پارتی كرێكارانی كوردستان (پەكەكە) كە بەداخەوە لەم چەند رۆژەی ڕابردوودا ژمارەیەكیان بە دەستی ژەندرمە و ناپاڵمی فڕۆكە جەنگییەكانی توركە فاشییەكان شەهید بوون، هەڵوێستی جیاجیایان هەیە و لە ئەزمەی نەبوونی سەركردە و مەرجەعدا بڕیاری ناڕوون و جێی هەڵوەستە دەدەن و شەڕی (ئەم) بە (ئەو) دەفرۆشن.

سەركردایەتیی پەكەكە كە دۆخ و تایبەتمەندیی هەرسێ پارچەكەی دیكەی كوردستانی گەورەی لە بەرچاوە، هەندێك جار دووچاری هەڵە دەبن و لەبری بزمار، لە ناڵ دەدەن.

تێبینیی بەندە لەسەر ئەدای ئەو حزبە كوردستانییە ئەوەیە، كەمالیست و توركە شۆڤێنییەكان كە بە درێژایی مێژوو سڵیان لە كوشتوبڕ و قەتڵوعامی كوردەكان نەكردووەتەوە، بە هەمان لۆژیكی جاران خوێندنەوەیان بۆ دنیابینی و تێڕوانینی ئەم وڵاتە بۆ دۆزەكەیان هەیە، ئاخر نابێ بیرمان بچێت، پێویستیی دۆخەكە وا دەخوازێت ناچار بین گفتوگۆیان لەگەڵ بكەین نەك دۆخەكە بە ئاقارێكدا بڕوات كە زیانمەندی سەرەكی كورد بێت نەك لایەنێكی دیكە.

دەبوو سەركردایەتیی پەكەكە هێمنتر مامەڵەی لەگەڵ ئەم دۆخە كردبایە، بۆچی؟ چونكە باری دیپلۆماسی و ئابووری و كۆمەڵایەتیی هەرێمی كوردستان ناهەموارە و لەلایەك شەڕی داعش یەخەی پێ گرتووین، لەلایەكی دیكەشەوە بەغدا بوودجە و مووچە نانێرێت و پێشێلی ڕێككەوتنەكان دەكات.

هەمووانیش دەزانن ئێستا زیاتر لە هەر كاتێك پێویستمان بە یەكڕیزی و هاوهەڵوێستی لە بەرامبەر پرسە نیشتمانی و نەتەوەییەكان هەیە، بۆیە تەقاندنەوەی بیرە نەوتییەكان (كە بژێویی و مووچەی خەڵكی هەرێمی كوردستانی پێوە گرێ دراوە)، هەڵەیەكی ئەو حزبە بوو كە كوردستانیان هیوادارن دووبارە نەبێتەوە.

زۆر ئاشكرایە، بەغدا رێككەوتنی نەوتی لەگەڵ هەرێمی كوردستاندا جێبەجێ ناكات و بە بیانووی نالۆژیكی خۆی لە جێبەجێكردنیان دەدزێتەوە، ئەوە بۆیە هەر هەڵەیەك بەرامبەر ئەو رێگا كورتانەی هەرێمی كوردستان بۆ دابینكردنی بوودجە و مووچە گرتوونیەتە بەر، هەڵەیە بەرامبەر پارچەیەك لە نیشتمانی دایك كە هەمووان تامەزرۆی ئەوەن لەوێوە خەم لە پارچەكانی دیكەش بخورێت و دۆزەكەیان بە دیالۆگ بچێتە پێشەوە نەك بە چەك.

لە ڕاستیدا، پەكەكە دەبوو گوشاری سیاسی بۆ توركیا بهێنێت كە مافەكانی كوردستانیانی باكوور دەستەبەر بكات نەك بیرە نەوتییەكان بتەقێنێتەوە، ئاخر زۆر ڕوونە خۆتەقاندنەوە و مینڕێژكردن و تیرۆر، دژی پرەنسیپە باوەكانی كۆمەڵگای نێودەوڵەتین و هیچ دووریش نییە حزبێكی كوردستانی لەسەر ئەو بابەتە بۆ ماوەیەكی دیاریكراو بكەوێتە لیستی ڕەشی تیرۆرەوە، بۆیە چاكتر وایە سەركردایەتیی پەكەكە لەجیاتی تەقاندنەوەی بیرەنەوت، رێگای ئاشتیانە هەڵبژێرێت و بەرژەوەندیی نەتەوەیەك لە هەر چوار پارچەی كوردستان، بخاتە پێش بەرژەوەندییە حزبییەكانەوە.

پەكەكە وزەیەكی زۆر و خەباتێكی دوورودرێژی لە پێناو نیشتمانی دایكدا خەرج كردووە، لەسەر ئەو بنەمایەیە ئاساییە خەڵك گلییەیان لێ بكات و بپرسێت، لەبری بەهەدەردانی چەك و تەقەمەنی، رێگای گفتوگۆ و دیالۆگ باشتر نییە؟

جەنگ دواجار هەر دەبێ كۆتایی بێت، بۆچی زووتر نەبێت و چیدیكە جەرگی دایكان نەسووتێت؟

ئایا ناشێ لەبری تەقاندنەوەی بۆرییە نەوتییەكان، پێكەوە هەڵبكەین و گەنگەشەیەكی دۆستانە و دراوسێیانە بەڕێ بخەین؟

ئەلتەرناتیڤی جەنگ چییە؟ هەمووان وەڵامەكەی دەزانن، كەواتا هەنگاو بهاوێژن و كوردستانیانیش (لەم پرسەدا) هاوهەڵوێست و هاوبیرتانن و لایەنی بەرامبەریش ناچارە سڵ لە ئاشتەوایی نەكاتەوە و بە پێكەوەیی و ئاشتی و تەبایی بڵێت: (بەڵێ).