هەرچەندە من بڕوای تەواوم بەوە هەیە كە لە هەر شوێنێك لە دایك بوویت، خەڵكی وێیت، لەوێدا منداڵیت گوزەراندووە و كاریگەریی ژینگەی ئەو شوێن و ناوچەیە بەسەر كەسایەتی و دواڕۆژیشتدا ڕەنگ دەداتەوە، بەڵام دەشێ نیشتمانی دایكیشت بێ جیاوازی خۆش بوێت، هەڵبەت لە دەرەوەی ناوچەگەرێتی و شارچێتی.

 

ئەگەر درێژدادڕی نەكەم، مەبەستمە بڵێم، لەو دوو رۆژەی ڕابردوودا ڕەخنە و دەستخۆشیشم ئاڕاستە كراوە كە نازناوی ئەدەبی و رۆژنامەوانیم لە (ئومێد پشدەری)یەوە بۆ (ئومێد بابان) گۆڕیوە.

لە ڕاستیدا من لەنێو دوكەڵی تۆپ و تەیارەی رژێمی بەعس لە قەڵادزێ لە دایك بووم و تا پۆلی چواری سەرەتاییش لەوێ خوێندوومە، بۆیە حەق بە خۆم دەدەم خەڵكی ئەو شارە و دەوروبەرەكەشم خۆش بوێت، زۆر شانازییش بەوەوە دەكەم كە لە قەڵادزێ فێری كوردایەتی، نیشتمانپەروەری و خۆشویستنی خاك بووم، قەت لە ڕابردووشم پاشگەز نیم، چونكە شانازییە قەڵادزەیی و پشدەری بیت، وەك ئەوەی لەوێوە دەشێ فێر بكرێیت ڕێز لە بەها باڵاكان بگریت (هەڵبەت وەك هەر ناوچەیەكی دیكەی باشووری كوردستان و سێ پارچەكەی دیكەش)، بەڵام ئەگەر ڕاشكاو بم، باب و باپیرانم و تەنانەت وەچە پێش وەچە بابانین، ڕەنگە لەوەشدا مافی ئەوەم هەبێت نازناوێك هەڵبژێرم، دروستە كە لە ساڵی 2002ەوە هەرچی وتار و ڕاپۆرت و هەواڵ و ریپۆرتاژ و كاری میدیایی هەیە هەر بە ناوی (ئومێد پشدەری)یەوە بڵاوم كردوونەوە و لێشیان پەشیمان نیم، لێ ئێستا لە سۆنگەی ئازادیی هەڵبژاردنەوە پێم باشە وەك (ئومێد بابان) سەرەتایەكی نوێ لە ڕاگەیاندن و ماس میدیادا دەست پێ بكەم.

لە چەند ساڵی ڕابردوودا نزیكەی لە دەیان شوێن و دەزگای میدیایی كارم كردووە و خۆشبەختانە ماندوویینەناسانە هەوڵم داوە دارێك بخەمە سەر بەردێك، لەمەودواش بەردەوام دەبم، هیواشم وایە دەزگا میدیاییەكان لەمەودوا، وەك (ئومێد پشدەری)یەكەی دوێنێ، مامەڵە لەگەڵ (ئومێد بابان)ی ئەمڕۆ و سبەینێشدا بكەن.

لای زۆرینەمان كوردستانیبوون و پرسی خاكپەروەری و نیشتماندۆستی گرینگە، هەر بۆیە دەكرێ هەموومان بەوپەڕی فەخرەوە بڵێین، دواجار گشتمان بە جیاوازیی دەنگ و ڕەنگ و پێگەمانەوە، كوردستانین و خودان یەك ئامانجی نەتەوەیین.