بەری چەند روژا مە دیدارا تەیا تەلەفزیونی لپروگرامێ گولستان لسەر روداو دیت.ژ روخسەتا وەبیت چەند تێبینیا لسەر وێ دیدارێ بنڤیسین چونکی دەمێ مە تو ناسکری تو کەسەکێ دلسوز و تێکوشەرو خوراگربووی و سینگێ تە ژبو رەخنە گرتنێ یێ فرەهبوو، هیڤیدارم لمە دلگران نەبی.

هەلبەت هەرکەس ئازادە چەوا دەربرینێ ژ هەست و بیروبوچونێن خوە بکەت و روداوا چەوا ڤەگێریت ، هەر وەساژی تەماشاڤانان و جەماوەری مافێ خوە هەیە وان گوتنان هەلسەنگینن.خەبات و تێکوشینا تە جهێ رێزێیە چونکی تە رێکا پێشمەرگاتیێ ژبو بدەستڤەئینانا مافێن نەتەوەیی هەلبژارتیە و تە گەلەک رەنج دوێ رێدا دیتیە.بەلێ سالێن خەباتا وە دناڤ رێزێن پارتی دیموکراتی گەلی کوردستان دا تایبەتمەندیەکا خوە هەبوو و ددیدارێ دا ژی گەلەک پسیار لسەر هاتن کرن.

دیسا ژی تو ئازادی چەوا وێ پارتێ و خەباتا وێ دبینی بەلێ براستی دخازین بێژین گونەهەکا مەزنە مروڤەکێ تێکوشەر خەباتا خوە و هەڤالێن خوە ، دامەزراندنا پارتیەکا پێشەنگ،خوینا سەدان شەهید و بریندارێن هەڤالێن خوە ، گرتن و ئەشکەنجەدانا دەهان هەڤالان وەسا ئەرزان و بێ بوها نیشان بدەتن!!

کاک نەبی: چاوا رەوایە تو، ئەندامێ کومیتا ناڤەندیا پارتی دیموکراتی گەلی کوردستان، دبێژی پارتی گەل هاتە دامەزراندن ژبو چاکسازیێ دناڤ پارتی دیموکراتی کوردستان دا بکەت؟ ئەرێ رول و کارگەریا پارتی گەل هند یا بێ هێز بوو لدەڤەرا بادینان کو دبەرسڤا پسیارا گولستانێ دا هاتیە دان؟

کاک نەبی: ئەم گازندا لتە ناکەین چونکی ژبەر وێ شکەنجا تە دزیندانا کوماتەی دا دیتی و حەلاندنا پلاستیکی لسەر سەرێ تە رەنگە گەلەک تشت ژبیرا تە نەمابن! لەوما مە دڤێت ڤان خالا بینین بیرا تە:

_ بەری هەرتشتی :هەڤالێن پارتی گەل ژبەر خوەراگریا تە دزیندانا کوماتەی دا و دلسوزیا تە ژبو کوردینیێ رێزەکا تایبەت بو تە دانان و تو ژبو کومیتا ناڤەندی ژی هەلبژارتی.

_ کادر و سەرکردێن پارتی گەل سالێن ١٩٧٦ – ١٩٧٩ خەباتەکا مەزن کرن ژبو چاکسازیێ دناڤ رێزێن پارتی دیموکراتی کوردستان دا.بەلێ دکونگرا نەهێ دا لچاکسازیێ بێهیڤی بوون لەوما ژرێزێن پارتی دەرکەفتن.

_ پارتی دیموکراتی گەلی کوردستان وەکی پێویستیەکا خەباتا رزگاریخوازا کوردستانێ بهەبونا پارتەکا پێشەنگ هاتە دامەزراندن.پارتی گەل بدروشم و هزرو بیرو هەلویستێن خوە ژهەمی پارتیێن سەر گورەپانا خەباتا وی دەمی یا جودا بوو.دروشم و ئارمانجێن کونگرا دامەزراندنا پارتی گەل لسالا ١٩٨١ ێ بلند کرین نهو پشتی پتر ژ سیهسالان هندەک لایەن لکوردستانێ وان دروشما بچارەسەری دزانن و بلند دکەن.

_ پارتی گەل بدەستێ چەندین سەرکردێن دیار و خودان ئەزمون هاتە ئاڤاکرن بەلێ بخەبات و خوینا کادرێن روناکبیر و دلسوز و پێشمەرگەهێن هشیار و قارەمان دماوەکێ کورت دا رولەکێ گرنگ دبزاڤا رزگاریخازا کوردستانێ دا گیرا.پارتی گەل لدەڤەرا بادینان ببوو هێزا دوێ و لئەوروپا ببو هێزا سێهەم.دوارێ راگەهاندنێ دا ژی پارتی گەل درێزا پێشین دابوو.

_ پشتی بورینا بیست سالان ژی هێشتا هزاران کادر و پێشمەرگە و دلخوازێن پارتی گەل لسەرانسەری کوردستانێ بئومێد و ئارەزویا ڤەژیانا پارتی گەل ماینە.بدەهان کادر و سەرکردێن پارتی گەل دکابینێن حکومەتا هەرێما کوردستانێ دا و پەرلەمانێ کوردستانێ دا و هەروەسا درێزێن لایەنێن کوردستانی دا بدلسوزی و سەرکەفتیانە رولەکی کوردەواری دگێرن ئەو هەڤال بهەلویست و هزرێن پێشکەفتی و نەتەوەیی دهێنە نیاسین.

لدوماهیێ دبێژین کاک نەبی: ئەگەر دەستهەلاتدارێن کوردستانێ نەحەقیەکا مەزن لشەهید و بریندارێن پارتی گەل دکەت و کادر وهەڤال و پێشمەرگێن پارتی گەل ژمافێن خوە بێ پار ماینە .مخابنە کەسێن وەکی وە هەول بدەن خوینا وان شەهیدا و خەباتا وان هەڤالان سڤک و بێ بوها بکەن ، هەرچەندە ئەو شانازی ددیروکا کوردستانێ دێ وی بزێری بهێتە تومارکرن.

20140521 بەهزاد سلێڤانەیی، بێستون بەرواری، د.شعبان مزوری