کۆمەڵەی  پێشمەرگە دێرینەکانی کوردستان

ڕاگوزاری سه‌رده‌مێک بوو خه‌ونی هه‌زارانی کرده‌ ڕاستی، جاره‌کی دی هیوای به‌خشیه‌وه‌ که‌وا هه‌رپێشمه‌رگه‌یه‌‌ مافی خوێنی پێشمه‌رگه‌ ده‌ستێنێ. له‌نێوان ئازایه‌تی و هه‌ڵوێستدا تارماییه‌کی تیژڕۆی ده‌گمه‌ن بوو هه‌رگیز ژیان جارێکی تر وێنه‌ی ئه‌و که‌ڵه‌مێره‌ جوامێره‌ ناکێشێته‌وه‌.

گوڵێک بۆگۆڕی شه‌هیدان. .

جارێ خوێنی ڕژاوی شه‌هیدانی داستانی قوڕه‌به‌رازه‌ هیشک نه‌بووبوو، شه‌هید که‌یفی گوڵه‌خوێنێکی له‌سه‌ر مه‌زاریان ڕواند، ئۆخه‌ی به‌دڵی داکه‌پێشمه‌رگه‌کان کرد، فرمێسکه‌خه‌نده‌ی چاوی خوشک و براکانیانی له‌زه‌ماوه‌ندێکی شۆڕشگێڕانه ڕژاند. سوپاس بۆ ئه‌و گوڵه‌ سوره‌ و ئێستا له‌م نوسینه‌ خونچه‌یه‌کی ده‌به‌ینه‌وه‌ سه‌رمه‌زاری خودی شه‌هید که‌یفی و پێی ده‌ڵێین: به‌ڵێ تۆ له‌ناخمان هه‌روای زیندووی.

بڕوانامه‌ی پێشمه‌رگایه‌تی. .

له‌شۆڕشی کۆن سه‌رپه‌ل و ده‌سته‌ی هێرش، بریندار و ڕزگارکاربوو له‌شۆڕشی نوێش فه‌رمانده‌، له‌خوێندندا زیره‌ک که‌چی بڕوانامه‌ی کوردایه‌تی ده‌ویست. زۆرن ئه‌وانه‌ی خوێندنیان ته‌واو نه‌کرد به‌ڵام بڕوانامه‌ی پێشمه‌رگایه‌تیان وه‌رگرت ئێستا له‌سه‌رووی کۆی بڕوانامه‌کانه‌وه‌یه، که‌سێ بۆ گه‌ل و نیشتمان ژیاوه‌ ته‌نانه‌ت گیانیشی به‌خشی له‌و پێناوه، سه‌ره‌تای هه‌شتاکان گوڵه‌خوێنی شه‌هیدبوونی پشکفتیه‌‌.

مافستێن. .

له‌کۆی ژیانی چاوی ده‌نه‌ده‌هینا هه‌رکه‌سه‌کی زۆرلێکراوی بدیتبا یارمه‌تی ده‌داوه‌ و مافی لۆ ده‌ستاند، هه‌رکه‌سێک هاوڕێی بووبێ چه‌نده‌ها وێنه‌ی ئه‌وهامان لۆ ده‌گێڕته‌وه‌. خوێندکارێکی ده‌سڕه‌نگین و وێنه‌کێش بوو زۆر وردۆزانه‌ ڕتوشی وێنه‌ هیندیه‌کانی ده‌کرد هه‌روا پێی ده‌به‌خشین. مرۆڤێکی به‌به‌زه‌یی و خۆشه‌ویستی جه‌ماوه‌رداری کۆیه‌ و بیتوێن بوو تا ئێستاش پێشه‌نگێکی ڕوحی و پێشڕه‌وی زۆربه‌مانه‌.

کوڕی یه‌کێتی. .

