نووسەرە کۆنەکان

نووسەرە کۆنەکان
×

Warning

Unable to find a user with the ID: 139

پارتە سیاسییەکان

دەقی په‌یامی لاهور شێخ جه‌نگی، هاوسەرۆكی یەكێتیی نیشتمانیی كوردستان


ساڵی نوێی كوردی و جه‌ژنی نه‌ورۆز له‌ كه‌سوكاری سه‌ربه‌رزی شه‌هیدان و پزیشك و كارمه‌ندانی ماندوونه‌ناسی ته‌ندروستی، هێزه‌كانی پێشمه‌رگه‌، ئاسایشی ناوخۆ، داموده‌زگا خزمه‌تگوزارییه‌كان، راگه‌یاند‌نكاران، و هه‌موو گه‌لانی ئازادیخواز و نوێخواز پیرۆز بێت، كه‌ نه‌ورۆز و ده‌رفه‌تی نوێبوونه‌وه‌ و به‌های دژایه‌تی سته‌مكاران، به‌رز راده‌گرن.

كوردستانیانی به‌ڕێز

له‌م بۆنه‌یه‌دا، كه‌ گه‌له‌كه‌مان به‌هۆی بڵاوبوونه‌وه‌ی ڤایرۆس و په‌تای كۆرۆنا و لێكه‌وته‌ ئابوری و كۆمه‌ڵایه‌تییه‌كانی، دووچاری قه‌یران و ترس و دڵه‌ڕاوكێ بووه‌، به‌ نیگه‌رانیی قووڵه‌وه‌ چاودێریی دۆخی ناهه‌موواری ژیانی خێزانه‌ كه‌مده‌رامه‌ته‌ سه‌ربه‌رزه‌كان و خاوه‌ن پێداویستییه‌ تایبه‌ته‌كان ده‌كه‌ین.

ئێمه‌ له‌ ئه‌ركی سه‌رشانمان بۆ كۆمه‌ككردنی ئه‌و خوشك و برایانه‌مان راناوه‌ستین، له‌گه‌ڵ ئه‌وه‌شدا داواكارین له‌ لایه‌نه‌ په‌یوه‌نداره‌كان، به‌هانای ئه‌م چین و توێژه‌ به‌شخوراوانه‌ی كۆمه‌ڵگه‌وه‌ بچن، تا ئه‌م ئازیزانه‌ش بتوانن بێ هه‌ستكردن به‌ گوشاری زیاده‌، رۆژانی سنورداریی هاتوچۆ و كه‌مبوونه‌وه‌ی داهات، به‌ ئارامی تێپه‌ڕێنن. داواكارین، حكومه‌ته‌ خۆجێیه‌كان، ئۆرگانه‌ حزبی و نیشتمانییه‌كان، و رێكخراوه‌ مرۆڤدۆست و خێرخوازه‌كان به‌هانای لێقه‌وماوان و هه‌ژارانی كوردستانه‌وه‌ بچن.

هه‌رچه‌ندیش ئه‌مساڵ، بۆ خه‌ڵك و خۆ پاراستن له‌ نه‌خۆشی، هه‌مووان پابه‌ندن به‌ رێنماییه‌كان و‌ له‌ ماڵه‌كاندا ده‌مێننه‌وه‌، به‌ڵام هێشتا نه‌ورۆز ئاگر و روناكییه‌ و له‌ناخماندا زیندووه‌، و هێشتاش ده‌توانێت وره‌ و وزه‌ی خۆڕاگری و خه‌بات بۆ ژیانێكی باشتری سیاسی و ئابوری و ته‌ندروستی به‌ هاونیشتمانیانمان ببه‌خشێت.

كه‌ركوكییه‌ قاره‌مانه‌كان

به‌راورد به‌ گه‌ل و لایه‌نی تر، بۆ ئێمه‌ له‌ یه‌كێتیی نیشتمانیی كوردستان، نه‌ورۆز تایبه‌تمه‌ندیی گه‌وره‌ی هه‌یه‌. له‌ درێژه‌ی سه‌ركه‌وتنه‌كانی شۆڕشی نوێی گه‌له‌كه‌مان به‌ رابه‌رایه‌تی هه‌ڤاڵ مام جه‌لال، بیست و نۆ ساڵ له‌مه‌وبه‌ر و، بۆ یه‌كه‌مجار له‌ مێژووی نوێی كوردستان دا، كه‌ركوكی قودسی كوردستان راپه‌ڕی و، له‌سه‌ر ده‌ستی پارتیزان و شانه‌ی چه‌كدار و رێكخستن و پێشمه‌رگه‌ی قاره‌مانی یه‌كێتی، كه‌ركوك له‌ به‌عسی دڕ‌نده‌ی فاشیست پاككرایه‌وه‌ و، له‌ رۆژی نه‌ورۆزدا، ئازاد كرا. بۆیه‌ جێی خۆیه‌تی، جه‌ژنی نه‌ورۆز و رزگاركردنی كه‌ركوك، له‌ كه‌ركوكییه‌كان و تێكۆشه‌رانی‌ پیرۆز بكه‌ین و، یادی شه‌هید و قوربانییه‌كانی ئه‌م گه‌له‌ مه‌زنه‌ به‌رز رابگرین.

