لە هەڵبژاردنی بەرێی پەرلەمانی كوردستاندا، هەر حزبە و كۆمەڵێك دروشمی بەرز كردنەوە تا زۆرترین هاونیشتمانی دەنگیان پێ بدەن و بگەنە سەر كورسیی دەسەڵات، تا لەوێوە خزمەتی تاك بە تاكی هاووڵاتیان بكەن و رێگە لە گەندەڵیی كارگێڕی، ئابووری و سیاسی و هتد، بگرن.

ئەوە مافی هەر حزبێكە پێش پرۆسەی هەڵبژاردن، رێكلام و بانگەشە بۆ دیدگا و تێڕوانین و نەهجی خۆی بۆ چوار ساڵی حوكمڕانی لە هەر كۆمەڵگەیەكی دیموكراسیدا بكات، هەروەكچۆن حەقی شەرعیشە كۆمەڵێك دروشم بەرز بكاتەوە كە باوەڕی پێیان هەیە و لە پێناویاندا تێدەكۆشێت و لە رێگاشیانەوە هاونیشتمانیان بە مافە تاكەكەسی و گشتییەكان ئاشنا بكات و داكۆكیكاری سەرجەم مافە ڕەواكانیان بێت.

لێ ئەوەی تێبینی دەكرێت، هەندێك حزب نەك هەر لە ئاست چاوەڕوانیی دەنگدەرانیاندا نەبوون، بگرە پێچەوانە ڕەفتاریان كرد و بەوەندەشەوە نەوەستان، تەنانەت ئەو بەڵێن و گفتانەی بە خەڵكیان دابوون، هیچیان نەهێنانە جێ و بەڵێنیان لەگەڵ هەوادار و لایەنگر و دەنگدەرانیشیاندا شكاند.

یەكێك لە نموونەی ئەو حزبانە، حزبی گۆڕانە كاتێك لە بەرنامەی هەڵبژاردنی ڕابردووی پەرلەماندا، گفتیان بە توێژە جیاجیاكانی وەك ژنی ماڵەوە، منداڵی بێدەرەتان، هاووڵاتیی بێكار، بێوەژن و هتد. . دا كە ئەگەر بچنە سەر كورسیی دەسەڵات، مووچەیەكی شایستەیان بۆ دەبڕنەوە و خەمێك لە خەمەكانیان هەڵدەگرن.

كەچی نەك هەر ئەوە، بەڵكە وەزارەتی دارایی كە سەر بەو حزبە بوو، مووچەی فەرمانبەرانیشى لە كاتی خۆیدا نةدةدا و بە پاساوی جودا، یان دوایان دەخست، یانیش 3 مانگ جارێك مووچەیەكيان دةدا و هۆكاری دواكەوتنەكەیشيان دەخستە ئەستۆی ئەم و ئەوەوە.

بۆ مەگەر هەر دەمڕاستەكانی حزبی گۆڕان نەبوون كە بەر لە هەڵبژاردن دەیانگوت، داهاتی مانگێكی گومرگ و باج و هەناردەی نەوت، بەشی مووچەی 6 مانگی فەرمانبەران دەكات بە زیادیشەوە؟

بۆ بەرچاوڕوونیی هاونیشتمانیان، یەكەمین خاڵی بەرنامەكەی حزبی گۆڕان بۆ هەڵبژاردن (كە دەستپێكە) ئەوە بوو: "گۆڕان هێزێكی گۆڕانخوازە و هەوڵ دەدات نوێخوازی و چاكسازیی ریشەیی لە سیستمی سیاسی و ئابووری و كۆمەڵایەتیدا ئەنجام بدات. واتا خۆدوورگرتنی لە بەكارهێنانی توندوتیژی بۆ گە‌یشتنە دەسەڵات".

وەڵامی ئەوە زۆر ئاشكرایە، ئەگەر خۆیان لە توندوتیژی بەدوور دەگرن و دەیانەوێ بە شێوازی ئاشتیانە دەسەڵات بگرنە دەست، ئەی خێرە شارەزای توندوتیژیی ڕاگەیاندن و ڕووشاندنی هەست و سایكۆلۆژیای خەڵك نین و هەر رۆژە و لەسەر وەتەرێك سەما دەكەن و، هەرچی وەك ئەوان بیر نەكاتەوە، بە تۆمەتی جیاجیا ڕەتی دەكەنەوە؟

خاڵی دووەم: "بزووتنەوەی گۆڕان هێزێكی نائایدیۆلۆژییە و كار ناكات بۆ سەرخستنی ئایدیۆلۆژیایەكی دیاریكراو. گۆڕان باوەڕی تەواوی بە بنەماكانی دیموكراسی و ماف و ئازادییە مەدەنی و كۆمەڵایەتی و ئابووری و سیاسییەكان هەیە".

ئەوەی شارەزایی لە چەمكی "ئایدۆلۆژیا" نەبێت، ڕەنگە بەو نزایەتان بڵێت ئامین، ئاخر هەر حزبێك هەڵگری جۆرێك لە ئایدۆلۆژیایە و ناشێ و نابێت حزب و ئایدۆلۆژیا لە یەكتر جیا بكرێنەوە، چونكە هەر لەسەر پرەنسیپە باوەكانی ئەو چەمكەیە حزب بنیات دەنرێت.

