بەڕٍێوەبەری پۆلیسی پارێزگای هەولێر ڕایگەیاند، ئەو پلانە ئەمنییەی هێزەكانیان بە هەماهەنگی لەگەڵ هێزەكانی بەڕێوەبەرایەتی ئاسایشی هەولێر و گشت هێزە ئەمنییەكانی تری هەولێری پایتەخت بۆ ڕۆژانی نەورۆز دایانڕشتبوو، سەركەوتوو بوو.
عەمید دلێر نەجاڕ، بەڕٍێوەبەری پۆلیسی پارێزگای هەولێر گوتیشی، لەم سێ رۆژەی جەژنی نەورۆزدا، جیاواز لە جەژنەكانی پێشووتر، هاووڵاتیان و گەشتیاران لەوپەڕی ئارامیدا جەژنیان پیرۆز كرد و، لە ناوشار و سەیرانگاكانیشدا، سەروماڵیان پارێزراو بوو.
نەجاڕ دەشڵێ، سەركەوتنی ئەو پلانە ئەمنییەی دانرابوو، جێگەی دڵخۆشییە كە ئەو جەژنەش بە سەلامەتی و بێ كێشە بەڕێوە چوو، ئێمەش وەك هەمیشە پارێزەری سەر و سامانی هاووڵاتیانین و خۆمان بە خزمەتكاری راستەقینەیان دەزانین.
