شرۆڤەكردنی پرسی ئیتیكی رۆژنامەوانی، پرسێكی هەستیارە و دەمەتەقێ و گەنگەشەی زۆر هەڵدەگرێت، چونكە پیشەی رۆژنامەنووسیش وەك هەر پیشەیەكی دیكە لە كەموكوڕی و خەمساردی و دووپاتكردنەوەی هەڵە بەدەر نییە، ئەوەی كە لە دنیای رۆژنامەنووسیدا پێناسەیەكی گشتگیری بۆ كراوە و ناوی لێ نراوە (ئیتیك)، دەشێ بۆ زۆر بار بگونجێت، لێ لە دۆخی جیاواز و كات و شوێنی جیادا، دەكرێ هەڵسەنگاندنی پتر و هەمەجۆری بۆ بكرێت و زیاتر لێی ورد بینەوە.

ئەگەر زۆر كورتبڕی بكەین، دەبێ بێژین، باری تەناهی، ئابووری و كۆمەڵایەتیی هەنووكەی كوردستان، هەموو رۆژنامەوانان دەخاتە ژێر بەرپرسیاریەتییەكی قورستر لە دوێنێ، ئەو دوێنێیەی كە نە پرسی قەیرانی بودجە لە ئارادا بوو، نە شەڕی دەستەویەخە لەگەڵ گرووپێكی مافیایی سەرسەختی وەك داعش لە گۆڕێ بوو.

مەبەست لەو مانشێتەی سەرەوە ئەوەیە، كاتێك رۆژنامەنووسێكی كورد، هەواڵ، ڕاپۆرتەهەواڵ، ریپۆرتاژ و ڕاپۆرت و هتد. . . لە (میدیا بە گشتی، بە سۆسیال میدیا و ماس میدیاوە) لەسەر جەنگی پێشمەرگە و تیرۆریستانی داعش ئامادە دەكات، هەرگیز نابێ بێلایەن بێت! بۆچی؟

چونكە، ئەو پێشمەرگە گیانباز و مێرخاس و نیشتماندۆست و كوردپەروەرانەی ئێستا لەبری هەموو جیهان شەڕی تیرۆریستان دەكەن، یان برای رۆژنامەوانانن، یانیش ئامۆزا و پوورزا و خاڵۆزا و بە كورتی، رۆڵەی ئەم نیشتمانەن و لە سایەی ئەوانەوە دەتوانین سەربەست بژین، قسەمان بۆ گوتن هەبێت، مومارەسەی ئازادیی ڕادەربڕین و تەنانەت ئازادیی هەڵبژاردنیش بكەین.

لێرەوەیە دەكرێ میدیاكار و ڕاگەیاندنكارانی كورد، لە دۆخی ئێستادا كە شەڕ لەگەڵ دوژمنێكی خەتەرناك و مەترسیداردا درێژەی هەیە و هێشتا بەشێك لە نیشتمانی دایك لە ژێر چنگی تیرۆریستاندایە، باری سایكۆلۆژیی خەڵكی كوردستان لە بەرچاو بگرن و بە بڵاوكردنەوەی دەنگۆیەك (ترس و دڵەڕاوكێ) لای هاونیشتمانیان دروست نەكەن.

 باوەڕی من وایە، ئەگەرچی میدیاكاران سەرنجیان لەسەر كۆی دەزگا و دامەزراوەكان هەبێت و پێیا ن وابێت گەندەڵیی ئیداری و دارایی، (یان ڕوونتر، گەندەڵی بە واتا گشتییەكەی) گەیشتووەتە لوتكە، دەكرێ دان بە خۆیاندا بگرن و لەم دۆخە ناسكەی ئێستادا پشوودرێژتر بن.

پشوودرێژتر بۆ ئەوەی، بە یاریدەی هەموو لایەك ئەو دۆخە دژوارە تێپەڕێنین، تا هەر هیچ نەبێت، چیدیكە دایك و خوشك و باوك و برامان كۆمەڵكوژ نەكرێن و خوێنیان بەهەدەر نەڕوات.

لەگەڵ ئەوەدام رۆژنامەنووسان توێژێكی چاوكراوە و تا ڕادەیەكیش خاوەن زانست، مەعریفە، تێڕوانین و دیدگای جیاوازترن لە ئەوانی دیكە و هەر ئەوەش ڕەنگە لە تاكێكی ئاسایی جیایان بكاتەوە، بەڵام دەبێ لەم بار و زرووفەدا كە قەیران دوای قەیران كەڵەكە دەبێت، بێلایەن نەبن و كاریگەری ڕاستەخۆ و ئەرێنی، لەسەر باری دەروونی و مەعنەویی تاكەكانی كۆمەڵگا دروست بكەن.

 

 

This email address is being protected from spambots. You need JavaScript enabled to view it.

07504302755