ئه‌مڕۆكه‌ هه‌موو حزبه‌كان، خوازیارن خه‌ڵكانێكی ملكه‌چ و بێ ئاگا، بخه‌نه‌ شوێنه‌ هه‌ستیاره‌كانه‌وه‌، ته‌نانه‌ت ئه‌مه‌ ڕاگه‌یاندنیشی گرتۆته‌وه‌، حیكمه‌تیش له‌مه‌ ئه‌وه‌یه‌ به‌زیانی میلله‌ت و به‌قازانجی كوتله‌و بنه‌ماڵه‌و حزب كۆتایی پێ بێت. ئه‌ها سه‌یركه‌ له‌وه‌ها دۆخێكیشدا كامه‌ی ئایاخه‌ به‌مه‌زه‌نده‌ی خۆی قسه‌ئه‌كا. جا ئه‌مه‌ دۆزی كوردو كه‌ركوكیشی به‌سه‌ختی گرتۆته‌وه‌. به‌كورتی چوار پرسیار له‌خه‌ڵك و پارێزگاری كه‌ركوك ئه‌كه‌ین:

یه‌ك: ئایا پارێزگار توانیویه‌تی وێستگه‌یه‌كی كاره‌با له‌كه‌ركوك دابنات؟. كه‌ شه‌وو ڕۆژی واهه‌یه‌ (14) سه‌عات له‌و كه‌ركوكه‌، به‌م گه‌رمایه‌ هیچ جۆره‌ كاره‌بایه‌ك نییه‌و كه‌سییش قسه‌ناكات.

دوو: توانیویه‌تی پاڵێوگه‌یه‌ك له‌كه‌ركوك دابنات؟. كه‌ئێستا له‌كه‌ركوك هیچ به‌نزینخانه‌یه‌كی حكومی نییه‌و، لیترێك به‌نزین (1250) دیناره‌. ئه‌گه‌ریش به‌نزینخانه‌ هه‌بوبێت له‌ ڕابردوودا زیاتر له‌ (1000) ئۆتۆمبیل له‌ سه‌ره‌دا بوون.

سێ: توانیویه‌تی ژوورێكی ئه‌منی و هه‌واڵگریی هاوبه‌ش دروست بكات؟. یان به‌پێچه‌وانه‌وه‌ ده‌ستی كرد به‌به‌یتو بالۆره‌ و بوون به‌مه‌قاشی ئه‌م و ئه‌و.

چوار: توانیویه‌تی چاودێرییه‌كی ته‌ندروستی (رقابه‌ ێحی) دابنات؟. كه‌ ئێواره‌ی وه‌ها هه‌یه‌ پزیشكه‌كانی شارع جمهوری (150) نه‌خۆش ئه‌بینن و سه‌قه‌ت ئه‌كه‌ن، وه‌ك قه‌سابخانه‌. بێ ئه‌وه‌ی یه‌كێك لێیان بپرسێته‌وه‌.

گله‌یی له‌خودی كه‌ركوكییه‌كان ناكرێت، به‌ڵام ڕووی زارم ئه‌كه‌مه‌ خۆم و ئه‌پرسم " ئایا ئێمه‌ كه‌ركوكمان دۆزیوه‌ته‌وه‌، كابرایه‌ك و حزبێكی بێ حاكم ئاوها له‌كه‌داری بكه‌ن. . . !!""

