیان ببینن .

پیشەرمانە چاولێكەری پەیرەو دەكەین، لەخراپ و چاك لاسایى یەكتر دەکەینەوەو لە چ شوێنێك پاروویەک نان هەبێت خەلك ڕووى تێدەکات، ئەمڕۆ هەموو جوانیەکان کاڵ بوونەتەوە، لە بیرکردنەوە و بیردۆز و گریمانەکان دابڕاوین. نە سوودمان بۆ خۆمان هەیە نە دەشکرێ دان بە ڕاستیەکان بنێین، خۆمان خولقێنەرى ئەو دۆخە پەنگ خواردووەین، هیچ فریاد ڕەسێکیش شک نابەین بۆ چاككردنەوەی دۆخەكە بێت بەهانامان .