ده‌ما جوت هه‌ڤژین ببینن به‌ردان باشترین چاره‌سه‌ریه‌، ژ قورتالبونا ئاریشه‌ێن هه‌نه‌ دناڤ به‌ر واندا. چوپێنه‌ڤێت کو هه‌ر ئێک چاڤه‌ریێ ژیانه‌کا خوه‌شتر و پێشبینێن به‌هرژینه‌کا دی یاسه‌رکفتیه‌. لێ به‌لێ ل وی ده‌می زیانڤێکه‌فتیێ هه‌ری مه‌زن زاروکه‌ کو ژیان لێ سه‌روبن ببه‌ و بکه‌ڤه‌ دناڤ کومه‌کا ئاسته‌نگێن مه‌زن دا، هه‌می ئالاڤێن ژیانێ لێ بێن گوهه‌رتن. نه‌خاسم ئه‌گه‌ر ئه‌ڤ روودان، د ده‌ستپێکا ژیێ وی دا به‌.

هه‌ر وه‌کی دیار، زاروک پشتگه‌رمێ دیبابانه‌ ژبو ب ده‌ستخستنا هه‌ر پیتڤیبونه‌کێ، دلینی و همبێزکرنا وان ژبو وی هه‌رتشته‌. هه‌می ده‌ما، ب دیتنا وان شاد و گه‌ش و چالاکه‌. دوری ڤان هه‌ردوو نیزیکا خوه‌ ڤه‌ده‌ر و لێ هلکه‌تی دبینه‌، وا هه‌ست دکه‌ کو ژبلی وان که‌سه‌ک دی ژ وی هه‌س ناکه‌. ڤه‌قه‌تاندن ژ ئێک ژ وان کارتێکرنه‌کا ئێکجار خراب لێ تێ کرن و دبه‌ سه‌ده‌م کو د له‌شێ خوه‌ دا ب ده‌قسه‌ و زێده‌ پێزانینن نوو ب دروستی وه‌رنه‌گره‌. دهه‌مان ده‌م دا یێ دامی و سه‌ر گرتیێ بیره‌وه‌ریانه‌، بیر ل وی ده‌می تێکرن کو که‌نگی جاره‌کادی کومبونا مالباتا وی بێ گڕێدان و ده‌ستێن وان ب گه‌هن هه‌ڤ. هێز و خوه‌شیا خوه‌ سه‌ر ژنو وه‌ربگره‌ڤه‌.

جڤاکا به‌ردان دناڤ دا مشه‌ و به‌رڤ زێده‌بونێ، نائێته‌ هژمارتن ژ جڤاکێن ساخله‌م و خوراگرتی. هه‌می گاڤا یا هوڤه‌کریه‌ ژبو هه‌ر بایكێ نه‌خوازیار. بنستر و رێزێن وێ دێ به‌ره‌ڤ ژبه‌رئێکچونێ چن. ئه‌گه‌ر بنگه‌هێن پیوه‌نیدار ژ به‌ری ژ ده‌ست ده‌ربکه‌ڤه‌ چاره‌سه‌ریه‌کا گونجای و بنبرکری ژ بو ڤێ پرسگرێکا مه‌زن ب زوترین ده‌م نه‌بینن. لڤێرێ ژی، پێتڤیه‌ ب سه‌ره‌رهێن پرسگریکێ بکه‌ڤن و ژ ریشالڤه‌ ئه‌ڤ ره‌ها ترسناک بێته‌ هلکێشان ژ له‌شێ جڤاکه‌کا هما هما سه‌ر پیا که‌فتی و خوه‌ دیتیه‌ د هه‌بونێ دا. هه‌لبه‌ت زێده‌ گرنگه‌ کو دور ژ دامونه‌ریتێن بیانی، سمینار و هه‌ڤدیتن د ڤی واریدا بێن ل دارخستن. ئاین و که‌لتور دێ رێکا چاره‌سه‌ریێ کورت که‌ن، ئه‌گه‌ر ب زانه‌بون بێنه‌ وه‌رگێران.

بێ گونه‌هی یا دیاره‌ لسه‌ر سیمایێ هه‌ر زاروکه‌کێ. ب کاکلا دلێ دیبابا و فێقێ مالباتێ و پێشه‌روژا جڤاکێ تێن نیاسین. ئه‌گه‌ر هه‌ر مروڤه‌ک خوه‌ ببینت مروڤ و هه‌ست ب زاروکیا خوه‌بکت. باوه‌رناکم چوجارا بکاره‌ نه‌خوه‌شیه‌کا مه‌زن و دیڤدرێژ بگه‌هینه‌ هه‌ر زاروکه‌کێ. رێکێ نادیت کو ناکوکێن وی ببه‌ سه‌دم کو ژیان لێ بێته‌ شیلاندن و نقوببه‌ د گولا هه‌ریه‌کا بێ مهره‌بانی و مروه‌تی دا.

 

سه‌دیق سنداڤی ـ ئه‌لمانی

ا