زۆر نەنگییە، مامۆستایەكی زانكۆ لە لیستی ئاگادارییەكاندا ناوی خۆی بە (مصطفی) بنووسێت، وێژەوانێك لە بەرگی پەرتووكەكەیدا ناوی باوكی بنێت (علی)، ڕاگەیاندنكارێك لە ریپۆرتاژێكدا باپیری بە (طیب) ناو بێنێت، پزیشكێك لەسەر ڕەچەتەكەی بنووسێت (د. محمد)، ئەندازیارێك لەسەر تابلۆی باڵاخانەیەكی تەواونەكراودا سەرنجی پیادەڕۆیان بە ئەندازیار (جبار) ڕابكێشێت. . . و تا دوایی.

 

ئەو گرفتەی نووسینی ناوی خۆمان بە عەرەبی و ڕەچاونەكردنی ئەلفوبێی كوردی، تەنیا حاڵەت نییە و بگرە لە دیاردەش تێیپەڕاندووە، گەر ڕاشكاوتر بین، پرسی نووسینی ناوەكان بە (ئەلفوبێی عەرەبی وەك خۆی)، پەلی بۆ ناوی نووسینیگە و كۆمپانیا و فرۆشگاكانیش لەسەر تابلۆكانیاندا هاویشتووە و بە دەگمەن نەبێت، نابینیت ناوی ئەو شوێنانە بە كوردییەكی ڕەوان نووسرابێت.

  

وەك بەشێك لە هاوڕێیانیشم لە تۆڕی كۆمەڵایەتیی فەیسبووك ئاماژەیان داوە، تەنانەت لەسەر ئەو كاڵا و كەلوپەلانەش كە رۆژانە بەكاریان دەهێنین، ناوەكان بە عەرەبی دەنووسرێن و ئەمەش كاریگەریی ڕاستەخۆی لەسەر نەوەی ئێستا و سبەینێ و داهاتووش دەبێت و جگە لەوەی فێری رێنووسی كوردی نابن، هیچ بایەخێك بە زمانی دایك نادەن و ئەمەش وەچە بۆ وەچە دەگوازرێتەوە و لە ڕووی زمان و رێنووسەوە ڕەنگدانەوەی نەرێنیی بۆ سەر وێژە و فەرهەنگ و كولتووری كۆمەڵگای كوردستانی دەبێت.

با سەرتان نەهێشێنم و چیتر درێژدادڕی نەكەم، بە ڕای ئەو هاوڕێیانەم لە تۆڕە كۆمەڵایەتییەكان، ئەركی سەرشانی فەرمانگەكانی كاروباری شارستانییە لە تۆمار و ناسنامەكاندا هەر هیچ نەبێت لەمەودوا بە كوردی ناوەكان تۆمار بكەن و ئەلفوبێی عەرەبی بخەنە لاوە، ڕەنگە ئەوكاتیش هاونیشتمانیان ناچار بن ناوەكانیان هاوشێوەی پێناسی باری شارستانی و بەڵگەنامە و تۆمارەكانی دیكە بنووسن، هەرچەندە ئەو پرسە كاتی گەرەكە، بەڵام بێگومان پێویستە كارمەندانی ئەو فەرمانگە پەیوەندیدارانە كە (ماندوون و جێپەنجەیان دیارە)، لەم ڕووەوە هەست بە بەرپرسیارێتیی نەتەوەیی و نیشتمانی بكەن و هەرچی زووتر خەمێك لەو بابەتە بخۆن، ئەوكاتیش بەوپێیەی خەڵك فێر دەبن ناوی خۆیان و باب و باپیریان بە كوردی بنووسن، لەسەر تابلۆی كۆمپانیا، فرۆشگا و نووسینگەكانیشدا كوردییەكی ڕەوان پەیڕەو بكەن، بەمەیش بەرە بەرە ئەلفوبێی كوردی جێ بە ئەلفوبێی عەرەبی لەق دەكات.

بە كورتی و بە كوردیش چەند نموونەیەك دەخەینە بەر دید، بۆ وێنە: (مصطفی) نییە و (مستەفا)یە، (علی) نییە و (عەلی)یە، (طیب) نییە و (تەیب)ە، (محمد) نییە و (محەمەد)ە، (جبار) نییە و (جەبار)ە، (نوزاد) نییە و (نەوزاد)ە، (احمد) نییە و (ئەحمەد)ە، (شریف) نییە و (شەریف)ە، (جمال) نییە و (جەمال)ە، (ابراهیم) نییە و (ئیبراهیم)ە، (صباح) نییە و (سەباح)ە، (نجم الدین) نییە و (نەجمەدین)ە، (مولود) نییە و (مەولوود)ە، (ادهم) نییە و (ئەدهەم)ە، (ارسلان) نییە و (ئەرسەلان)ە، (بشیر) نییە و (بەشیر)ە، (حاتم) نییە و (حاتەم)ە، (حكیم) نییە و (حەكیم)ە، (حیدر) نییە و (حەیدەر)ە، (زكریا) نییە و (زەكەریا)یە، (زینب) نییە و (زەینەب)ە، (شفیق) نییە و (شەفیق)ە، (عبدالرحمن) نییە و (عەبدولڕەحمان)ە، (فاطمە) نییە و (فاتیمە)یە، (لطیف) نییە و (لەتیف)ە، (موسی) نییە و (مووسا)یە، (نعمت) نییە و (نیعمەت)ە، (ولید) نییە و (وەلید)ە، (یوحنا) نییە و (یوحەننا)یە، (عزیز) نییە و (عەزیزە)، دواجار (امید) نییە و (ئومێد)ە و هەر ئەوەندە ناوەشم بە خەیاڵدا هاتن.

 

Pishderi81@gmail.  com