ئێمه‌ بۆ چركه‌ساتێك دۆخی سه‌پێنراو و نه‌خوازراوی كه‌ركوكی دوای ریفراندۆممان فه‌رامۆش نه‌كردووه‌ و، به‌ڵێنتان پێده‌ده‌ین كه‌ یه‌كێتی، تا ئاسایی كردنه‌وه‌ی ته‌واوی كه‌ركوك و ناوچه‌ كوردستانییه‌كان، له‌ خه‌باتی سیاسی و ده‌ستوری و هه‌ر رێگه‌یه‌كی تریش بۆ یه‌كلایی كردنه‌وه‌، به‌رده‌وام ده‌بێت.

یه‌كێتییه‌ دڵسۆزه‌كان

له‌ ململانێی نێوان ئه‌فسانه‌ و حه‌قیقه‌ت دا، مێژووی نه‌ورۆز، دوو بنه‌ما له‌خۆده‌گرێت‌؛ نوێبوونه‌وه‌ و خه‌بات دژی سته‌مكاری.

نه‌ورۆز پێمان ده‌ڵێت كه‌ تاریكی، كۆتایی دێت، خۆری نوێ هه‌ڵدێت و، ئه‌وه‌ی نوێ نه‌بێته‌وه‌، ناژی. لێره‌وه‌ یه‌كێتیی نوێ، به‌های نوێبوونه‌وه‌ی‌ كردۆته‌‌ رێنمای خۆی و، له‌سه‌ر ره‌گ و ریشه‌ قووڵ و كۆنه‌كان، چاوه‌ڕوانه‌، هه‌زاران چرۆی نوێی لێ سه‌وز ببێت.

له‌ نه‌ورۆزه‌وه‌ ئه‌وه‌ش فێربووین كه‌ زوڵم و سته‌م ناتوانن تا سه‌ر بمێنن و، زوڵم له‌ ئه‌ستووریدا ده‌پچڕێت. خه‌باتی نه‌پساوه‌ی گه‌له‌كه‌مان له‌ دژی زاڵمان و، ئه‌و ئازادییه‌ی له‌م رێبازه‌دا به‌ده‌ستهات، ده‌ریده‌خا كه‌ هه‌رگیز هه‌وڵ و قوربانیدان به‌فیڕۆ ناچن و، دواجار ئامانجه‌ باڵاكه‌ی ئازادی و ژیان و كه‌رامه‌ت دێنه‌ كایه‌وه‌. ئێمه‌ش له‌ یه‌كێتی، به‌رده‌وام ده‌بین له‌ به‌گژاچوونه‌وه‌ی زوڵم و سته‌مكاری. دڵنیاشین، به‌ پشتیوانیی خه‌ڵكی ئازادیخواز، ئه‌و خه‌باته‌ سه‌رده‌كه‌وێت و، تاكڕه‌و و سته‌مكاره‌كانیش، ده‌چنه‌ ریزی دۆڕاوه‌كانی مێژوو و، شكستهێنانیان ده‌بێته‌ هانده‌ری چه‌وساوه‌كان بۆ راپه‌ڕین و نوێكردنه‌وه‌ی تر.

ئێستا كه‌ یادی نه‌ورۆز ده‌كه‌ینه‌وه‌، دروود و وه‌فا ده‌نێرین بۆ گیانی پاكی شه‌هیدان و، رۆحی به‌رزه‌فڕی مام جه‌لال، سه‌ركرده‌ی به‌گژاچوونه‌وه‌ی زوڵم و سته‌مكاری، كه‌ هه‌موو ته‌مه‌نی خۆی له‌پێناو دابینكردنی مافه‌كانی كورد و چه‌وساوه‌كان ته‌رخان كرد.

نه‌ورۆزتان پیرۆز و به‌هیوای ته‌ندروستیی باش بۆ هه‌موو لایه‌ك.

لاهور شێخ جه‌نگی
هاوسه‌رۆكی یه‌كێتیی نیشتمانیی كوردستان
نه‌ورۆزی ساڵی ٢٧٢٠ی كوردی

 

div { text-align:right; }