تا پێش دە ساڵ هەموولا لە حزبایەتیی تەسك بە گلەیی بوون، ئێستە گلەیی نەماوە. حزبایەتی هێندە تەسك بووەتەوە بە كونی دەرزییەوە دەچێ. پێش چەند ڕۆژێك گەنجێك بە توانج منی بە سەربە "هەڵڵای دەوڵەتی كوردی" ناودێر كردبوو. لەو دەمەی دنیا باس لە هەڵوەشانەوەی رێككەوتنی سایكس پیكۆ دەكات و لە شوێنیدا پێشبینی لە سەرهەڵدانی دەوڵەتی سەربەخۆی كوردی دەكات، گەنجی خۆمان لە بەری سلێمانی بەم باسە سەغڵەت دەبێ. ئەو پێی وایە، لەبەرئەوەی سەرۆك مەسعوود بارزانی، كە هێمای كوردە لەم دەمەدا و لە سەردەمی ویدا دەوڵەتەكە لەدایك دەبێ، ئیتر دەبێ ئەو دژی بوەستێتەوە و دەوڵەتی كوردی بە "درۆیەكی گەورە" ناو ببات. سەربەخۆیی خەونی كوردە با بڕیارێكی كوردیش نەبێ. بارزانی لە لووتكەی دۆزی كوردیدایە و لە رێی نۆینەیلی دیپلۆماسیوە رۆژانە هەست بە نێزیكبوونەوەی بەدیهاتنی ئەم خەونە دەكات. كابرای ئەو دیو دێگەڵە، سەبارەت بەوەی مام جەلال گوتوویەتی خەونی شاعیرانەیە، دەوڵەتی سەربەخۆ بەلایەوە نابێ بە ڕاستەكی. بۆ ئەوە ناچێ مام جەلال بۆ نیشاندنەوەی كەفوكوڵی ناحەز وای دەگوت ئەگینا هەموو ژیانی لە بەدیهێنانی سەربەخۆییدا بەڕێ كردووە. ساڵی هەشتاوحەوت لە گوندی كافێ بووین لەگەڵ هاوڕێیاندا، كتێبێكمان بۆ هات بە ناونیشانی (اغد وديمقراطي وحرمان شعب حتى من حق الحلم؟)، كتێبێكی زلیش بوو، رەنگە سێسەت لاپەڕە بووبێ. وەڵامێك بوو بۆ رۆژنامەی غەدی دیموقراتی، كە رۆژنامەیەك بوو، ساڵح دوگڵە ناوێكی بەغدایی لە سووریە دەری دەكرد. لە وتارێكدا گاڵتەی بە خەونی كورد لە سەربەخۆییدا هاتبوو. لەوە دەچوو كتێبەكە مام جەلال نووسیبێتی هەرچەندە ناوی كەسی بە سەرەوە نەبوو. بۆ ئەوەش نەزانن ئەو نووسیوێتی، لە زۆر شوێندا بە (ئوستاد جەلال تاڵەبانی) ناوی خۆی هێنابوو. ئەو دەمەی هێشتە ئاراس بە پێوە بوو، هەوڵم دا ئەم كتێبەم دەست كەوێ، بێ سوود بوو. ئەمەم بە نموونە هێنایەوە تا بزانن دەوڵەتی كوردی ئامانجی خەباتی مام جەلال و كاك مەسعوود و هەروەها كاك نەوشێروانیش بووە وەك گەورەپیاوەیلی كورد، بەڵام بارزانی وەك سەرۆك لەم ماوەیەدا گوتی (دەوڵەتەكە من رای دەگەینم). بێینەوە سەر حزبایەتیی تەسك. لە نووسینێكدا ئەگەر من بڵێم باڵەفڕەی شەڕكەری سعوودیەیی لە هێرشی سەر یەمەندا ژن و منداڵیان ئەنگاوتووە، دەبێ چاوەڕێ بم گەنجێكی ئەمبەری دێگەڵە بۆم بنووسێ (تۆ لە بەرژەوەندیی ئێراندا قسە دەكەی). كە بۆ بەرژەوەندیی ئێرانیش قسە بكەم، بە شێوەیەكی ئۆتۆماتیكی (بەلای ئەوەوە) دەكەومە سەنگەری دژی پارتی و بارزانی. تەنانەت بان كی مۆنیش پشتڕاستی بكاتەوە، كە سعوودیە وای كردووە، قسەكەی من (بەلای ئەوەوە) هەر بۆ گۆڕان و یەكێتی حسێبە لە ململانەی حزبایەتیدا. یان ئەگەر بنووسم باڵەفڕەی بەشار ئەسەد بەرمیلی (تەقێنەك)ی بەسەر خەڵكی بێواندا بەرداوەتەوە، گەنجێكی ئەوبەری دێگەڵە دەیباتەوە بۆ پێوەندیی من بە پارتیوە و لەوێشەوە بۆ رەجەب تەیب ئەردۆغان و بۆم دەنووسێ: ئەدی بۆ باسی ئەوە ناكەی توركیە چۆن باكوری كاول كردووە؟ گەنجی كورد گا بە گون دەناسێتەوە، بیر لەوە ناكاتەوە بەرژەوەندیی حزبایەتی لەم ناوچەیەدا ئەوەندە ئاڵۆز و تێكئاڵاوە ئاگەت لە خۆت نەبێ لە قسەدا دەكەویە سەت تەڵەوە. دكتۆر نەجمەدین كەریم هەوڵ دەدا كەركووك بكات بە هەرێمێكی سەربەخۆ. بێتو لەمەدا سەر بكەوێ، بەلای منەوە كەركووك گەورەترین هەنگاو بۆ گەڕانەوە پاڵی كوردستان دەنێ. كورد نەیتوانی بە دەستوور گێڕانەوەی كەركووك بەدی بهێنێ، نەشیتوانی وا بكات توركمان و عەرەب وەك بارێكی سەپاو سەر بە هەرێم بن، هەڵبەت بە شەڕیش ناتوانێ هەنگاوی گێڕانەوەكە بنێ. ئەوەی نەجمەدین دەیكات بڕینی نیوەی رێگەیە، تۆ كەركووك لە بەغدا دابڕێنی بۆ هەڵەیە؟ تەنیا نیو هەنگاوت دەمێنێ بە ئەركی داهاتوو. لەوانەیە بەری ئەودیوی دێگەڵە هەوڵ بدات كەركووك وەك هەرێمێكی سەربەخۆ لە داهاتوودا بداتە پاڵ ئەو هەرێمە سەربەخۆیەی سلێمانی، كە ئێستە كاری بۆ دەكات، ئەمەش ترازووی هێز لە نێوان ئەمبەر و ئەوبەری دێگەڵەدا دەگۆڕێ. سەیر كە لە چ گێژەنگەیەكی حزبایەتیداین؟ دەڵێی باسی كۆریای باكور و كۆریای باشوور دەكەین. قسەیەك لەم رۆژانەدا، كە تەپوتۆزی بە دوای خۆیدا هێنا، ساڵح موسلیم بوو كردی. گوتی: بەغدا تاكە دەریچەی ستراتیجییە بۆ هەر چوار پارچەی كوردستان، گوتی (من كورتی دەكەمەوە): دیمەشق ددان بە مافی كورددا نانێ، ئەنقەرە ناینێ تارانیش ناینێ، تاكە پایەتەخت (هەر هی وییە) بەغدایە لە زووەوە ددانی بە كورددا ناوە، لەبەرئەوە بەغدا تاكە شوێنە بشێ پێوەندیی ستراتیجیی لەگەڵدا ببەستین بێ ئەوەی تووشی بەسەردا خوێندنەوە و ئیملائات ببین. (تەواو). جوانترین و سیاسییانەترین قسە لەبارەی كورد و بەغداوە من بیستبێتم ئەمە بووە. با سەیر بكەین، هەرێمی كوردستان بە دەستوور لە 2003ەوە هەرێمێكی فیدراڵە، سەرۆكی خۆی هەیە، پەرلەمان و حكوومەتی خۆی هەیە، هیچ بڕیارێك لە بەغدا وەرناگرێ، بگرە چەند جارێك سەرۆكی هەرێم لایەنەیلی ناكۆكی بەغدای بانگ كردووە تا لە هەولێر پێك بێنەوە. سەركۆماری عێراق مام جەلال بوو، تا نەخۆش نەكەوتبوو، بەڵەنسی ناوەخۆی عێراقی راگرتبوو. ئێستەش سەركۆمار لە خۆمانە، وەزیری دەرەوە و جێگری سەرۆكی حكوومەت كورد بوون. بارستەی پەرلەمانیی كورد لە بەغدا پێش ماوەیەك تۆران و هاتنەوە، سەرۆكی پەرلەمان هات بۆ سلێمانی، دەست و پێی رامووسین تا ئاشت بوونەوە. هەرێم گوێی نەداوەتە دەستوور، پێوەندیی دیپلۆماسییانەی خۆی هەیە، هێزی پێشمەرگەی هەیە سەر بە بەغدا نییە، راستەوەخۆ نەوت دەفرۆشێ، ماوەی سێزدە ساڵە هەولێر لە بەرزییەوە دەڕوانێتە بەغدا، لەمەش زیاتری كردووە كورد و بەغدا هەر بۆی چەماوەتەوە، باشە ساڵح موسلیم چیی گوت ئێمە قەڵس بین؟ لە بەغدا مێتر بۆ كورد لە كوێ دەست كەوتووە؟ لەم رۆژانەدا راوێژكاری ئەنجوومەنی ئاسایشی هەرێم گوتی دوای بڕانەوەی شەڕی داعش، جگە لە كورد سونەش دەبن بە دەوڵەت. ئەم قسەیە هەرچەندە راستیشە، بەڵام دەرچوونی لە مەسروور بارزانییەوە، وەك سەپاندنی ویستی كوردی بەسەر عێراقدا هاتە ژماردن، كە ئەمەش راستییەكە ئاو لێڵ ناكات، كورد لە عێراق چۆنی بوێ وا دەكات.