derenlogo

ڕاگەیەندراوی کۆمەڵەی پێشمەرگە دێرینەکانی کوردستان سەبارەت ڕێگە گرتن لە سەرکردە و پێشمەرگەی دێرینی گەلەکەمان بەڕێز مەحمود سەنگاوی

 

mahmud sangawi

ئەمڕۆ پێنجشەمە ١٨-٩-٢٠١٩ هێزەکانی سەربە پارتی دیموکراتی کوردستان، لە بازگەی سماقوڵی ژێر دەسڵاتی خۆیان، ڕێگەیان لە هاوڕێ و هەڤاڵی تێکۆشەر و پێشمەرگەی دێرینی گەلەکەمان، مەحمود سەنگاوی گرت. لەکاتێکدا دەیویست بۆ بەشداریکردن لە کۆبوونەوەی مەکتەبی سیاسی یەکێتی نیشتمانی کوردستان، بچێت بۆ هەولێر . ئێمە وەک کۆمەڵەی پێشمەرگە دێرینەکانی کوردستان، بەتوندی ناڕەزایەتی خۆمان بەرامبەر ڕێگەگرتن لە پێشمەرگەی دێرینی گەلەکەمان کاک مەحمود سەنگاوی دەگرین و بەکارێکی ترسنۆکانە و دور لەبەها نیشتمانییەکان دەزانین.

مەحمود سەنگاوی پێشمەرگەی دێرن و خەباتگێڕێکی ئازا و بەجەرگی میللەتەکەمانە و سەرکردەیەکی لێوەشاوەی قارەمانێتییە، لە پێش ڕاپەڕیندا و دوای ئەنفال ئازایانە لەناوچەی گەرمیان دا مایەوە و سەرپەرشتی مەفرەزە پارتی زانەکانی دەکرد.

ئێمە وەک کۆمەڵی پێشمەرگە دێرینەکان ڕایدەگەیەنین کە پارتی دیموکراتی کوردستان هەڵەیەکی گەورەی دەرهەق بە مەحمود سەنگاوی کردووە و پێویستە ڕاشکاوانە دان بەهەڵەی خۆیدا بنێت و داوای لێبووردن لە خەباتگێڕ و قارەمانی گەکەکەمان کاک مەحمود سەنگاوی و یەکێتی نیشتمانی کوردستان بکات.


ئه‌م ڕێگرییه ‌نابه‌رپرسانه‌و نا یاساییه‌، ته‌واوی یه‌كڕیزی نیشتیمانی و یه‌كگرتووی ئیداره‌ی هه‌رێمی كوردستان جارێكی دیكه ‌ده‌خاته‌ ژێر پرسیار و له‌هه‌یبه‌تی حكومه‌تی هه‌رێمی كوردستان كه‌م ده‌كاته‌وه‌و هێڵه‌كانی دوو ئیداره‌یی و چه‌ند زۆنێتی له‌‌كوردستان تۆختر ده‌كاته‌وه‌.

ئەمە یەکەمجار نییە پارتی کاری لەو جۆرە بکات و ئاشتی و ئارامی و تەبایی نێو ڕیزەکانی نێشتمان تێکبدات. لەڕابوردوشدا هەمان سیاسەت و ڕەفتار و کردەوەی هاوشێوەی ئەنجام داوە، بەڵام سەرکەوتوو نەبووە.

بۆیە ئێمە وەک کۆمەڵەی پێشمەرگە دێرینەکانی کوردستان، دیسانەوە ڕایدەگەیەنین و داوا لەسەرکردایەتی پارتی دیموکراتی کوردستان دەکەین بێ پێچ و پەنا و ڕاشکاوانە داوی لێبووردن لە یەکێتی نیشتمانی کوردستان و مەحمود سەنگاوی بکەن و چێدی هەوڵ نەدەن بۆ نانەوەی پشێوی و تێکدانی یەکڕیزی گەلەکەمان، دەنا هەڵوێست یاسایی و توندمان دەبێت.

ئەنجومەنی باڵای کۆمەڵەی پێشمەرگە دێرینەکانی کوردستان

١٩-٩-٢٠١٩ سلێمانی