پايزى ساڵى ١٩٨٨ بوو، پاش راگيرانى شەڕى عێراق –ئێران،  لەرۆژى ٨ ى ئاب، رژێمى بەعس، رووى دوو فەيلەقى سوپاکەى لەگەل چەند فيرقەيەکى پاسەوانى کۆمارى (الحرس الجمهوري) بەرەو کوردستان وەرگێڕا، تا دەسەڵاتى رژێم بۆ ناوچە ئازادکراوەکان بگێڕننەوەو ئەم ناوچانەى کە بە (جيب العميل) ناوى دەبردن، پێشمەرگەى لێدەرکەن. ديارە بەکارهێنانى زاراوەى جەيبولعەميل بۆ بچوك نيشاندانى ناوچە ئازدکراوەکان و هێزى پێشمەرگەى کوردستان بوو. بەڵام لەکاتى هێرشەکانيان بۆ سەر ناوچە ئازادکراوەکانى کوردستان، بەدرێژايى پايزى ئەو ساڵە ماوە نا ماوە بەلاغى عەسکەرييان دەردەکرد و ناوى شارۆچکە بە شارۆچکە، گوند بە گوند، لوتکە شاخ بە شاخى ئەو ناوچانەيان رادەگەياند کە لەدەست پێشمەرگە دەريان هێناون. عەرەبەکانيش لەبەرخۆيانەوە دەيانگوت، "يمعود يا جيب العميل، طلع هذولة ماخذين نص الشمال" . بەداخەوە ئەو سەردەم، بەعسى دوڕندە لەم هێرشانەى دا، بەدەيان هەزار کوردى ترى ئەنفال و زيندە بەچاڵکرد. بەعسى نەگريس هەرگيز دانى بەشکستەکانى خۆى بەرامبەر بە رۆڵەگيانفداکانى کوردستان نەدەنا، ديکتاتۆرەکەى بەغداش کە لەچالەکەى نێوان عۆجەو دۆريش دەرهێنرا، هەتا ملى بە پەتى قەنارەوە کرا هەر خۆى لا سەرۆکى عێراق بوو!!!

ئەوەى ئەو رۆژە تاڵانەى هێنامەوە ياد، هەڵاتن لەدەست داعش و دۆڕاندنى سێ يەکى خاکى عێراق و تەسليمکردنى بەو هێزە وەحشيەتگەرەبوو. لە حوزێرانى ئەمساڵەوە داعش وەك گەواڵە بارانێك هات و لەماوەى دوو سێ مانگدا هێزى چەکدارى حکومەتى عێراق و هەرێمى کوردستانى لە سێ يەکى خاکى عێراق ڕاماڵى. ئێستاش کە هێزى پێشمەرگەى کوردستان و سوپاى عێراق و گروپەچەکدارەکانى شيعە، بە يارمەتى هێزە ئاسمانيەکانى هاوپەيمانان و راوێژکارەکانيان، خەريکە ووردە ووردە، ناوچەکان لە تەرۆريستان پاك بکەنەوە. بێگومان گيانى شەهيدان و زامى برينداران و شەونخونى و هيلاکى ئەوهێزانە، جێى دانواندى سەرى رێزونەوازشن، ووتنى راستيەکانيش هيچ لەو فيداکاريەيى ئەوان کەم ناکاتەوە. تەنها ئەوەى هانيدام بۆ نوسينى ئەم چەند دێرە، شەڕى راگەياندنى هەندێ لايەنى عەرەبى بەرامبەر بەکورد لەلايەك، وهى کورد خۆ بە خۆشى لەلايەکى تر بوو

لەکاتێکدا دەبوايە هێزى چەکدارى کوردستان، دووربوايە لە بە حيزبيکردن، کەچى راگەياندنى هەر يەکە لە حيزبە دەستڕۆيشتوەکانى کوردستان، هەواڵى سەرکەوتنى پێشمەرگە دەداتە پاڵ حيزب وئەفسەروپێشمەرگەکانى سەربەخۆيان، کەچى بۆ دۆڕاندنى دەيان هەزار کيلۆمەترى چوارگۆشەش لەماوەى چەند رۆژێکدا، کە هێشتا زۆريشى رزگار نەکراوەتەوە، ورتەيان لێوە نايەت.

تێناگەم، ئەو عەقيلەتە تەسکە حيزبيە تاکەى بەردەوام دەبێ؟ بۆ دەبێ چەند حيزبێك وەك کەڵەگا بێن و دەست بەسەر قوربانيدانى لايەنەکانى تر دابگرن؟ کاميان ئامادەن وەك کاکە حەمەى حاجى مەحمود خۆيان لە سەنگەرى پێشەوە بە بيکەى سى تەقە لەدوژمن بکەن و لەپاڵ خۆيان کوڕەکەيان شەهيد ببێ؟! تاکەى سەرکردايەتى کردنى سەرکردەکانى ئەوان لەلاى دواى دواوە و لەژێر پاسەوانێتى سەددان چەکدار قارەمانێتى بێ لاى ئەوان و ئەوەى کاکە حەمە وکوڕەکەشى چش. . . .

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.