 خه‌ڵكی كه‌ركوك به‌مانای كه‌لیمه‌، هه‌ژارن، هه‌ژار له‌ بیركردنه‌وه‌، له‌ژیان، له‌پرسیارو گومان، له‌وه‌ی هیچ ئاگاییه‌كیان له‌سوله‌یمانی و هه‌ولێریش نییه‌، چ جای بزانن له‌دونیادا چی ئه‌گوزه‌رێ و گه‌ڕابن. یانی كۆمه‌ڵێكی داخراون، ئه‌مه‌ پتر به‌عس لێی به‌رپرسه‌، به‌رده‌وام كه‌پتی كردوون له‌هه‌موو دیده‌كانه‌وه‌. ئه‌م ئه‌هله‌ی كه‌ركوك به‌رده‌وام چاویان له‌پیاوی سوڵته‌و سه‌ڵته‌نه‌ته‌ (خۆش ویستنه‌كه‌یان له‌ترسێكی شاراوه‌وه‌ سه‌رچاوه‌ی گرتووه‌)، زۆر حه‌ز به‌پیاهه‌ڵدان ئه‌كه‌ن، ئاره‌زوویانه‌ به‌رپرسێك بناسن و ته‌نها وێنه‌یه‌كی له‌گه‌ڵ بگرن (ئه‌ها ئه‌مه‌ ڕێك خه‌سڵه‌ته‌كانی كۆمه‌ڵگه‌ی عێراقییه‌ كه‌ عه‌لی وه‌ردی بۆمان باس ئه‌كات) . ئه‌وه‌شمان بیرنه‌چێت كه‌ركوك خۆی له‌ڕابردوودا له‌پاڵ سه‌روه‌تی نه‌وته‌وه‌، شوێنگه‌ی چه‌ندین كه‌ڵه‌پیاوی كوردو ڕه‌وتی مقاوه‌مه‌ت و هه‌ڵسانه‌وه‌كان بووه‌، چه‌ندین ڕۆشنبیرو ئه‌دیب و شایه‌ری باشی تیاهه‌ڵكه‌وتووه‌. له‌هونه‌ردا جێ ده‌ستی دیاربووه‌. . ئه‌مان چوونه‌ كه‌ركوكه‌وه‌ ئه‌و نوزه‌ كه‌مه‌ش نه‌ما. هه‌ربۆیه‌ش له‌م نوسینه‌ به‌ئه‌نقه‌ست وه‌ك كه‌سێكی ئه‌كادیمی و ئاگادار له‌ڕه‌وشی كه‌ركوك ووشه‌ی " هیچ" م به‌كارهێنا.

. . . له‌پرسی پارێزگاری كه‌ركوكیشدا ئه‌م خزمانه‌ی ئێمه‌ ئه‌ونه‌ داماون، ئه‌یانگوت: بابه‌ ئه‌م موحافزه‌ خۆ پێویستی به‌پاره‌ نییه‌ هاتووه‌ خزمه‌تی ئێمه‌ بكات. !!!

قوڕپێوانی ئه‌وێت، مه‌حكومه‌كان چه‌پڵه‌ی به‌رده‌وام بۆ حاكمه‌كان لێبده‌ن، له‌كوێی دونیادا گه‌لێكی وانوستوو ماوه‌، به‌كه‌سێكی سیاسیی بڵێن به‌رژه‌وه‌ندیی خۆی ناوێت. چ كه‌سێك به‌قه‌د ئه‌م پارێزگاره‌ كه‌ (نه‌ سیاسییه‌و نه‌ هیچ له‌ ئه‌منییه‌ت) ئه‌زانێت، خواپێداوتره‌؟. به‌عس و عروبه‌ له‌م ناوچانه‌ تاكی كوردیان ڕووخاندووه‌، ناخیان وێرانكردووه‌، حه‌شاماتێكی وای بكه‌وێته‌ به‌رده‌ست، له‌بری سه‌رله‌نوی بیناكردنه‌وه‌ی كه‌سێتی تاكه‌كان، به‌ چوار پردو هه‌شت نۆ گلۆپ هه‌موویان فریو بدات!!.