چاوی مام بوو له‌وراتی کۆیه‌، ئه‌و هێزه‌ مه‌عنه‌ویه‌بوو یه‌کێتی برده‌وه‌ سه‌رلوتکه‌ی هه‌یبه‌سوڵتان و باواجی، چۆکیان به‌خه‌م دادا سه‌نگه‌ری خه‌باتی نه‌پساوه‌ی نه‌سره‌وتنی کۆمه‌ڵانی خه‌ڵکی ئاوه‌دان کرده‌وه‌ به‌ڵی تۆڵه‌ به‌زه‌بره‌ و به‌ڵام بێ سه‌بره‌!

هه‌ڵۆیه‌کی بڵندنشین. .

که‌سایه‌تیه‌ک نه‌ده‌کرا ڕێزی لێ نه‌گری چونکه‌ بژارده‌ی کۆی ڕه‌وشته‌ مه‌ردانه‌کان بوو، هزرێ خاوه‌ن سێبه‌رێکی براده‌رانه‌، دڵسۆزانه‌، پڕ له‌وه‌فا و پشت پێبه‌ستنی کاتی هه‌ره‌سه‌خت و ته‌نگانه‌. بۆیه‌ ئێستاش له‌ناو هه‌ست و لوتکه‌ کێوی دڵان ده‌ژی، ئاخر وایه‌ خۆی هه‌ڵۆ به‌رز ده‌فڕێ و به‌رز ده‌نیشی.

دڵشاد تاقانه‌

گه‌لۆره‌کان ده‌راری به‌کاربه‌ری بازاڕێکی شکاون هه‌ڕاجی هه‌موو شتێکی تێداده‌که‌ن به‌هادار بێ به‌ها و بێ به‌هاش به‌به‌هایه‌! به‌رده‌ستیان پڕه‌ له‌گه‌لحۆ و محۆ له‌قوزکێشیدا ئه‌نیشک وه‌ژه‌نی خۆڕه‌پێش و ملشکێنی ده‌وروبه‌رن! لۆ ده‌رمانی به‌رهه‌مهێنه‌کیان تێدا هه‌رناکه‌وی.

به‌هاری ڕووزه‌رد. .

مه‌له‌مه‌لی سنوری ده‌سه‌ڵاتی فارسی دوای وه‌رینی چوزه‌ره‌ په‌لکی به‌هاری عه‌ره‌بی له‌عێراقی عه‌ره‌بیدا ئێستا له‌وپه‌ڕیه‌تی، داعشکاری سونه‌چیه‌کان به‌توانستی کۆماندۆی تورکی گۆشاوگۆش سه‌ربڕین و سوتاندن به‌ئاگری لێکه‌وته‌وه‌. ئێستا ده‌سه‌ڵاتی عه‌ره‌بی شڵۆق و په‌ککه‌وته‌یه‌ له‌سێگۆشه‌وه‌ بوو به‌دووگۆشه‌ی فارس و تورک عه‌ره‌بیان فت کرد. که‌ئێران عێراقی عه‌ره‌بی داگیرکرد به‌شێکی کوردستانیشی لێ گرێداوه‌، سیسته‌می ئایه‌توڵاداریه‌.

لیستی قازه‌که‌. .

خاکی خێڵه‌کی میر و پاشای کوردی به‌درێژایی ته‌مه‌نی میتسۆپۆتامیا له‌گه‌ڵ به‌گله‌ری تورکی و ئاغای فارسی له‌ته‌شتۆکه‌یه‌کدا نان ده‌خۆن. عه‌ره‌بووچکه‌ پێشڕه‌وه‌ی بیر و ئاینی به‌ده‌سته‌ به‌ڵام له‌کورد سه‌رلێشێواوترن وه‌ک میزی حوشترکانیان به‌ره‌و دواوه‌ن! کورد سه‌دان به‌شه‌ حیزب حیزبێنه‌ له‌وپه‌ڕیه‌تی ئێستا حیزبیش به‌مافی دیموکراتی له‌ده‌ست عه‌شایه‌ر و ئیسلامیسته‌کانه‌! چۆن که‌سێکی ڕۆشه‌نبیر ده‌نگ ده‌هێنی ئه‌گه‌ر په‌نجا بنعامی نه‌عامه‌ ده‌نگ بۆ قازپیاوێک بده‌ن هاوده‌نگ قیڕه‌یان بێ له‌لیستی قازه‌که‌.

