نامەی پیرۆزبایی پێشمەرگە دێرینەکانی کوردستان بۆ نادیە موراد، بەبۆنەی وەرگرتنی خەڵاتی نۆبڵ

کۆمەڵەى پێشمەرگە دێرینەکان

نادیە موراد تەنیا رەمزی چەوساوەکان نییە، دەرخەری ستەمە لەژێر پەچەى ئایندا !
کومەڵەى پێشمەرگە دێرینەکانى کوردستان لەبروسکەیەکدا پیرۆزبایی لە نادییە مورادی کچە کوردی ئێزدی دەکات بەبۆنەى وەرگرتنى گرنگترین خەلاتى ئاشتى، راشیدەگەیەنێت نادیە تەنیا سنبولی چەوسانەوەی کەسانى زولملێکراوو و ئاشتیخوازان نییە، بەڵکو ئاماژەیەکی رونیشە بۆ ستەمکردنى گروپێکى بیرتوند لەژێر پەچەى ئاینى پیرۆزی ئیسلامدا، کەئەمەش دەقەکەیەتى:
بەرێز نادییە موراد هەڵگری خەلاتى نۆبلی ئاشتى
کومەڵەى پێشمەرگە دێرینەکانى کوردستان بەشانازییەوە گەرمترین پیرۆزبایی وەرگرتنى خەلاتى نۆبڵی ئاشتی-تان لێدەکات، کەسالانە دەدرێتە ئەو کەسانەى خزمەتى گەشەپێدانى زیاتری ئاشتى دەکەن.
ئێمە وەک کۆمەڵەى پێشمەرگە دێرینەکانى کوردستان دلنیاین لەهەوڵ تەقەلاکانى بەرێزتان لەپێناو کارکردن بۆ بەجینۆسایدناساندنى تاوانەکانى شەنگاڵ، کەلەبەرامبەریدا گەورەترین خەلاتى ئاشتیت پێ وەرگرت، هیوادارین لەپاڵ هەولەکانت بۆ بەجینۆسایدناساندنى تاوانى شەنگال کاربکەیت بۆ بەحینۆسایدناسانى تێکرای ئەو تاوانە دژە مرۆڤایەتیانەى کەلەرابردوودا لەدژى خەڵکى کوردستان و تەواوى گەلانى زوڵملێکراو ئەنجامدراون.
خەلاتەکەى بەرێزتان ماناى گەورەو دەنگدانەوەى گەورەترى لەناوەندە نێودەوڵەتییەکاندا هەیە ئەم خەلاتە تەنیا ئەو راستییەمان پێ ناڵێت کە وەکو کچە کوردێکى ئێزدی قێزەونترین کردەى نامرۆیت بەرامبەر ئەنجامدراوە، بەڵکو بەکومەڵگەى نێودەوڵەتیشیت راگەیاند کەتائێستاش گەلێک گروپی خوێنمژى وەک داعش خۆیان مەلاسداوە و لەژێۆ پەچەى ئاینى پیرۆزی ئیسلامدا کالفامانە کردەى قێزەون لەدژى گروپە ئاینییەکانى تر ئەنجام دەدەن
کارەکانى بەرێزت لەپێناو ئاشتى و هەڵمالینى رووی راستەقینەى گروپە تیرۆریستییەکان تەواوکەری ئەو هەولانەیە کەهێزى پێشمەرگەى کوردستان دەیان سالە خەباتى بۆ دەکات.
سەرکەوتوو بیت شایستەى وەرگرتنى خەلاتەکە بویت
هەربژیت

 


جەمیل هەورامی

سەرۆکی کۆمەلەى پێشمەرگە دێرینەکانى کوردستان

٦-١٠-٢٠١٨