بەوپێیەی سەرجەمی دەزگا و دامەزراوەكانی هەرێم بە لەبەرچاوگرتنی بنەما بنچینەییەكانی دیموكراسی و لە رێگەی دەنگدان و هەڵبژاردنەوە شەرعییەتیان لە خەڵكی باشووری كوردستان وەرگرتووە، دەستبردن بۆ كۆمەڵێك بەهای باڵا و ناونانی ئەو ئەزموون و سیستەمی حوكمڕانییەی هەرێم بە دیكتاتۆری، جا لە لایەن هەر كەس و لایەنێكەوە بێت، ڕووشاندنی هەستی خەڵكی كوردستان و كەمكردنەوەیە لە خەبات، شۆڕش و بەرخودانەكانی نەتەوەیەك كە دەستكەوتەكانی ئەمڕۆیان بەرهەم هێناون و قوربانیی زۆر و زەوەندیشیان بۆ دراوە.

 لێدوانەكانی (دوران كالكان) لەو دۆخەی ئێستادا كە دەشێ وەك ڕای سەركردایەتیی كەجەكە خوێندنەوەی بۆ بكرێت، ڕاڤەی زۆر هەڵدەگرێت و دەبێ سەركردایەتیی سیاسیی كوردستان هۆشیارانە لە مەغزاكانی پشت ئەو لێدوانانە ورد بێتەوە و هەڵوێستی ڕوون لەوبارەیەوە دەرببڕێت، ئاخر ناوزەدكردنی سیستەمی سیاسیی كوردستان بە دیكتاتۆریانە و جیاكردنەوەی دیالێكت و شێوەزارەكانی ناوچە جیاجیاكانی هەرێم، دۆخێكی نەخوازراوی سیاسی بۆ ئێستای كوردستان دێنێتە كایەوە، چونكە ئەو ئەزموونەی لە باشووری كوردستان بە دەست هاتووە، ڕووبارێك خوێنی بۆ بەخشراوە.

 

بڕوای من وایە، ئەو شەكرەی (كالكان) شكاندی، خزمەتی یەكدەنگی و یەكهەڵوێستیی حزب و لایەنە سیاسییەكانی باشووری كوردستان و تەنانەت یەكپارچەیی كوردستانیش ناكات، چونكە دەستخستنەناو كاروباری باشووری كوردستان لەلایەن كەجەكەوە، كارێكی نادروستە و ناشێ رێگا بدرێت لەبری خەڵكی هەرێم قسە بكرێت و بڕیار بدرێت، چونكە ئەوە هاونیشتمانیان خۆیانن خاوەنی ئیرادەن و مافی سەربەستیی هەڵبژاردنیان هەیە و بۆ هیچ كەس و لایەنێكیش نییە ئەو مافەیان لێ زەوت بكات.

قسەكانی ئەو ئەندامەی كۆما جڤاكێن كوردستان، جگە لەوەی دەستوەردانە لە كاروباری باشوور، كە مایەی قبووڵكردن نییە، سوكسەرنجدانی پێگەی سیاسی و دیپلۆماسیی هەرێمی كوردستانیشە، ئەمەیش لە كاتێكدایە كە هەرێمی كوردستان خاوەن متمانە و سەروەریی خۆیەتی و لە كۆمەڵگای نێودەوڵەتیدا دانپێدانراوە، تەنانەت دەتوانین بڵێین لە ڕووی مەعنەوییەوە هەرێم لە دەوڵەتێكيش مەزنترە.

سەركردایەتیی كەجەكە لەبری لێدوانی لەو جۆرە، دەبوو داوای یەكدەنگی و یەكهەڵوێستیی زیاتری لایەنە سیاسییەكانی چوار پارچەی كوردستان بكات و بەوپەڕی بوێرییەوە ستاییشی پێكەوەژیانی ئاشتیانەی نێوان پێكهاتە جیاجیاكانی هەرێمیش بكات و بانگەواز بۆ ئاشتەوایی نیشتمانیی سەرتاسەری بكات، چونكە لەم دۆخەدا لە هەموو كاتێك زیاتر تێكڕای لایەنەكانی چوار پارچەی كوردستان پێویستیان بە قووڵكردنەوەی بیری نەتەوەیی و گیانی هاوكاری، لێكنزیكبوونەوەی زیاتری سیاسی و كۆمەڵایەتی هەیە.

(كالكان)ـیش گەر بە ویژدانەوە بدوێت، باش لەو حەقیقەتە تێدەگات كە ئەو سیستەمی حوكمڕانییەی لە باشووری كوردستاندا هەیە، لە دیموكراسییش تێپەڕیوە و هەر لە ژێر سایەی ئەو سیستەمەیشدایە كە سەرجەم پێكهاتەكان بە جیاوازیی بیروڕا و ئایین و ئایینزا و. . تا دوایی، ئەمنییەتیان پارێزراوە و هەمووان بە ئازادی دەژین و پێكەوە هەڵدەكەن.

  

دواجار ماوەتەوە بڵێین، جیاكاری لە نێوان هەردوو دیالێكتی بادینی و سۆرانیدا، پرسێكی خەتەرناكە و هەڵوەستەی جیددی هەڵدەگرێت و ناشێ بە سادەیی خوێندنەوەی بۆ بكرێت، ئاخر ئەو جیاكارییە لەبری نزیكبوونەوەی زیاتر و پێكەوەهەڵكردن و گیانی برایەتی و پێكەوەژیان، تۆوی دووبەرەكی دەچێنێت و رق و كینە لە نێوان هاونیشتمانیاندا تۆخ دەكاتەوە.

حەقیش نییە هەندێك كەس و لایەن خۆیان لە كاروباری پارچەكانی دیكەی كوردستان هەڵقورتێنن، بەڵكە دەبێ هەوڵ بدرێت یەكڕیزیی نیشتمانی بپارێزرێت نەك بە لێدوانێك شڵەژانی سیاسی دروست بكرێت، لەسەر ئەو بنەمایەیش كە هەر پارچەیە و تایبەتمەندیی خۆی هەیە، دەبێ بپرسین، لە بەرژەوەندیی كێدایە باری سیاسیی باشووری كوردستان ئاڵۆز بكرێت؟