ده‌هۆڵی شه‌ڕ خه‌ڵک ده‌یکوتێ. .

هیچ کاتێ سه‌رکرده‌کانی مێژوو ئه‌م ده‌هۆڵیان نه‌کوتاوه‌ ئه‌وه‌ خواستی خه‌ڵکه‌ شه‌ڕخوازی له‌خوێنیاندا له‌گه‌ڵ ترپه‌ی دڵیان زرمه‌ی دێ، ئه‌وان خاوه‌نی سه‌ره‌کی و ڕاسته‌قینه‌ی شه‌ڕن، خۆیان کۆیله‌ی به‌دواگه‌ڕاوی سه‌رۆکن، بوده‌ڵه‌یه‌ک ده‌که‌ن به‌دیکتاتۆر به‌ڕیشی مه‌ردانه‌ی قه‌سه‌م ده‌خۆن. هه‌رخێڵبازه‌کانن ئاغا و هه‌رده‌روێشه زه‌رگ وه‌شێنه‌کانن شێخ دروست ده‌که‌ن تا ئه‌وانیش به‌دوای ئه‌وانه‌وه‌ بن ئه‌و سیسته‌مه‌ عه‌شایاریه‌ ناگۆڕێ مه‌گه‌م.

کوڕه‌ ئاغایه‌ک. .

یا شێخێکی به‌وێژدان وه‌ک بیسمارکی ئه‌ڵمانی بێ هه‌موو هه‌رێمه‌ خێڵه‌کیه‌کان یه‌کخاته‌وه‌ سیستمێکی سۆسیالگه‌را بێنێته‌ کایه‌وه‌ به‌ڵام ئاخۆ ئه‌و ئاغه‌له‌ که‌ی بێ؟ ئه‌رێ ئێستا له‌داکی بووه‌؟ به‌کوڕه‌ هه‌ژار و ڕۆشه‌نبیر ناگۆڕی چونکه‌ ئه‌م زه‌لکاوه‌ هه‌رمیکرۆب تێیدا ده‌ژی.

مه‌نجه‌ڵی شه‌ڕی ناوخۆ. .

قوڵپ ده‌دا بڵقه‌کانی چێشتوه‌ره‌کان داخ ده‌کات. چزه‌ی ئازاره‌کان ده‌گاته‌ دڵی دایکی گه‌شمه‌رگه‌ پێشمه‌رگه‌کان هه‌مووان ڕاده‌چه‌نێ. ئای که‌ حه‌زیان لێنانی هه‌رکه‌س شیوه‌قوله‌ی خۆیتی و به‌شی یه‌کترنه‌ده‌ن له‌باج و نه‌وت و گاز له‌بن ته‌نکێشی خۆیانی قایم بکه‌ن ڕه‌بی له‌برسان مرن به‌ساری هه‌رزانیه‌.

شه‌ڕه‌کان له‌هاوین ده‌وه‌ستا!

کاتی شه‌ڕی ناوخۆی نه‌وه‌ته‌کانمانگی نۆ و ده‌ ته‌قه‌ ده‌ستی پێده‌کرد هه‌ر قۆپک و شیوێک به‌چه‌ند ده‌فته‌رێک ده‌گیرا تا مانگی چواری ساڵی داهاتوو دیسان شه‌ڕ ده‌وه‌ستا و که‌سیش نه‌یده‌زانی گفتوگۆ ده‌ستی پێده‌کرد تا دروونه‌ و خه‌له‌ و خه‌رمانی جوتیارانی کورد هه‌ر ده‌گیرا و له‌سوتان ده‌پارێزرا جاره‌کی دی له‌ مانگی نۆوه‌ ده‌ستی پێده‌کرده‌وه‌ ئه‌وه‌ش ده‌یسه‌لماند شه‌ڕ شه‌ڕی کوردی جوتیار بوو نه‌ک.

