ڕەنگە زۆربەمان سەرنجمان لەوە دابێت، چەند ساڵێكە كابینە دوای كابینە، كورد نوێنەری خۆی لە ئەنجوومەنی نوێنەرانی عێراق و پۆستە باڵا و سیادییەكانی ئەو وڵاتە هەن و پێشمان وا بووبێت بەرگریكاری شەرعیی خەڵكی كوردستانٍن، بەڵام پێدەچێ بەشێكمان بیرمان بۆ ئەوە نەچووبێت كە مووچەخۆرەكانی كورد لە پایتەختە وێرانەكەی عێراق "بەغدا"، لە ئەوپەڕی پۆستی باڵاوە تا دەگاتە وەزیر و گزیر و ئەوانی تریش، بە ئاشكرا و بێباكانە، سووك سەرنجی عەقڵ و ویژدانی ھاونیشتمانیانی باشووری كوردستانیان داوە و دەشیدەن.

ئاخر، خۆ خەڵكی سادەش، چاو و گوێی ھەیە و ورد و درشتی بەرەنجامەكان بە چاو دەبینێت و بە گوێش دەیبیستێت.تەنانەت كار گەیشتووەتە ئەوەی هاووڵاتیان دركیان بەوە كردووە كە نوێنەرەكانیان جگە لە بەرژەوەندیی حزبی و تایبەتی، شتێكی ئەوتۆیان بۆ خەڵك نەكردووە و نایكەن كە جێی باس بێت و لە خزمەت بەرژەوەندیی كوردستانیاندا بێت.

دیقەت بدەن، پتر لە دوو ساڵە قوتی ھاووڵاتیانی ھەرێم بڕاوە،

بوودجەی پێشمەرگە نادرێت، ماددەی ١٤٠ جێبەجێ ناكرێت، چەك و تفاقی پێویست ناگاتە دەست ھێزە ئەمنییە كوردستانییەكان بۆ شەڕی دژ بە تیرۆر، شیعەكان میلیشیا بۆ سەركوتكردنی ھاونیشتمانیان لە ناوچە كوردستانییەكانی دەرەوەی ئیدارەی ھەرێم پێك دەھێنن..زۆر شتی تریش، كەچی لای مووچەخۆرە كوردەكان لە بەغدا، نە بای دێت و نە باران!

ئەوان كە ھێشتا كێشەیان لەسەر دابەشكردنی پۆست ھەیە و بۆ ھەموو بڕیارێك دەگەڕێنەوە بۆ مەكتەب سیاسییەكان، تەخشان و پەخشانكردنی پارەی میللەتیشیان بەلاوە گرینگ نییە و بگرە سزادانی كوردستانیان و ھاوشاری و ھاوزمان و تەنانەت ھاودۆزەكانیشیان پێ ئاساییە!

بۆ؟ چونكە مووچەخۆری بەغدان و ھەموو سەری مانگێك ملیۆنان دینار بۆ خۆیان و حیمایە وەھمییەكانیان خەرج دەكرێت، لەگەڵ موعاناتی كوردستانیاندا نەژیاون و بەشێكیان لە پڕێكەوە بوونەتە كوڕێك و قەترەیەك ئارەقەیان بۆ نیشتمان نەڕشتووە!

دواجار دەبێ ڕووی پرسیار بكرێتە ئەو مووچەخۆرە زەبەلاحانە، لە پایتەختی وڵاتێكی كاولبوودا چی دەكەن و چی دەچێنن و چیش دەدوورنەوە؟

ھەمووان دەزانن، مووچەخۆرە كوردەكانی بەغدا، نیشتمانیان ھەیە، دەتوانن لەبری گەڕانەوە بۆ شەرعییەتدان بە گەندەڵی و تێوەگلان لە شەڕی تایفی و خۆھەڵقورتاندن لە جەمسەربەندییە ئاڵۆزەكەی كۆمەڵگای نێودەوڵەتی، تەشریف بھێننەوە بۆ نیشتمانی دایك و چیتر چاولەدەستی ئەو كابینە شكستبردووانە نەبن كە یەك لە دوای یەك، تەنیا كورد دەكەنە ئامانج و لەسەر حیسابی دەنگەكانی خەڵكی باشووری كوردستان، ھەم حكوومەتی ناشەرعی بنیات دەنێن و ھەم مافەكانی خەڵكی كوردستانیش بە ئاشكرا و بێمنەتانە، دەخەنە ژێر پێوە.

__________________________

This email address is being protected from spambots. You need JavaScript enabled to view it.

07504302755