جگە لەوەش، ئەگەر بڕواتان بە دیموكراسی و ماف و ئازادییە مەدەنی و كۆمەڵایەتی و سیاسییەكان هەیە، بۆچی رێگە لە هاونیشتمانیان دەگرن ڕاستەوخۆ دەنگ بە سەرۆك، پەرلەمان، دەزگا و دامەزراوە میرییەكانی دیكە بدەن؟

تەوەرێكی دیكەیش كە جێی پرسیار و تێڕامانە، ئەوەیە كە حزبی گۆڕان "بە دەق" لە بەرنامەكەیدا دەڵێت: "گۆڕان خەبات دەكات لە پێناو بەرپەرچدانەوەی هەموو ئەو بڕیار و دیاردە‌ و ئاكارانەی، كە رۆحی نیشتیمانپەروەری لاواز دەكەن، وەك تاكڕەوی لە دەسەڵاتدا، ناڕۆشنی لە وەرگرتنی بڕیاری چارەنووسسازدا".

بۆ خەڵك زۆر ڕوونە كە سەرۆكی پەرلەمان تاكڕەوانە و بێ گەڕانەوە بۆ ڕای خەڵك و بنەمای سازان و لێكتێگەیشتن، بڕیاری چارەنووسساز دەدات و هەر خودی حزبی گۆڕانیش وەزارەتەكان و پەرلەمانیشی بەحزبی كردووە، (نموونەی ئەوەمان لە وتارێكدا بە درێژی باس كردووە).

ئەو خاڵەش كە زۆرتر لە كۆمیدیا دەچێت، پرسی دەستەبەركردنی مافی كەمە نەتەوەكانی كوردستانە كە حزبی گۆڕان لە بەرنامەكەیدا دەبێژێت: "بە‌رپەرچدانەوەی هەر یاسا و رێسا و گوتار‌ و رەفتار ‌و ئاكارێكی شۆڤێنی‌ و ناشارستانی دەرهەق بە توركمان، عەرەب، كلدۆئاشووری‌ و هاووڵاتیانی سەر بە نەتەوە ‌و ئایینەكانی تر لە كوردستاندا".

گەر كەسێك لێرە (باشووری كوردستان) نەژیت و پەیوەندییشی لەگەڵ دنیای سەردەم و تەكنۆلۆژیا پچڕابێت، هەرگیز ئەوەی نەبیستووە كە پێش هەموو حزبەكان "حزبی گۆڕان" داوای كەمكردنەوەی كورسیی كۆتاكانی كرد و پێداگر بوو لەوەی ئەو پێكهاتە كوردستانییە ناوبراوانە كە لە پەرلەماندا كەمینەن، كورسییەكانیان كەم بكرێتەوە و تەنانەت مافی هاووڵاتیی پلە یەكیشیان لێ بسەندرێتەوە (بۆ ئەوەش، مێژوو و ڕاگەیاندن شایەتن و قسەكردنی زیاتر لەوبارەیەوە، زیادەڕۆییە).

ئەرێ گەلۆ ئەوە مەهزەلە نییە حزبی گۆڕان وەهای گوتووە: "جیاكردنەوەی فەرمان و بڕیارەكانی حیزب و‌ حكوومەت لە یەكتر، دەسەڵاتی سیاسی لە دەسەڵاتی كۆمەڵگەی شارستانی، دەسەڵاتە ناوەندییەكانی هەرێم لە دەسەڵاتی پارێزگاكان".

جارێ دەخوازێ ئەوە شی بكەینەوە، حزبی گۆڕان كە هەمیشە بۆ بڕیاری سیاسی بۆ كەسی یەكەم و سەرۆكی حزبەكەیان گەڕاونەتەوە و بێ ئەملا و ئەولا بڕیارەكانیان جێبەجێ كردووە، حەق نییە ئەو ستەمە لە خەڵك بكات كە زۆر جیددی بڵێت، پێویستە دەسەڵاتی حزب و حكوومەت لێك جیا بكرێنەوە، چونكە ئەمە تەنیا چاوبەستەكی و فریودانی هاووڵاتیانە و هیچی تر.

ئاخر هەمووان دەزانن كە پۆستی پارێزگاری سلێمانی مافی ئێوە بوو و بە دەستتێوەردانی حزبێكی دیكە لە كاروباری حكوومەت، ڕادەستی ئەوانتان كرد و بۆ ڕای خەڵكی سلێمانی نەگەڕانەوە.

"زەمینەسازی بۆ ئەوەی لە فەرهەنگی سیاسیدا زمانی دایەلۆگی بابەتیانە جێگەی زمانی دروشم ‌و موزایەدە بگرێتەوە". ئەمەش پێداگرییەكی دیكەی حزبی گۆڕانە لە هەڵبژاردنی بەرێدا، كەچی خۆیان زمانی دیالۆگیان پشتگوێ خستووە و بێباكانە دروشمی بریقەدار بەرز دەكەنەوە و، بە موزایەدەی سیاسیش سەرنجی ئەم و ئەو بۆ خۆیان ڕادەكێشن، ئەمە بێ سەرنجدان لە چەمكی ئاشتەوایی نیشتمانی، یەكترقبووڵكردن و بەرژەوەندیی گشتیی هاونیشتمانیان.

كورت و كرمانجی، بەندە سەرنجی زۆرم لەسەر خاڵ بە خاڵی بەرنامەكەی حزبی گۆڕان بۆ هەڵبژاردنی ڕابردوو هەیە و، پێشم وایە (ئەگەر نەڵێین هەمووی) زۆربەی هەرە زۆری ئەو بەڵێنانەیان شكاند كە بە دەنگدەرانیان دابوو، بۆیە چاكتر وایە ئەو حزبە داوای لێبووردن لە هەوادار و دەنگدەرانی بكات و، ڕاشكاوانە بڵێت: ببوورن، لە ئاست بەڵێنەكاندا نەبووین.

This email address is being protected from spambots. You need JavaScript enabled to view it.