حیزبۆچکانی!

زرمه‌زلانێی سێڕیزکانێی حیزبانێ ئه‌وه‌ت ڕیز ئه‌وه‌ت نه‌یکا دڵسۆزه‌کان داشی دامه‌ی خوراون، سه‌ربازی شه‌تره‌نجێکی مه‌لیکتڕێن به‌عه‌قڵی تورک و فارسی به‌ڕێوه‌ده‌برێن، یه‌ک شیعه‌باز و یه‌ک سونه‌باز له‌گه‌ڵ عه‌ره‌بێکی کۆنه‌ ئه‌نفالچی ئه‌گه‌ر ده‌ستیان هه‌بێ ئه‌وان ئه‌نفالی دایکی خۆشیان ده‌که‌ن! مێژووێکی ده‌باره‌ی حه‌ره‌س قه‌ومی و جه‌یشی شه‌عبی و حه‌شدی شه‌عبی و حه‌شدی نیشتمانیشی هاته‌سه‌رێ هیچیان له‌ده‌عوشی که‌متر نیه‌ هه‌رهه‌موویان پێکوڕه‌ی بیرکرمیه‌کی تڵوخاوه‌ن.

ئه‌دی چاره‌؟

وه‌ک لێکدانه‌وه و شیکاری چاودێره‌ سیاسیه‌کانی کورد که‌هه‌رگیز چاره‌ نادۆزنه‌وه‌ ئه‌مه‌ش ده‌رێین: کێشه‌ دوێنی و ئه‌وڕۆ نیه‌ به‌ڵکو کێشه‌ سبه‌یه‌ که‌ سیاسیه‌کانی ئه‌وکاتیش ده‌رچووی هه‌مان ده‌رارخانه‌ی سیاسی ئه‌مڕۆ ده‌بن هه‌رکوڕی نابه‌رپرسه‌کانن!

                        

                           Dlshadtakana@yahoo.  com

فسکه‌ی کادیران‌..

پۆزلێدان و زۆرجار بێزارکه‌ربوو! هه‌ندێ جاریش بۆ پاراستنی نهێنی به‌گوێی یه‌کیان ده‌چرپاند.گوایه‌ کادیر شاره‌زای کاری ڕێکخراوه‌یی حیزبیه‌ پێگه‌یه‌کی هه‌بوو شڕه‌ جانتا یا کتیبێکی پێ بوو وه‌ک ئێستا نه‌بوو هه‌رچی ئه‌ندامی حیزبێکه‌ خۆی به‌کادیر ده‌زانی و هه‌وای کردیه‌! جاری وا هه‌بوو لۆ پرسه‌کی ساده‌ قۆڵیان تێک هه‌ڵده‌کێشا و له‌پێشمه‌رگه‌کان دوورده‌که‌وتنه‌وه‌ به‌سه‌ر خۆم هاتیه‌ بنامه‌یه‌کی نه‌بوو قسه‌کان.ته‌نگی ژووری زیندانه‌کان له‌چه‌ند مه‌ترێکدا وه‌ره‌وهه‌ڕووی بێ ئۆقره‌یی په‌ڕیبۆوه‌ تا دوای ئازادبوونی کادیره‌کان له‌و ده‌شت و ده‌ره‌ کاکی به‌کاکیه‌ هه‌رله‌چه‌ند مه‌ترێکی که‌م به‌خێراییه‌وه‌ ده‌هاتن و ده‌چوون، شێلگیرانه‌ ده‌ستیان ڕاده‌وه‌شاند و هه‌ڵده‌چوون ئه‌وانه‌ی زیندانیش نه‌کرابوون به‌هه‌مان ده‌رد چووبوون هه‌مان خوویان گرتبوو! وه‌ره‌وبڕۆیه‌کی ئه‌عساب سوتێنه‌ربوو ته‌نانه‌ت لۆ خودی خۆشیان.زۆرجار داده‌نیشتن قسه‌ و لێکدانه‌وه‌ی بێ سه‌روبه‌ر‌یان ده‌کرد: بسته‌ زه‌ویه‌کی ئازادکراویان نه‌بوو ده‌یانگۆت: حکومه‌ت هه‌رده‌ڕوخێنین له‌وه‌ش خۆشتر مفاوه‌زاتیان نه‌ده‌کرد که‌چی دوای چه‌ند ڕۆژه‌ک ته‌سلیم ده‌بوونه‌وه هاهاهها.له‌دوو که‌وانه‌ی ته‌وسه‌وه ‌کادیر "شه‌کرشکێنی سیاسی زۆربرێ و له‌هه‌موو شته‌کیان ده‌زانی" هه‌نده‌کیان منجڕ و گێره‌شێوێن بوون له‌هه‌موو که‌سیان ده‌خوند په‌کو! زۆرجار کاتی شه‌ڕ کادیره‌ پێشمه‌رگه‌ییه‌کان به‌ته‌وسه‌وه‌‌ به‌کادیره‌ سیاسیه‌کانیان ده‌گۆت: ئه‌گه‌ر کۆپته‌رهات دوو کتێبی تێگرن.هه‌شیانبوو زۆر جوامێر و ئازا به‌ڵام هه‌رفسکه‌ی ده‌کرد.

