نووسەرە کۆنەکان

جەنگ ... فەتاح حەسەن

قینمە لە ( مین ) لە ( ڕومان ) گەر بشکرێت بە ئینجانە

       -1-

گەمەیەکی چەپەڵە جەنگ،

گریانی خۆم لەبیردەکەم

پێکەنینی دوژمن.  .  !

      -2-

منداڵیك وتی:-

دەڵێن خودا، هەموو شتێك دەبینێت

بڵێی فرمێسکەکانی منیش!!

- 3 -

هەنگاوەکانم، بەدووم نایەن

پەلم، بۆ کوێ بەکێش دەکەی، دایە.  .  ؟

 پۆستاڵ لەبەر،

کڵاش.  .  

کاسکێت، کڵاو

شوێنی پێیەکانم نابنەوە

چیمە لەمانە؟!

ئەدی نەتگووت

ئەمڕۆ دەتبەم بۆ لای بابە.  

     - 4-

جەنگ، بەواتای

بێوەژن کەوتنی

ژنگەلێك

کەباوەشیان ئاوەڵایە

بۆ گەڕانەوەی مێردەکانیان.  

بێلانە بونی

منداڵانێك

بە هیوابون،

براکانیان

قەڵەم و دەفتەریان بۆ بکڕێت

تا ئاوسانی، جانتاکانیان.  

جەنگ، بە واتای

روتەنکردنی خاك

لە گوڵەبەیبون و نێرگز

پەڕوباڵکردنی باڵندە

کپکردنی هاژەی روبار

کوێرکردنەوەی

کانی ژنان و کارێزی مزگەوتان.  

جەنگ

گەرمکەری بازاڕی

پزیشك و گۆڕهەڵکەنە

هەربۆیە.  .  

تا دوانەفەس

پڕ بە گەروم، هاواردەکەم

نەفرەت لە جەنگ

هەمو جەنگێ

جگە، لە جەنگی رزگاری.  

دانیمارك / ڤالبی          

تێبینی لەسەر ئەم بابەتە لەخوارەوە بنووسە

Omar Faris