لە 23ی حوزەیرانەوە، دۆخێكی وەها لەسەر پرسی سەرۆكی داهاتووی هەرێمی كوردستاندا هاتووەتە پێش، هەم لایەنە سیاسییەكان لێی نیگەرانن و هەم خەڵكی سڤیلیش.

نیگەرانیی لایەنە سیاسییە كوردستانییەكان لەوێوە سەرچاوە دەگرێت، هەندێك باوەڕیان بە سیستمی زۆرینە و كەمینە هەیە و هەندێكی دیكەیش لەسەر ئەو باوەڕەن كە بۆ دۆخی ئێستا باشترین بژاردە پێكەوەسازان و یەكدیقبووڵكردنە.

هەڵبەت دڵەڕاوكێی هاونیشتمانیانی سڤیلیش، پاساوی خۆی هەیە بەوەی كە ئەو بارگرژییەی ئێستا لە نێوان لایەنە سیاسییەكاندا هەیە، كاریگەریی ڕاستەوخۆی بۆ سەر باری سایكۆلۆژی و تەنانەت ژیانی رۆژانەی خەڵكیش هەیە و ناهەقیشیان نییە لە پاشەڕۆژی ئەم هەرێمە دوودڵ بن.

لە دۆخی ئێستادا كە ئەو پرسە بە جددی كەوتووەتە رۆژەڤەوە، مافی هەر لایەكە داوای ئیمتیازات و كورسی و لەئەستۆگرتنی پۆستی هەستیار و جێبایەخ بكات، بەڵام، ئایا ئەو بارە ناهەموارەی كە لە ڕووی ئابووری، سیاسی و تەناهییەوە هەرێم پێدا تێدەپەڕێت، دەشێ بەرژەوەندیی نەتەوەیی و نیشتمانی لە بەرچاو نەگیرێت و پێداگری لەسەر پۆست و ئیمتیازات بكرێت؟

هەرچەندە بەشێك لە رووناكبیر و ئاكادیمیستە سیاسییەكان لە رێگەی ڕاگەیاندنەكانەوە هۆشدارییان لەسەر دۆخی ناسكی ئێستا داوە، وەلێ بەداخەوە بەشێكیشیان بێدەنگییان هەڵبژاردووە و رێگە بە خۆیان نادەن دوو قسەی خێر بۆ ئێستا و داهاتووی هەرێمە جیاوازەكەی باشووری كوردستان بكەن (جیاواز لە عێراق و دەوڵەتانی ناوچەكە لە زۆر ڕووەوە).

لە ڕاستیدا پێش هەمووان ئەركی رۆشنبیر و كەسایەتییە زانستییەكانی بواری دیپلۆماسی و شارەزای دۆخی هەرێمە كە ئەو بارگرژییە كۆتایی پێ بهێنن و لە رێگەی میدیاكانەوە ڕای گشتی بجووڵێنن كە بۆ باری ئێستا و ئایندەش باشترین هەڵبژاردە پێكەوەژیان، پێكەوەسازان و پێكەوەهەڵكردنە، نەك لە رێگەی سۆشیال میدیاوە دۆخەكە پتر بەرەو ئاڵۆزی بەرن و خەڵكی بەشمەینەتی ئەم هەرێمە زیاتر نیگەران بكەن.

دیرۆكی كۆن و نوێی باشووری كوردستان پێمان دەڵێت، نابێ بەشێك لە میدیاكانیش خەڵك بۆ ڕقلێبوونەوە و دواجار سڕینەوەی یەكدی گاڵ بدەن، ئەم قسەیە، لەسەر بنەمای ئەو لێدوانانەیە كە رۆژانە بەر دید و گوێمان دەكەون و پاڵ بە هاونیشتمانیان و ڕای گشتییشەوە دەنێن چیدیكە جیاوازییەكانی یەكتر قبووڵ نەكەن.

ڕەنگە خەڵكی كوردستان بپرسن، لە 1991ەوە هێشتا لایەنە سیاسییەكان نەگەیشتوونەتە ئەو بڕوایەی دەكرێ بە دیالۆگ و كۆبوونەوەی هەمەلایەنە و لێكدیحاڵیبوون دەتوانن بگەنە ئەنجام؟

هاونیشتمانیان لە دۆخی هەستیاری ئێستادا كە شەڕی داعش بەرۆكی گرتووین، قەیرانی داراییمان لەلایەن بەغداوە خراوەتە سەر، مافی خۆیانە گلەیی لە دەسەڵاتدارانی هەرێمی كوردستان بكەن بۆچی پێكەوە ناسازێن؟

خەڵكی كوردستان لە پێناو سەروەری و شكۆمەندیدا سەدان پێشمەرگەی دلێریان كردە قوربانیی نیشتمان، ئاخر ئەوان مووچە و بوودجە و ژیانیان دەوێت نەك موزایەدەی سیاسیی ناوخۆ، (لە كاتێكدا خەریكە نوێنەرانی كوردیش لە بەغدا تێكەڵی ئەو هاوكێشەیە دەكرێن)، بۆیە من لەبری خانەوادەی شەهیدانیش دەڵێم، ئەو شەڕەی لایەنە سیاسییە كوردییەكان لە پای چی؟

هیچ كەس و حزبێك پاشكۆی ئەم و ئەو نییە، تكایە بە هانای هاونیشتمانیانەوە وەرن و سازش لەسەر هەندێك لە مافەكانی خۆتان بكەن.