                     

                           This email address is being protected from spambots. You need JavaScript enabled to view it.

له‌هاتوباتی ڕۆژانه‌ ئه‌وه‌ی باس ده‌کرێ له‌و هه‌رێمه‌ی ئێمه‌ له‌زاری خه‌ڵکی سڤیل سیاسه‌ت نیه‌ به‌ڵکو باسی به‌ڕێوه‌بردنه‌ و له‌خراپترین ئاستیدا مێشکیانی جه‌نجاڵ کردیه‌ بێ سود و به‌رهه‌م، قورتقورتۆکی گرتیین ناهێلی هه‌ناسه‌ی ئاسوده‌یی بده‌ن! ده‌توانین بڵێین: خه‌ساندنی هۆش و توانای بیرکردنه‌وه‌ی دروسته‌.به‌ڵام ئه‌وان واده‌زانن هه‌رهه‌موویان سیاسین و له‌سیاسه‌ت ده‌گه‌ن! له‌ڕاستیدا سیاسه‌ت پێڕه‌وپڕۆگرامه‌ له‌گه‌ڵ هونه‌ری داهێنان بۆ باشترین داهات و به‌ڕێوه‌بردن له‌لایه‌ن که‌سانی ئه‌کادیمی له‌سه‌نته‌ری زانستیه‌وه‌ به‌ڕێوه‌ده‌برێ له‌چێوه‌ی ئاسایشی نه‌ته‌وه‌یی شۆڕنابێته‌وه‌ به‌رده‌ستی هه‌مووان به‌ڵامێک لێره‌ چی ده‌گوزه‌رێ؟

سیاسه‌تی برسی کردن..

کورد له‌باشور له‌و چه‌ندساڵه‌ی ڕابردوو باری دارایی باش ببوو به‌ڵام پاره‌که‌ی نه‌دا به‌فێربوون و ‌پیشه‌سازی و پێشکه‌وتن یا وه‌به‌رهێنان به‌ڵکو دای به‌که‌ڵکه‌ به‌ردی خانوو دروستکردن! له‌ده‌ست کۆمپانیای سیاسی و کرێکاری فارس و تورکی کرد! که‌ هات تۆزه‌ک تێربن ویستیان بیگۆڕن به‌ده‌سه‌ڵاته‌وه‌، که‌س نه‌ما گازه‌نده‌ی نه‌بێ هه‌تا مه‌کته‌ب سیاسی و سه‌رۆک حیزبه‌کانیش به‌دبه‌ختانه‌ ده‌ناڵانه‌وه‌ که‌ له‌کێشه‌دان! خۆ کۆمه‌ڵگا خۆی به‌ڕێوه‌ نابات لۆ ئه‌و چار پێنج ملیۆنه‌ش ده‌بێ چه‌ند سه‌د که‌سانێک هه‌بن ئاڕاسته‌یان بکات به‌ڵام لێره‌ ئه‌وانه‌ کێن؟

سه‌رۆکی عه‌شیره‌ته‌کان..

