لە سەردەمی ئەمڕۆدا كە سۆشیال میدیا تا ڕادەیەك جێی بە ماسمیدیا لەق كردووە و لە تۆڕە بەرفراوان و گشتگیرە كۆمەڵایەتییەكاندا فەزای ئازادی بە ڕەهایی كراوەیە، هەر تاكێك بۆخۆی نووسەر و رۆژنامەوانە و دەكارێ لەو كەناڵە سەربەست و بێسانسۆرانەدا بە سانایی گوزارشت لە بیروبۆچوون و ڕای كەسی و تایبەتی خۆی بكات.

 

ئەگەرچی ئێمەی كورد تا ئێستاش بە هۆكاری جیاجیا و لەبەر كەمتەرخەمیی پسپۆڕانی زمان و خەمساردیی لایەنە پەیوەندیدارەكان خاوەنی زمان و رێنووسێكی ستاندارد نین و هەر میدیایە و شێوە رێنووسێك پەیڕەو دەكات و جۆرە زمان و داڕشتنێك بەكار دەهێنێت، لێ ئەوەی جێی نیگەرانییە، ئەو دوو میدیایەی لە سەرەوە ئاماژە بە ناویان كرا، بە ئاشكرا ڕەنگدانەوەیان لەسەر یەكدی هەیە و ئەمەش زۆر جار نووسەران و تەنانەت خوێنەرانیش دەخاتە گومانەوە و ڕەنگە زۆر كەڕەتیش هەڵە زەقەكانی ئەو میدیایانە، لە نووسینەكانیان و بگرە لە زمانی میللی و ئاخاوتنی رۆژانەشدا دووپات بكەنەوە.

لە ڕاستیدا هەردوو پرسی ئەتەكێتی نووسین و زمان و رێزمان، تا ئاستێك لە یەكدی جودان، بۆ وێنە، ئەگەر ئەتەكێتی نووسین بخەینە بەرباسەوە، دەبێ بیر لە مۆراڵ و فۆڕم و ئیتیك بكەینەوە و ناشێ وەك هەندێك بابای خۆ بە نووسەر زان، هەرچی بە مێشكماندا هات و پێمان ڕاست بوو، بێباكانە و نابەرپرسانە بڵاوی بكەینەوە و ناوزڕاندن، سوكایەتی و لەكەداركردنی ئەم و ئەو، نادیدە بگرین.

 

گەر بە سادەییش لەسەر زمان و رێنووس بدوێین، دەكرێ ئەوە بیر خۆمان بهێنینەوە كە ناشێ و ناگونجێت خوێندەواری كورد سەروكاری لەگەڵ دنیا فراوانەكەی نووسیندا هەبێت و بە ئارەزووی خۆی وشە ریز بكات بێ گەڕانەوە بۆ بنەماكانی زمان و داڕشتن و رێنووس، ئاخر زۆر نەنگییە توێژی رۆشنبیران و رۆژنامەوانان بە تایبەت، شارەزای زمانی دایك نەبن و خەمساردانە هەڵە زمانەوانییە باوەكانی رێنووس و داڕشتن بە خوێنەران، بیسەران و بینەران بفرۆشن.

 

سەرەڕای هەموو ئەوانەش، شێوازی نووسین و پرسی زمان و رێنووس، دوو ڕووی دراوێكن و بە سادەیی لێك جیا ناكرێنەوە، چونكە ناكرێ بڵێین شارەزایەكی زمان، نووسەرێكی باشە، هەروەك چۆن دەكەوینە هەڵەوە گەر باوەڕمان وا بێت نووسەرێكی سەركەوتوو، زمانزانێكی لێهاتووە.

وەك برادەرێكی رۆژهەڵاتیشم دەڵێت، لەنێو فارساندا گەر بە كەسێك بڵێی (ئیملا) رێنووس و زمانت ناتەواوە، دروست هەستیت ڕووشاندووە و بگرە زۆر جار وەك سوكایەتیش لێك دەدرێتەوە.

بۆیە هەقی خۆیەتی چ ئەوانەی لە ماسمیدیادا كار دەكەن و چ ئەوانەش كە نووسەرن یان لە تۆڕە كۆمەڵایەتییەكاندا بابەت و سەرنج و تێبینیی خۆیان لەسەر ڕووداو و پێشهاتە هەنووكەییەكان بڵاو دەكەنەوە، جگە لەوەی پێویستە زیاتر شارەزای ئەتەكێتی نووسین بن، چاوێك بە زمان و رێنووسدا بخشێننەوە و هەر هیچ نەبێت چەند پەرتووكێك لەمەڕ رێساكانی نووسین، رێنووس و زمانی كوردی بخوێننەوە.

 

This email address is being protected from spambots. You need JavaScript enabled to view it.

07504302755