ده‌ركه‌وت، هه‌موو ئه‌و ئیشانه‌ی ئه‌م پارێزگاره‌ كردویه‌تی، هیچی پرۆژه‌ی ستراتیجی گرنگ نه‌بون، ئێ وایه‌، تۆ لێكتێگه‌یشتنێكی سیاسیی و ئه‌منی دروست نه‌كه‌یت. كاره‌با نه‌بێت، به‌نزین نه‌بێت. خه‌ڵك له‌ته‌ندروستی خۆی دڵنیا نه‌بێت. شاره‌كه‌ له‌ نه‌خۆشییه‌كی ده‌روونی و قه‌له‌قییه‌كی به‌رده‌وامدا بژین. ئینجاش ناسنامه‌و دیموگرافیاكه‌ی بشێوێنیت كه‌ له‌م چه‌ند ساڵه‌دا زیاتر له‌ (80000) هه‌شتا هه‌زار خێزانی عه‌ره‌ب هاتونه‌ته‌ كه‌ركوكه‌وه‌، ئینجا بۆپاراستنی پێگه‌كه‌ی خۆت بچیت هێزی سه‌دری و به‌دری شیعه‌ بهێنی، له‌كه‌ركوكا عه‌رزو فه‌رز بكه‌ن، به‌ ویژدان تا ئێستا پێشمه‌رگه‌ له‌ناوكه‌ركوكا مه‌شق و خۆده‌رخستنی كردووه‌. . !!.

ئه‌وسا كه‌ناڵێكی ئاسمانی تایبه‌ت به‌خۆت دابنه‌یت، تا وێنه‌كه‌ت گه‌وره‌ بكات و، به‌سه‌ركردنه‌وه‌ هاكه‌زاییه‌كانت له‌فێنكی ئێواره‌دا بخاته‌ به‌رچاو. . كێ ئه‌ڵێ شت بۆكه‌ركوك كراوه‌. ؟.

ئه‌بێت هه‌موو جارێك له‌نوسیندا ئه‌وه‌ دوباره‌ بكه‌ینه‌وه‌، ئایا كه‌ركوكییه‌كان ئه‌زانن، له‌هه‌ربه‌رمیلێك نه‌وت (5) دۆلاری بۆخه‌ڵكی شاره‌كه‌یه‌، ڕۆژانه‌ (750000) هه‌زار به‌رمیل ڕه‌وانه‌ی ده‌ره‌وه‌ ئه‌كرێت، واته‌ هه‌موو ڕۆژێك (3750000) سێ ملیۆن و دووسه‌دو په‌نجا هه‌زار، به‌زمانی كورد (375) ده‌فته‌ر دۆلاریان له‌بودجه‌ی پترۆ-دۆلار هه‌یه‌. له‌مانگێكدا ته‌نها له‌ پترۆ دۆلار بڕی (112500000) سه‌دودوانزه‌ ملیۆن و پێنج سه‌د هه‌زار دۆلاریان هه‌یه‌. ئه‌مه‌ بێجگه‌ له‌بودجه‌ی ساڵانه‌ی حكومه‌تی مه‌ركه‌زیی كه‌ بۆساڵی (2014) به‌رزترین گوژم بووه‌ له‌مێژوودا (843) ملیار بۆ پارێزگای كه‌ركوك. ئینجا بێجگه‌ له‌بودجه‌ی تایبه‌تی په‌ره‌پێدانی هه‌رێمه‌كان، بێجگه‌ له‌وه‌ی له‌ڕابردوودا ئیداره‌ی ئه‌مریكاو، وه‌ یه‌كێتی و پارتی به‌ده‌می خۆیان بێت قسوریان نه‌كردووه‌. . . هه‌موو ئه‌مانه‌ بێ یه‌ك و دوو خراوه‌ته‌ ده‌ستی یه‌ك كه‌سێكه‌وه‌ له‌كه‌ركوك.

جان جاك ڕۆسۆ ئه‌ڵێت: گه‌لێك بێ مه‌رج خۆی بخاته‌ ده‌ستی هه‌ر ده‌سته‌ڵاتێكه‌وه‌، هیچ وه‌رناگرێت له‌باتی ". .