پێکه‌نینتان نه‌یه‌ ئه‌و وراته‌ی ئێمه‌ سه‌ره‌ک عه‌شیره‌ت و تایفه‌ و بنه‌ماڵه‌ به‌ڕێوه‌ی ده‌با به‌ڕێوڕه‌سمی عه‌قلی عه‌ره‌بی ئاینیه‌وه‌ واته‌ زانکۆ و زانست و ئه‌کادیمیا نیه‌! ده‌جاوه‌ره‌ له‌قوڕاوێ وه‌رمه‌چوو؟ سه‌رۆک و سکرتێر نیه‌ له‌داوی به‌رژه‌وه‌ندی ئه‌وان ده‌ربازی ببێ و نه‌بته‌ خۆراکی حه‌زیان! ئه‌وان ‌له‌گه‌ڵ سیسته‌می تۆلیتاری چه‌وسێنه‌رانه‌ و دیموکراتیش ده‌گونجێن به‌خزمخزمێنه‌ له‌ده‌نگدان هه‌رده‌یبه‌نه‌وه‌.چونکه‌ خێڵه‌کی بوون گونجاوه‌ له‌گه‌ڵ ده‌سه‌ڵاتی داگیرکاران به‌جاشایه‌تی، به‌ئاسانی ده‌سه‌ڵاتی خۆیی قۆڕغ ده‌که‌ن، له‌شۆڕشکردن ڕیشسپین پێشده‌که‌ون، له‌ئاین ده‌بنه‌ مه‌لابه‌خێوکه‌ر، جارێ له‌حیزبیش براوه‌ن به‌ئۆپۆزسیۆنی ناوخۆییه‌وه‌‌.شه‌ڕی ناخۆ هه‌رئه‌وان به‌ڕێوه‌یان ده‌برد زستانان گه‌رمیان ده‌کرد کاتی دروێنه‌ش ڕایان ده‌گرت تا خه‌له‌ و خه‌رمانیان به‌ئاگردارێک نه‌سوتێ ئاخر سیسته‌م چۆن ده‌گۆڕێ؟

له‌باخچه‌ی ساوایان..

تاکی کورد تاکی جوتیاری به‌رهه‌متڕێنه‌ وه‌ک کرێکار نیه‌ له‌وڵاتانی سه‌رمایه‌داری له‌چل سعات کاری هه‌فته‌یه‌کدا به‌ڕێکخراوی به‌رهه‌می هه‌بێت وه‌ک دروستکردنی سعاتیك، ماشێنێک...تاد.به‌ڵکو ده‌روونناسی کورد بێ به‌رنامه‌ی کار و به‌رهه‌مه‌، ئیشی ئه‌وڕۆ ده‌خاته‌ سبه‌ینێ و به‌که‌مترین ڕازیه‌ له‌به‌ر ئاینه‌که‌ی له‌لایان هه‌رخوا که‌ریمه‌! جوتیار ڕۆژه‌ک باران بی کار ناکا و له‌بن دیواری مزگه‌وتێ مۆر ده‌بی، مه‌ڕوماڵات گاوگۆلیش به‌ژنه‌که‌ی خزمه‌ت ده‌کا تاده‌گاته‌ قوڕسواغی خانی ماڵ له‌پایزان جگه‌ له‌مێوان به‌ڕێکردن.ئه‌وانه‌ی مامۆستا و کارمه‌ندن ...تاد له‌ڕۆژێکدا دوو تا سێ کاتژمێر کار ده‌که‌ن، ماوه‌که‌ی دیکه‌ بێ به‌رهه‌می عینادی و پۆز و خۆپفدانه‌.ئینجا گۆڕینی سیسته‌م هێنده‌ گران نیه‌ هه‌رچه‌نده‌ له‌باخچه‌ی ساوایانه‌وه‌ ده‌ست پێده‌کا بۆ وه‌به‌رهێنانی مرۆیی.

سه‌رمایه‌ی مرۆیی..

له‌کوردستان دوایین شته‌ بیری لێ بکرێته‌وه‌ یا پارێزگاری لێبکرێ هه‌تا سه‌رمایه‌ی نه‌وت و گه‌نده‌ڵکاری کۆی پڕۆژه‌ بازرگانیه‌کان هه‌بێ! واته‌ تاکی کورد لاوازه‌ و هه‌رده‌م له‌ئاغا و سه‌رکرده‌ ده‌گه‌ڕێ، پێشه‌نگی ده‌وێ هه‌ره‌می یه‌ پێشڕه‌وی ده‌وێ و دروست ده‌کا ئه‌گه‌ر کاریشی نه‌بوو ده‌رێ: شه‌ڕ له‌به‌تاری باشتره‌ واته‌ خودی خۆیان شه‌ڕه‌کان مسۆگه‌ر ده‌که‌ن لۆ ئاغاکانیان.له‌ده‌سدان و بێ نرخی سه‌رمایه‌ی مرۆیی دوو هۆکار چه‌وسێنه‌ر و له‌باربه‌رین ئاین و خێڵه‌کێتیمان باسکرد.

ئاین..

چه‌قبه‌ستوی بازنه‌یه‌کی به‌رژه‌وه‌ندی سیاسیه‌ به‌تایبه‌تی ئه‌گه‌ر ئاینه‌که‌ سه‌پاو و خوازراوه‌ بێت واته‌ له‌ئازادی هۆشی کورده‌وه‌ هه‌ڵنه‌قوڵابێ که‌چی له‌عاره‌بستانه‌وه‌ هه‌نارده‌کرابێ به‌شه‌ق و خوێن دارێژرابێ و په‌روه‌رده‌ بکا.نه‌ده‌گۆڕێ و نه‌گه‌شه‌ ده‌کا که‌واته‌ بۆ داهاتووی هیچ سه‌رده‌مێک ناگونجێ ئه‌گه‌ر بادانه‌وه‌شیان تێداکرد که‌واته‌ له‌ئاین ده‌رچوونه‌ بووه‌ به‌سیاسه‌ت و پاوانی به‌رژه‌وه‌ندی خودا‌نه‌کانیان له‌مه‌زهه‌ب و ته‌ریقه‌تی شێخ و سۆفیگه‌ری...تاد.ئه‌وجا بانوقته‌کتان لۆ بگێڕمه‌وه‌ له‌شاری هه‌ولێر سواری ته‌کسی بووم پێمگۆت: ئه‌وکاته‌ت باش؟ کابرای ده‌م بۆگه‌نی له‌بن زگیه‌وه‌ نه‌ڕه‌ی عه‌ره‌بی لێوه‌هات گۆتی: عه‌له‌یکم الســــــــــــــــــلام و ڕه‌حمه‌توڵاهی وه‌به‌ڕه‌کاتوهــــــــوو.گۆتم: کاکه‌ ئه‌من به‌کوردی پێمگۆتی: ئه‌وکاته‌ت باش لۆ به‌عه‌ره‌بی وه‌ڵام ده‌ده‌یه‌وه‌؟ گۆتی: داتبه‌زێنم؟ گۆتم ئا به‌س یه‌ک دینارت ناده‌مێ؟ پێکه‌نی گۆتی: نا نا مامۆستا ده‌تگه‌یه‌نم چونکه‌ قسه‌ت خۆشه‌.ئینجا به‌پاره‌که لغاویم کرد!

زۆرگۆتن چاره‌سه‌ر خۆشه‌..

به‌ئاینداری و عه‌شیره‌تگه‌ری وڵات به‌ڕێوه‌نابرێ چونکه‌ هه‌موو سته‌مکاریه‌ کۆمه‌ڵایه‌تی و نیشتمانیه‌کان به‌و دوو ڕێگه‌یه‌ ئه‌نجام ده‌درێ.دامه‌زراندنه‌وی تاکی کورد له‌باخچه‌ی ساوایانه‌وه‌ ده‌بێت، هه‌موو داموده‌زگاکانیش ئازاد بکرێن له‌سیاسیه‌کان وه‌رگیرێته‌وه‌ بدرێته‌وه‌ ده‌ست تایبه‌تمه‌ده‌ ئه‌کادیمیه‌کان واته‌ دکتۆری بۆ دکتۆران، مامۆستایه‌تی بۆ مامۆستایان و هه‌تا دوایی، مه‌لاکادیره‌ حیزبیه‌کانیش به‌بێ جیاکاری له‌عیلمانی و سه‌له‌فی بێ سێ و دوو ته‌قاویت بکرێن چونکه‌ زۆربرێی بێ به‌رهه‌من وه‌ک مه‌لای گوندێک بێ ئیشوکار هه‌ر لۆ پێشنوێژی مه‌ڕ و بزن و قه‌ل و سه‌رفتره‌ و زه‌کات وه‌رده‌گرن کۆمه‌ڵگایان له‌به‌عرێ کرد هاهاهه هه‌موو هه‌ر به‌قسه‌ی وان داده‌مه‌زرێن به‌بندیواره‌کانیشه‌وه‌! ده‌رێن قسه‌ قسه‌ی ڕاده‌کێشی، ده‌زانم مایتی با ئه‌منیش لێره‌وه‌ بیبڕمه‌وه‌ وابزانم له‌ڕاوی قازه‌که‌دا ته‌قاندم و چیدی مێشکتان نه‌به‌م خۆ ده‌رێی به‌بێژینگێ ئاوێ ده‌کێشمه‌وه‌!

دڵشاد تاقانه‌

عه‌ره‌به‌ یان کورد؟

به‌بن گوێ بابه‌دا چرپاندی، بابه‌ش ده‌ستی به‌ده‌می خۆیه‌وه‌گرت تا خۆی بگرێت و له‌ڕوویدا هیچ ده‌رنه‌که‌وێ! له‌ناو حه‌شاماتی تازیه‌که‌ی پیاوان یه‌که‌مجاربوو کوڕه‌ کورده‌ی هه‌نده‌رانی دوای یازده‌ نه‌ورۆزجاڕی به‌هاری ژیانی شتی وا ببینێ و ببیستێ بزانێ پرسه‌ی مردووان له‌کوردستان به‌و شێوه‌ ده‌گێڕدرێ! له‌هه‌موو هه‌ست و جوڵه‌یه‌کی ده‌ڕوانی له‌هه‌ندێکی ده‌گه‌یشت زۆرینه‌ش نیشانه‌ی پرسیار و سه‌رسوڕمانی لۆ دروست ده‌کرد.ده‌یزانی له‌هه‌نده‌ران که‌ که‌سێک ده‌مرێ خاوه‌ن پرسه‌ بانگهێشتی که‌سه‌ نزیکه‌کانی ده‌کا و ئاماده‌ ده‌بن به‌ڵام لێره‌ هه‌رپیاوه‌ به‌تاک و کۆ دێن بێ ئه‌وه‌ی بانگهێش کرابن! ژنانیش به‌ته‌نیا له‌شوێنێکی ترن له‌به‌رچی پێکه‌وه‌نین؟ له‌هه‌مووی سه‌مه‌ره‌تر ئه‌وه‌بوو به‌لایه‌وه‌، لۆیه‌ش سه‌ری له‌بن گوێ باوکی ناو پرسی: ئه‌وه‌ی مردووه‌ کورد بوو یان ئاره‌ب؟ بابی وه‌ڵامی داوه‌: کورده‌ کورد لۆ ده‌پرسی؟ کوڕه‌ش ده‌ژه‌پرسی کرده‌وه‌: ئه‌ی بۆ به‌عاره‌بی قورئان ده‌خوێنن؟

                  

               This email address is being protected from spambots. You need JavaScript enabled to view it.